Kristu Simba ra Mwari
“Kristu ndi simba ra Mwari.”—1 Kor. 1:24.
MUNGASANANGURISA KUDINI?
Jesu wakakhombijenyi paakacinja kumwa kuva vhinyu pa mabuso o mucadho?
Zvicinyi zvakakwevejera Jesu kuti aite mushamaiso uri pana Mateu 14:14-21?
Jesu wakakhombijenyi ngo kuimisa bepo guru?
1. Ngenyi Pauro wakakwanisa kunanga kuti “Kristu ndi simba ra Mwari?”
JEHOVHA wakavonesa simba rake ecishandisa Jesu Kristu ngo maitiro anokahamaja maningi. Mavhangeri marongomuna anopa zvimuthyandhya-muthyandhya ngo pamusoro po mushamaiso munganani jakaitwa ndi Kristu jinovangisa gonda. Asi, iyena wakaitavo mushamaiso muzinji jimweni. (Mt. 9:35; Luka 9:11) Hina, simba ra Mwari rakavoneka muna Jesu. Ngo iyo ndava, mupostori Pauro wakakwanisa kunanga ngo pamusoro pake kuti: “Kristu ndi simba ra Mwari.” (1 Kor. 1:24) Asi, mushamaiso ja Jesu jingapsasa kudini upenyu hwedu?
2. Tingajijenyi kubvira ku mushamaiso ja Jesu?
2 Mupostori Pedru wakananga kuti Jesu wakaita “muxamaiso.” (Maitiro o Vapostori 2:22) Mabasa o simba akaita Jesu pasi pano, ainga cikhombijiro co makomborero makuru anozoveyo pasi po utongi hwake. Iwona anovonesa mushamaiso jicazoitwa ndi Jesu pasi pese, mu nyika imbza ya Mwari! Mushamaiso ja Jesu, jinotipa murangariro wakajika kamare ngo pamusoro po undhu hwake no wa Baba wake. Ngatende tivone mushamaiso munganani ja Jesu zve tovona kuti jingapsasa kudini upenyu hwedu nyamasi uno no kumbeji.
MUSHAMAISO UNOJIJISA KUKOVA
3. (a) Sananguranyi mugariro wakaita kuti Jesu aite mushamaiso wake wo kutanga. (b) Kukova kwa Jesu kwakavonekesa kudini pambhene ku Kanani?
3 Pa mabuso o mucadho akaitwa ku Kanani ko Garireia, Jesu wakaita mushamaiso wake wo kutanga. Mutengo wo vakokwa kangaije waikura kupinda zvaivetehwa. Azvinenyi kuti shwiro yakona yainga yapi, vhinyu yakapera. Umwe wo vakokwa wainga Maria, mai wa Jesu. Ko makore, Maria acikakani-kani wairangarira ngo pamusoro po zviphorofita zvakagondiswa nokuda ko mwana wake, uwo waaiziva kuti waizodanijwa kuti “Mwana wa Mwari Mukuru-kuru.” (Luka 1:30-32; 2:52) Iyena waitenda kuti Jesu wainga no simba raainga acito akhombija here? Zviri pambhene ngo zvokuti ku Kanani, Maria na Jesu vakazwira pena vanorovari vapsa vayani zve vaida kuvabvisa mu nyoa. Jesu waiziva kuti kuashira ushoni varendo cainga ciro cinodikana kuitwa. Ngo kudaro, iyena wakacinja marituru anokhwedera kuita 380 o kumwa kuita “doro rauxoni.” (Verenganyi Johani 2:3, 6-11.) Jesu wakavangirijwa kuita mushamaiso uwu here? Haiwa. Iyena wainga ecikhombija basi kunaka mwoyo zve wainga ecitevejera Baba wake vo mugore ngo kuva anokova.
4, 5. (a) Mushamaiso wo kutanga wa Jesu unotijijisenyi? (b) Mushamaiso wo ku Kanani unotijijisenyi no kuda ko kumbeji?
4 Jesu, ngo mushamaiso, wakaita kuti pave no mutengo wo vhinyu yaushoni yaikwana vese mukuzwirana no vaingepo. Munokwanisa kuvona kuti mushamaiso uwu unotijijisenyi? Kujipira kwa Jesu mukuita ciito ici cinokahamaja, kunotigondisa kuti mazwiro o vandhu anosisira maningi kuna Jesu na Baba wake. Jesu na Baba wake avanyimi. Rangariranyi basi mashandisire anozoita Jehovha simba rake, no kukova kwese, mu nyika imbza kuti ape mabuso akanikisisa kuno “vandhu vese.”—Verenganyi Isaia 25:6.
