Ngubani Ozaqeda Izimpi Lodlakela?

UNKULUNKULU UZAKHIPHA OHULUMENDE ABASEMHLABENI

UNkulunkulu uzasusa bonke ohulumende abasemhlabeni esebenzisa impi iBhayibhili eliyibiza ngokuthi yi-Amagedoni.a (ISambulo 16:16) Ngalesosikhathi ‘amakhosi omhlaba wonke’ azaqoqelwa ndawonye “empini yosuku olukhulu lukaNkulunkulu uSomandla.” (ISambulo 16:14) I-Amagedoni yimpi kaNkulunkulu yokuqeda zonke izimpi emhlabeni.

UNkulunkulu uzakhipha bonke ohulumende abasemhlabeni abesebeka uMbuso wakhe kumbe uhulumende ozabusa usezulwini. UMbuso lo awusoze utshabalaliswe. (UDanyeli 2:44) UNkulunkulu ukhethe iNdodana yakhe uJesu Khristu ukuthi abe yiNkosi yawo. (U-Isaya 9:​6, 7; UMathewu 28:18) UMbusob lo yiwo uJesu afundisa abalandeli bakhe ukuthi bawuthandazele. (UMathewu 6:​9, 10) Bonke abantu bazabe sebebuswa nguJesu bengaphansi kukahulumende oyedwa.

UJesu kasoze enze njengababusi abasebenzisa amandla abo ukuthi benze lokho okunceda bona kuphela. Kabandlululi futhi uphatha wonke umuntu kuhle. Yikho akulamuntu ozakhathazeka ngokuthi uzaphathwa kubi ngenxa yokuthi ungumhlobo bani, ukuthi ulombala bani kumbe ukuthi ngowesizwe siphi. (U-Isaya 11:​3, 4) Kuyabe kungaselasidingo sokuthi abantu balwele amalungelo abo. Ngenxa yani? Ngenxa yokuthi uJesu uyabe elendaba lenhlalakahle yomuntu ngamunye. ‘Uzalamulela umyanga okhalela uncedo, alamulele lomuntukazana kanye laloba ngubani ongelamuntu ongamsiza. Uzabakhulula ekuhlukuluzweni lasebantwini abalodlakela.’—IHubo 72:​12-14.

UMbuso kaNkulunkulu uzasusa zonke izikhali eziyingozi emhlabeni. (UMikha 4:3) Uzakhipha labantu ababi abathanda ukulwa lalabo abaphambanisa ukuthula kwabanye. (IHubo 37:​9, 10) Abantu bonke, kungaba ngamadoda, abesifazana, kumbe abantwana kabasoze besabe lutho emhlabeni.—UHezekheli 34:28.

Nxa abantu sebebuswa nguhulumende kaNkulunkulu bazaphila impilo entofontofo. Uzakhipha inhlupho ezibangela ukuthi balwe ezinjengobuyanga, indlala lokuswelakala kwendawo yokuhlala. Ukudla okwakha umzimba kuzabe sekuyithaphutshiye njalo abantu bazabe sebekhomba ngophakathi behlezi kwezabo izindlu.—IHubo 72:16; U-Isaya 65:​21-23.

UMbuso kaNkulunkulu uzasusa zonke izinto ezimbi ezibangelwa yizimpi. Uzawelapha wonke amanxeba njalo asuse konke ukuhlulukelwa kanye lobuhlungu abantu ababuzwayo ngenxa yezinto ezimbi ezenzakala ezimpini. Kanti njalo lalabo abafayo uzabavusa baphinde baphile emhlabeni. (U-Isaya 25:8; 26:19; 35:​5, 6) Izimuli ziyabe sezindawonye njalo asisoze sizikhumbule izinto ezimbi ezake zenzakala ngoba “izinto ebezisenzakala” ziyabe “sezidlulile.”—ISambulo 21:4.

UNKULUNKULU UZAKHIPHA ISONO

UMbuso kaNkulunkulu uzakwenza ukuthi abantu bonke emhlabeni bakhonze uJehovac uNkulunkulu weqiniso, “uNkulunkulu wothando lokuthula.” (2 KwabaseKhorinte 13:11) Abantu bazafunda ukuhlalisana ngokuthula. (U-Isaya 2:​3, 4; 11:9) Bonke abalalela uNkulunkulu abasoze baphinde bahlupheke ngenxa yesono.—KwabaseRoma 8:​20, 21.

UNKULUNKULU UZAKHIPHA USATHANE LAMADIMONI AKHE

UMbuso kaNkulunkulu uzatshabalalisa uSathane lamadimoni akhe abayibo abayenga abantu ukuthi balwe izimpi. (ISambulo 20:​1-3, 10) “Kuzakuba lokuthula kuyo yonke indawo” ngoba bayabe bengasekho.—IHubo 72:7.

Ungathandabuzi ukuthi uNkulunkulu uzasigcwalisa isithembiso sakhe sokuqeda izimpi lodlakela. Uyafuna sibili ukuziqeda izimpi njalo uyenelisa ukukwenza lokhu.

• UNkulunkulu ulenhlakanipho kanye lamandla okuqeda izimpi lodlakela. (UJobe 9:4) Akulalutho olungamehlula.—UJobe 42:2.

• UNkulunkulu uyakuzonda ukubona abantu behlupheka. (U-Isaya 63:9) “Uyamzonda loba ngubani othanda udlakela.”—IHubo 11:5.

• Ilizwi likaNkulunkulu kaliweli phansi njalo ngeke aqambe amanga.—U-Isaya 55:​10, 11; KuThithusi 1:2.