Iyena Waida Vandhu
“Ndaidakara no vandhu.”—MAZWI 8:31.
MWAIZOSANANGURA KUDINI?
Cicinyi cinokhombija kuti Jesu ano rudo hukuru no vandhu?
Njira yaakashandisa simba rake pasi pano, inotipekeja kudini gonda ngo pamusoro po nyika imbza?
Cishamaiso capi ca Jesu camuri kuvetera kuzovona ceciithwa?
1, 2. Ngo capi cimwe civoniso co rudo hukuru hwa Jesu kuno vandhu?
DANGWE ra Mwari rainga cikhombijiro co kutanga zve cicikapimiki co uzivi hwa Mwari. Jesu wakava muezaniso wokuezanisira, “mujijisi wo mabasa” ari padivi pa Baba wake. Ngatimborangarire basi mudakaro waainga nawo Baba wake pavainga vecinasirira “denga” zve pavaiimisa “maambo o nyika.” Asi, pikija eciemurira zviro izvi zvicina upenyu, Mwana wo dangwe wa Mwari ‘waidakara no vandhu.’ (Mazwi 8:22-31) Hina, kubvira kare acito avia pasi pano, Jesu waidakarira kana wainga no rudo no vandhu vese.
2 Mukufamba ko nguva, mukuvonesa kutendeseka, no rudo kuno Baba wake,zve rudo hwake hukuru kuno “vana vo vandhu,” Mwana wo Dangwe wa Mwari, no cido cese ‘wakajidereja’ woguma pa kuezana no vandhu. Iyena wakaita zvondhozvo “no kupa uhomi hwake kuti aponese vazinji.” (Fil. 2:5-8, Tradução do Novo Mundo; Mt. 20:28) Rudo hwakadini hwaainga nahwo kuno mbhuri yo vandhu! Jesu paainga ari pasi pano, Mwari wakamupa simba kuti aite mushamaiso jaivonesa kuti iyena waida kamare vandhu. Jesu wakakhombija mukhaindi wo zviro zvinoshamaisa zvicazoitika sambi-sambi pasi pano.
3. Zvicinyi zvatiri kuda kupopora wari uno?
3 Kuvia ka Jesu pasi pano kwakamuita kuti akwanise “kutokotesa masoko akanaka o Umambo hwa Mwari.” (Luka 4:43) Jesu waiziva kuti Umambo waizoshanda kuitira kucenesa zina ra Baba wake zve iwona waizopeja zvineso zvese zvo vandhu. Azvitikahamaji kuti zvakaita Jesu maaifamba ecicumaera zvakava cikhombijiro co rudo hwake kuno mbhuri yo vandhu. Ngenyi tinodikana kuzviziva? Ngo kuti zvatinojija zvinozoita kuti tithembe zve tive no vetero ngo pamusoro po kumbeji. Ngatende tipopore mushamaiso murongomuna ja Jesu.
‘SIMBA RAIITA KUTI AITE MUSHAMAISO YO KURAPA’
4. Sananguranyi zvakaitika apo Jesu paakasongana no mwanarume wainga no mapere.
4 Jesu wainga wakabatikana mu mushando wake wo pambhene, zve wainga ecitanga kucumaera mu ndima yo kuGarirea. Narii kondhoyo, Jesu wakaguma pa ndau imweni yaakavona zviro zvinoitisa pena. (Mc. 1:39, 40) Pamberi pake kamare painga no mwanarume wainga ecineseka ngo ndhendha yo mapere. Ecipa ucapupu ngo pamusoro po mawandire o mapere ayani, murapi Ruka wakasumura kuti mwanarume wiya wainga ‘no mapere mu muviri wake wese.’ (Luka 5:12, BMAA) “Naapo naavona Jesu wakawa pasi ngo hope yake wokumbira eciti: ‘Tenji kudari mecida mungandirapa.’” Mwanarumeo aacaikana-kana kuti Jesu wainga no simba rokumurapa, asi zvaaida kuziva ngo zvokuti: Jesu waidadi kamare kumurapa here? Jesu waizodavira kudini cikumbiro ici cinobaya mwoyo? Jesu wainga ecirangarirenyi paaisota mwanarume uwu wo kuti kangaije wainga aremajwa ngo mapere? Jesu waizoita inga vaFarisi, avo vaizarihwa ngo kushata mwoyo kuno vandhu vaitambujika ngo ndhendha here? Zvicinyi zvamaizoita?