5 Rangariranyi basi! Iri kuvia nguva yo kuti zvinodiwa no zvidisiso zvinofanera—zvakadari inga zvokuha zvinovaka muviri no nyumba jaushoni—kuno vandhu vese zvinozoveyo. Patinovetera no cido cese zviro zvakanaka zvaanozotipa Jehovha mu Paradhiso pasi pano, mudakaro wedu aukuri here?
6. Jesu wakakhombija simba rake kuitira ani, zve tingamutevejeresa kudini?
6 Vonanyi kuti Dhiabho paakaeja Jesu kuti acinje mapuwe kuva pau, Kristu wakaramba kushandisa simba rake ro kuita mushamaiso kuti agutise zvido zvake. (Mt. 4:2-4) Asi, iyena wakashandisa simba rake kuti adavire zve agutise zvido zvo vamweni. Tingatevejeresa kudini Jesu ngo kuda kwake kugarika ko vamweni? Iyena vakakurumijira vashandiri va Mwari kuti ‘vape.’ (Luka 6:38) Tingakhombija mugariro uwu unosisira wo kukova, ngo kukoka vamweni kooha ciri cese navo kana koobusa zvokumujimu ku muzi kwedu here? Tingapeja nguva yedu, patinopeja musongano tecibesera ari wese, kangaije ngo kumupurutana paanonga eciroveja hurukuro hake here? I besero rapi ratingapa kuno vayani vanoda kubesehwa mu mushando? Tinokhombija kuti itusu takajija ndi Jesu ngo kupa no kukova kwese zviro zvo kunyama no zvo kumujimu kuno vamweni kudari zvecikwanisika.
“VESE VAKAHA VOGUTA”
7. Magariro api acazoramba aripo mu mugariro uno wo zviro?
7 Urombo asipi ciro cipsa. Jehovha wakabvunja Iziraeri yo kare kuti varombo avacaizopera mu nyika. (Dt. 15:11) Nopapera mazana o makore, Jesu wakadavira kudari: “vamasikini munozova na ivona ngari yese.” (Mt. 26:11) Jesu waida kureva kuti, nguva jese pasi pano paizondoramba pano varombo here? Haiwa, iyena waida kureva kuti, kwaizoramba kuno varombo mu mugariro uno wo zviro. Ngo kudaro, zvinodakajisa kuzwisisa kuti mushamaiso ja Jesu jinoshanda inga zvivoniso zvo mukuvo wakanaka uri kuvia wo kutonga ko Umambo hwa Mwari, apo vese vanozova no zvakawanda kuti vahe zve vagute.
8, 9. (a) Zvicinyi zvakaitisa kuti Jesu ahise zviuru zvo vandhu? (b) Zvicinyi zvinomudakajisa ngo pamusoro po mushamaiso wa Jesu wo kuhisa zviuru zvo vandhu?
8 Mutari wo nduyo wakanangira Jehovha eciti: ‘Munofunungura nyara jenyu, munogutisa bzese bzinorarama.’ (Ndu. 145:16) Ecitevejera Baba wake, ‘Kristu, simba ra Mwari,’ nguva jese waifunungura nyara yake ecigutisa zvido zvo vateveri vake. Zviito zvake azvicaiva basi cikhombijo co simba rake. Iyena waindundihwa ngo kuda kwake kugarika ko vamweni. Ngatende tivone pana Mateu 14:14-21. (Verenganyi.) Vajiji va Jesu vakaguma kwaari vacibhuisana ngo ndava yo zvokuha. Ivona kangaije avacainga no njara basi asi ivona vainga vecineseka ngo pamusoro po dambujiko ro njara no kuremba ko mbungano yainga yecitevera Jesu kubvira ku dhorobha. (Mt. 14:13) Zvicinyi zvavaizoita?
9 Ngo pau shanu no hove mbiri, Jesu wakahisa vanarume vanokhwedera kuita 5.000 pacikaverengwi vanakaji no vana vadoko! Atidakajihwi tikarangarira mashandisire akaita Jesu simba rake rinoshamaisa kuitira kuti akhombijire unyasha kuno mbhuri yese, kubatanijavo vana vadoko? Mbungano ‘yakaha yoguta.’ Izvi zvinovonesa kuti kwainga no zvokuha zvakawandisisa maningi. Jesu aazivi kuvaravija basi zvokuha, asi ngo kunaka mwoyo wakavapa zvokuha zvaizopa simba mbhungano kuti iite hwendo hwo kuhwirira kumuzi. (Luka 9:10-17) Zve vakazaja 12 zvo zvitengu zvo mbhakata!
