Ubukwazi Yini?

Lalichithelwa ngaphi igazi lezifuyo ezazisetshenziswa emhlatshelweni?

KO-ISRAYELI wasendulo umnyaka ngamunye abaphristi babenikela ngezinkulungwane zezinyamazana e-alithareni elalisethempelini. Umlobi wezembali ongumJuda okuthiwa nguJosephus ubika ukuthi ngelanga lephasika kwakuhlwatshwa izimvu ezedlula 250 000 besezitshiswa zibe ngumnikelo. Lokhu kutsho ukuthi kwakusiba legazi elinengi kakhulu okwakumele lichithwe. (Levi. 1:​10, 11; Nani. 28:​16, 19) Manje lalisiwa ngaphi igazi lezinyamazana zonke lezi?

Abezembali bavumbulula umgelo ethempelini likaHerodi elatshabalaliswa ngo-70 C.E. Kukhanya angathi igazi lalithelwa emgelweni lo beseligeleza liphumele ngaphandle kwethempeli.

Ake sixoxe ngezinto ezimbili ezazisenza ukuthi i-alithare lihlale lihlanzekile:

• Amagodi ayengaphansi kwe-alithare: Elinye ibhuku elikhuluma ngemithetho lamasiko amaJuda elabhalwa sokudlule umnyaka ka-200 C.E lithi kwelinye ikhona le-alithare kwakulamagodi amabili lapho okwakugelezela khona igazi lamanzi okwakugeziswe ngawo i-alithare. Amagodi la ayethela emgelweni owawugeleza uze uyefika esigodini seKhidroni.

  Elinye futhi ibhuku lembali yamaJuda okuthiwa yi-The Cambridge History of Judaism lalo lithi kwakulamagodi ayeseduze lethempeli futhi kukhanya igazi lezinyamazana ezazisetshenziswa emhlatshelweni kanye lamanzi ayesetshenziswa lapho kwakugelezela emagodini la.

• Kwakulamanzi amanengi: Kwakumele kube lamanzi amanengi ukuze abaphristi bagezise i-alithare njalo agcine umgelo uhlale uhlanzekile. Kwakulemigelo eyayigeleza amanzi eyayisuka edolobheni isiza ethempelini futhi amanzi la ayefika angene emachibini lasemigodini eyayikhonapho. Lokhu kwakusenza ukuthi abaphristi bangathwali nzima ngoba amanzi ayehlala ekhona. Umlobi wezembali okuthiwa nguJoseph Patrick uthi akula elinye ithempeli ngalesosikhathi elalihlanzeke njengaleli lelalilendlela yokubisa amanzi emangalisa njengale.