5. Zvicinyi zvakakwevera Jesu kuti anange “ndinoda” pakurapa mwanarume wainga no mapere?
5 Zvinovoneka inga kuti mwanarume waingaya no mapere aazivi kudanijira kuti ’Ndakangora! Ndakangora!,’ inga zvainanga Mutemo wa Mosi. Jesu aazivi kuva no basa nazvo. Kusiapo, iyena wakasotesesa maningi zvido zvake. (Lv. 13:43-46) Atizvizivi zvicinyi zvainga mu murangariro wa Jesu asi tinoziva zvainga mu mwoyo mwake. Ecikwevehwa ngo unyasha Jesu wakaita cishamaiso. Wakatambanuja mukono wake, wopsasa uwo wainga no mapere zve no izwi rinovangisa zve ro unyasha, Jesu wakati: ’Ndinoda. Rapikai.” Pa “mukuvo wondhowo mapere akapera.” (Luka 5:13) Zvokadi kamare, simba ra Jehovha rainga riri pondhopo—haiwa basi kuti Kristu aite cishamaiso asi kuti Jesu akhombijevo kuti ano rudo hukuru no vandhu.—Luka 5:17.
6. Zvicinyi zvinonyanya kusisira pa mushamaiso jakaita Jesu, zve ijona jinokhombijenyi?
6 Simba ra Mwari rakaita kuti Jesu Kristu aite zvishamaiso zvinokahamaja zvakasiana-siana. Iyena wakarapa, haiwa basi uwo wainga ano mapere, asi mushovo wese wo ndhendha no kuremara kwainga no vandhu. Mazwi akafemehwa anotibvunja kudari: “Vese vaikahamara ngo kuvona kuti mbeveve jaivereketa, bzirema bzairapika, vokuthobinya vaifamba, mapofu aivona.” (Mt. 15:31) Kuti aite mushamaiso iji Jesu aacaishandisa zvirewa kana mativi o muviri o mundhu umweni. Iyena wairapa zvirewa kana mativi o muviri o mundhu aingaya akaremara kamare! Zve iyena wairapa vandhu ciripo-ripoco, nguva jimweni waitozviita ari ngo ndhambo. (Johani 4:46-54) Muezaniso iji jinoshamaisa jinotikhombijenyi? Jinotikhombija kuti Jesu, inga Mambo wakagajwa mugore, aana basi simba ro kurapa asi ano cido co kupeja ndhenda mbhera narini. Kujija ngo pamusoro po matajire akaita Jesu vandhu zvinotithembesa kuti mu nyika imbza, ciphorofita ici co mu Bhaibheri cinozokwanirisika, cokuti: “Anoitira unyaxa murembi no mutami, anoponesa varombo.” (Ndu. 72:13) Hina, Jesu anozoita cido co mwoyo wake kuitira kubesera vese vari kutambujika.
‘MUKAI, UTORE BONDE RAKO UFAMBE’
7, 8. Sananguranyi ciitiko cakaitisa kuti Jesu asongane no mwanarume wainga wakaoma muviri pa gandhwa ro Bhezata.
7 Pakapera mweji munganani Jesu naasongana no mwanarume wainga no mapere mu Garireia. Paakabva ku Garireia wakaita hwendo kwenda ku Judhia, koocumaera masoko akanaka o Umambo hwa Mwari. Vandhu wakazwa masoko ake no kuvona zviito zvake, waikwana kuita mazana. Zvakajeka kuti iyena waida kutokotesa masoko akanaka kuno varombo, kuzivisa rusujunuko kuno vakasungwa no kurapa vaya vano mwoyo inohwajihwa.—Is. 61:1, 2; Luka 4:18-21.
8 Wakazoguma mweji wa Nisani. Mukuzwira mupango wa Baba wake, Jesu wakaita hwendo kwenda ku Jerusarema ku Phasika. Mu Jerusarema vandhu vainga vakabatikana ngo mabasa akasiana-siana, vamweni pavainga vecivia ku mabuso aya akacena. Ngo kanjikazi ko temberi kwainga na gandhwa raidanijwa Bhezata, pondhopo painga no mwanarume waihwaja.
9, 10. (a) Icinyi caikwevera vandhu vaende mu gandhuwa ro Bhezata? (b) Zvicinyi zvakaita Jesu pa gandhwa ro Bhezata, zve zvondhozvo zvinotijijisenyi? (Vonanyi pikica yo kutanga.)
9 Zvinovoneka kuti mbungano huru yo vandhu vanohwaja pomwe no vanoneseka vaiungana pa Bhezata. Zvicinyi zvaivakwevera pa ndau iyi? Ngo thwangwe rimweni ricikazivi kusananguhwa ivona vaitenda kuti mundhu anohwaja paainghwina mu gandhwa riana kumwa yecibvunduka-bvunduka, ngo maitiro anoshamaisa iyena wairapika. Amborangariranyi mazwiro ovainga pondhopo! Atikani-kani kuti kutama vetero, kuthimwa-thimwa pomwe no mazwiro okutama kuvazve nane, ndiwona mazwiro o vainga nawo. Asi zvicinyi zvakaita kuti Jesu, mundhu wakakwana, acina cineso ciri cese mu muviri, agumepo? Ngo pena yainga nayo, Jesu wakakhwederera mwanarume wainga ecihwaja pa nguva yakawanda Jesu acito abahwa pasi pano.—Verenganyi Johani 5:5-9.