10. Cinjo yapi icaitika sasambi ngo pamusoro po urombo?
10 Nyamasi uno mazana o mamirioni o vandhu ari kucotehwa ngo zvinodiwa ngo ndava yo kutama urungami ko utongi hwo vandhu. Hama jedu jimweni pikija jive no zvo kujisapota ndizvona, ijona ajigumi pa “kuguta” kamare. Asi, iri kuguma nguva yo kuti vandhu vese vanozwira, vanozodakara mu nyika icina uvori no urombo. Imwimwi amucaizogutisa zvido zvo vandhu, kudari mwainga no simba ro kuzviita here? Mwari wo Masimba-ese ano simba zve cido cokuzviita—sambi-sambi. Hina, rusujunuko hwaaphedo!—Verenganyi Nduyo 72:16.
11. Ngenyi imwimwi munokhohwa kuti Kristu sambi-sambi acashandisa simba rake kuitira pasi pase, zve zvondhozvo zvinomundundira kuti muitenyi?
11 Naari pasi pano , Jesu wakakwanisa kushanda ndima doko zve pa nguva doko yo makore matatu no meya. (Mt. 15:24) Inga Mambo wakakujwa, ndima yake inozopamba mativi marongomuna ese o pasi pano. (Ndu. 72:8) Mushamaiso ja Jesu jinotipa cigondiso ngo pamusoro po kukwanisa kwake zve no cido cake cokushandisa utongi hwake kuitira kugarika kwedu. Pikija atikwanisi kuita mushamaiso, itusu, no kudakajihwa kwese tingakwanisa kukwevera vandhu ku Soko rakafemehwa ra Mwari. Zviphorofita zvo Bhaibheri zvinothembesa ngo pamusoro po nguva jakanaka jo kumbeji. Inga Zvapupu zva Jehovha zvakazvipira, zvino zivo inosisira ngo pamusoro po kumbeji, atijizwi kuti tino magava no vamweni here? (Rom. 1:14, 15) Tikazvirangarijisisa tinondundihwa kuti tibvunje vamweni ngo pamusoro po masoko akanaka o Umambo hwa Mwari.—Ndu. 45:1; 49:3.
KUVA NO SIMBA RO KUVONERERA MASIMBA ANOITKA EGA PASI PANO
12. Ngenyi tino gwinyiso ro kuti Jesu anonasa kuzwisisa kamare ngo pamusoro po mugariro o zvinorarama pasi pano?
12 No Mwana wake umwe-ega ngo pamutivi, ecishanda inga “mujijisi wo mabasa,” Mwari wakasika pasi pese no zviro zvinowanikepo. (Mazwi 8:22, 30, 31; Kol. 1:15-17) Ngo kudaro, Jesu wainasa kuziva mugariro wo zvinorarama pasi pano. Iyena waiziva mashandisihwe, mavonerehwe pomwe no makovanisihwe o upfumi hwo pasi pano ngo maitiro akaezanana zve anofanira.
13, 14. Ipanyi muezaniso okuti Jesu angakwanisa kudini kujamisa masimba anoitika ega pasi pano.
13 Paiinga ari pasi pano, Jesu wakakhombija kuti iyena ndi “simba ra Mwari” ngo kukwanisa kujamisa masimba anoitika ega pasi pano. Vonanyi mahwisanire aakaita no bepo guru rainga recidira pa ngozi upenyu hwo vajiji vake. (Verenganyi Marco 4:37-39.)
14 Vonanyi ciitiko ici: Kristu wakaremba ngo mushando wake waidikana kuitwa. Mavimbi ari kutaka ngarava, eciikupaijira kumwa no mafuro mukati mwayo. Asi, pikija no musindo wo bepo no kupfumwaijwa ko ngarava, Jesu ari kundoramba akavata. Iyena ari kuda kuzorora. Vajiji vake vari kuthya zve vari kumumusa vacimima kuti: “Tiponesenyi; topera.” (Mt. 8:25) Jesu womuka, wojamisa bepo no jombe ngo magama okuti: “Nyararai, thivai” bepo guru ronyarara. (Marco 4:39) Zvokadi kuti, Jesu ari kubvunja bepo no jombe kuti zvigajane perapo zvirambe zvakadaro. Muvio wakona? “Koita runyararo hukuru.” Hina, Jesu wakavonesa simba!
15. Mwari wo Masimba-ese wakakhombijisa kudini pacake kuti anokwanisa kuvonerera masimba anoitika ega o pasi pano?
15 Cinyuke co simba ra Kristu ndi Jehovha pacake, ngo iyo ndava tino mathangwe o kutenda kuti Mwari wo Masimba-ese ano simba ro kuvonerera masimba anoitika ega pasi pano. Vonanyi muezaniso munganani basi. Ndambi icito yaitika, Jehovha wakananga kudari: “Ngokuti sure ko njiku nomwe, ndinozonisa nvura pa nyika, pa makumarongomuna o njiku, usiku no masikati.” (Gn. 7:4) Mukufananavo, pana Exodo 14:21, tinoverenga kudari: “Na [Jehovha] wakazisa mbhepo huru yo kumabvazuva, . . . , no jombe rakafunduruka.” Zve pana Jona 1:4 panoti: “Asi [Jehovha] wakazisa dutu guru mu bahari, no mbhepo yakavanga, bzinoti piketi yaida kuguka.” Zvinovangisa maningi kuziva kuti Jehovha angakwanisa kuvonerera masimba akasiana-siana anoitika ega pasi pano. Zvakajeka kuti, kumbejiyo nyika yo pasi icazova mu nyara jakanaka.
16. Ngenyi zvinovangisa kuziva kuti Musiki wedu pomwe no Dangwe rake vano simba ro kuvonerera masimba anoitika ega pasi pano?
16 Zvinotivangisa kuvona simba rinoshamaisa ro Musiki wedo pomwe no ro “mujijisi wo mabasa” wake. Pavanonga vecivonerera kamare pasi pano mukati mo 1.000 co makore, vandhu vese vanozorarama mu kubvikirika. Ngozi jinoitika jega jinothyisa pasi pano, jinozova zviro zvokare. Akucazovi no thangwe ro kuthya kukhuvazwazve ngo madutu, tsunami (vimbi guru rinobahwa ngo mudhuma ngo pasi unoitika mu jombe), vulcões (kuputika ko matundhu) kana mudhuma ngo pasi mu nyika imbza. Kudakajisa kwakadini kwatinova nako tikarangarira ngo pamusoro po nguva jo kuti akucazovi no simba ro pasi pano rinouraya kana kukhuvaza, ngo kuti ‘tende ra Mwari [ricazova] pakati po vandhu’! (Ap. 21:3, 4, Baiberi Mazwi Akacena aMwari) Zvinotivangisa kuziva kuti simba ra Mwari rakavoneka kubvira mwa Kristu ricazovonerera masimba ese anoitika ega pasi pano mukati mo Ciuru co makore.
TEVEJERANYI MWARI NA KRISTU WARI
17. Ngo api amwe maitiro atingatevejera ndiwona Mwari na Kristu?
17 I zvokadi kuti, mukusiana na Jehovha pomwe na Jesu, itusu atikwasi kuimisa ngozi jinoitika jega, asi tino simba riri rese. Tinorishandisa kudini? Maitiro amwe ngo o kushandisa zviri pana Mazwi Akangwara 3:27 (Verenganyi.) Hama jedu pajinosongana no zvineso, itusu tingajitondhoja no kubesera kunyama, mu mazwiro, zve kumujimu. (Mazwi 17:17) Inga muezaniso, tingajibesera kuti jimusijirikezve pakupera ko ngozi jinoitika jega. Purutananyi magama o kubongesera akabhuiwa ngo imwe noni iyo yainga yakaphwanyihwa nyumba ngo bepo guru: “Ndiri kubongesera maningi ngo kuva mu sangano ra Jehovha, haiwa basi ngo ndava yo besero ro kunyama asi ngo beserovo ro kumujimu.” Zve vonanyi masoko akabhuiwa ngo imwe hambzaji icizivi kurovohwa, iyo yainga icizwa icina vetero zve icikazivi cokuita pasure po kuvona maphwanyihwe akaitwa nyumba yayo ngo bepo. Noyabva kuashira besero iyona yakananga kudari: “Azviverengeki! Andikwanisi kusanangura kamare zvandiri kuzwa . . . Ndabonga, Jehovha!” Tino mudakaro wo kuita divi ro ukama hunotaja zvinodiwa zvo umwe kuno umweni. Thangwe guru rinotiitisa kuti tibongesere ngo rokuti Jehovha na Jesu Kristu zvokadi kamare vanotaja vandhu va Mwari.
18. Zvicinyi zvinoshamaisa ngo pamusoro po zvaikwevejera Jesu kuti aite mushamaiso?
18 Mukati mo mushando wake, Jesu wakavonesa kuti iyena ndi “simba ra Mwari.” Asi zvicinyi zvaikwevejera Jesu? Atizivi kumbomuvona ecishandisa simba rake kuti ashamaise vamweni kana kujibesera pacake. Zvokadi, mushamaiso jakaita Jesu jaivonesa rudo hwaainga nahwo kuno mbhuri yo vandhu. Izvo ticazozvivona pa musoro unotevera.
[Pikica pa pejhi 9]
Patinopekeja nguva yedu vamweni, tinokhombija kuti itusu takajija ngo kukova ka Jesu (Vonanyi ndima yo 6)
[Pikica pa pejhi 12]
Zvicinyi zvinomushamaisa ngo pamusoro po mashandisire akaita Jesu simba ro kuita mushamaiso? (Vonanyi ndima yo 13, 14)