10 Mungakwanisa kurangarira kutama vetero kwaivoneka mu meso mo mwanarume waihwararo, Jesu paakabvunjisa kuti dangani waida kuvanga? Iyena wakapingura ciripo-ciripoco. Mwanarume uwu waida kurapwa asi aacaizviziva kuti waizoitisa kudini, ngo kuti akucainga no mundhu waimubeseravo kuti anghwine mu gwandhwa riana. Perepo Jesu wakamubvunja kuti aite zvaacaikwanisa kuita—kubata bonde rake afambe. Ecizwira zvakananga Jesu, mwanarume wakabata bonde rake wotanga kufamba. Civoniso cakadini ngo pamusoro pozvinozoita Jesu mu nyika imbza! Pa mushamaiso uwu, tinokwanisazve kuvona unyasha hwa Jesu. Iyena wakapsaka wiya waida besero kamare. Muezaniso wa Jesu unodikana kutivangisa kuti tirambe tecipsaka vandhu, mu ndima yedu, vanohwajihwa ngo ndava yo zviro zvinozizimusa zviri kuitika mu nyika ino.
‘NDIANI WAPSASA NGUVO JANGU?’
11. Pana Marco 5:25-34 panogogomejera kudini unyasha hwa Jesu kuno vayani vanotambujika ngo ndhendha?
11 Verenganyi Marco 5:25-34. Mwanakaji wakararama 12 o makore ecinyoejeka. Ndhendha yake yaipsasa mativi ese o mu upenyu hwake, kubatanija kunamata kwake. Pikija “wakatambujika ruzinji mu nyara mo varapi vazinji, wopeja bzese bzaainga nabzo,” ndhendha iyana yakanyanya. Asi, pa njiku imweni, wakapsaka zano rimweni. Iyena wakaenda koogara phedo no mwanarume umweni waidanijwa Jesu. Iyena wakanghwina pakati po mbungano perepo wopsasa nguvo ya Jesu.” (Lv. 15:19, 25) Jesu wakaziva kuti simba rake rainga rabuda mwaari, ngo kudaro iyena wakabvunjisa kuti ndiani wainga wamupsasa. “Ecitetemera ngo kuthya” mwanakaji uwu “wakasedera wogwadama panyasi pake, wonanga bzese.” Naaziva kuti, vainga baba vake, Jehovha, vainga varapa mwanakaji wiana, Jesu wakamukhombijira kunaka mwoyo, womubvunja kudari: “Mwana, kutenda kwako kwakuponesa. Endai ngo kunyarara. Rapikai ndhenda yako.”
12. (a) Mukucijikira mu zvatajija mbhera patiri wari, zvicinyi zvomwaizonanga ngo pamusoro pa Jesu? (b) Muezaniso wapi wakagaja Jesu kwatiri?
12 Kunaka mwoyo kwakakura zvakadini kwa Jesu! Tinokwanisa kuvona kuti iyena anokhombijira rudo hunobva mu mwoyo kuno vaya vanotambujika ngo kuhwaja. Sathana anoda kutikhohwesa kuti itusu atidiki zve atisisiri. Ngo mushamaiso jake, Jesu wakajekesa pambhene kuti iyena anotitaja zve anoneseka ngo pamusoro po zvineso zvedu. Iyena ndi Mambo no Mupiri Mukuru wakanaka! (Heb. 4:15) Azvicaizova zvakareruka kwatiri kuzwisisa mazwiro o vaya vanotambujika ngo zviyayo, maningi-ningi kudari ticikazivi kumbova naco. Tinodikana kuceuja kuti Jesu wakazwira pena vayani vainga vecihwaja pikija iyena aazivi kumbohwaja. Muezaniso wa Jesu ucatikwevera kuti tiitevo zvondhozvo, mbhera panoperera simba redu.—1 Ped. 3:8.
“JESU WAKACEMA”
13. Kumuswa kwa Razaro kunotikhombijenyi ngo pamusoro po undhu hwa Jesu?
13 Mwoyo wa Jesu waineseka ngo kuhwajihwa ko vamweni. Ngo kuhwajihwa ngo mazwiro o vamweni ngo pamusoro po rufu wo shamwari yake Razaro, Jesu [“wakagomera”, NM] zve “wocamwa.” Iyena wakava no mazwiro ondhowo, pikija ecitoziva kuti ngo kukasika iyena waizohwirija Razaro ku upenyu. (Verenganyi Johani 11:33-36.) Jesu aazivi kuva no nyoa jo kukhombija mazwiro ake. Vaingepo waro wakakwanisa kuvona kuti Jesu waihwajihwa ngo ndava ya Razaro zve waizwira urombo mbhuri yake. Unyasha hwakadini hwaakakhombija Jesu ecishandisa simba raakapuwa ndi Mwari kuti amuse shamwari yake!—Johani 11:43, 44
14, 15. (a) Zvicinyi zvinokhombija kuti Jehovha ano cido cakavanga co kusujunura vandhu vese mu kutambujika? (b) Ngenyi mazwi okuti “makuva anoceukijwa” anodikana?
14 Bhaibheri rinonangira kuva “civoniso cinovoneka co [Musiki.]” (Heb. 1:3) Ngo kudaro, ngo mushamaiso jake, Jesu wakakhombija kuti Baba wake vano cido co kupeja kuhwajihwa kunoviiswa ngo ndhendha no rufu. Cido cavo acizivi kuperera pavakamusa vashoma vakatahwaya mu Bhaibheri. Jesu wakananga kudari: ‘Mucakahamara nga izvi, ngo kuti inozoguma nguva yokuti vaya vari mu makuva anoceukijwa vanozozwa izwi rake vobuda.’—Johani 5:28, 29, NM.
15 Mazwi akashandisa Jesu okuti “makuva anoceukijwa,” akafanera, ngo kuti kuceukija kwa Mwari kunobatanijwa. Mwari wo Masimba-ese, Uwo wakasika denderejwa rese ro nyika, angaceukija zvimuthyandhya-muthyandhya zvese zvo vadiwa vedu vakafaya, kubatanija mugariro javo jo cibarihwe pomwe no mavonekero avo. (Is. 40:26) Azvidi kureva kuti iyena anokwanisa basi kuceukija, asi iyena no Mwana wake vanodavo kuzviita. Kumuswa kwa Razaro no ko vamweni vakatahwa mu Bhabheri kunovonesa zvicazvoitika mu nyika imbza.
MUSHAMAISO JA JESU NA IMWIMWI
16. MaKristu o mu nguva ino anoramba akagondeka, anozova no cidakajiso capi?
16 Kudari tikaramba takagondeka inga maKristu, tingazovona ngo meso edu cishamaiso cikuru cicikazivi kumboitikazve—co kupokonyohwa pa dambujiko guru. Hondo yo Armagedhoni ikandopera, mushamaiso muzinji jicazoitika, jeciita kuti vandhu vave no uhomi hwakanaka. (Is. 33:24; 35:5, 6; Ap. 21:4) Rangariranyi basi, kuvona vandhu vecisia kushandisa magirazi, mucongotero, mureta, zvikarinya, zvinobesera kuzwa, no zvimweni zvakadaro. Ngo thangwe rakanaka, Jehovha anozopa uhomi hwakanaka kuno vanopokonyoka pa Armagedhoni. Ivona vanozova no basa rokuita. Vangazokwanisa kuenderera mberi no mudakaro, mukuita kuti nyika yedu, iyo iri cipo cinobva kuna Mwari, ive Paradhiso.—Ndu. 115:16.
17, 18. (a) Cidisiso cikuru co mushamaiso ja Jesu cainga cenyi? (b) Ngenyi imwimwi munodikana kuvangisira kuti munghwine mu nyika imbza?
17 Kurapa kwakaita Jesu, kunovangisa mbhungano huru nyamasi uno, zveciengejera mudakaro wavo wo kuzorapwa ku ndhendha jese. (Ap. 7:9) Kurapa kondhoko kunokhombija mazwiro o mukati a Jesu, zve kunokhombijazve kuti Dangwe ra Mwari rino rudo hwakadini no vandhu vese. (Johani 10:11; 15:12, 13) Unyasha hwa Jesu i muezaniso unotibaya mwoyo wokuti Jehovha anobatikana ngo umwe no umwe wo vashandiri vake.—Johani 5:19.
18 Vandhu vari kugomera, kuhwajihwa maningi, zve kufa. (Rom. 8:22) Tiri kuda nyika imbza ya Mwari, iyo inozova no kurapwa ko kunyama, kwakagondiswa ndiena. Pana Malakia 3:20 panotipa thangwe ro kuti tithembe kuti vokurapwa ‘vanozophuka inga maburu akanuna,’ ngo kunyaukihwa no kudakajihwa ngo ndava yo kusujunuhwa kubva ku kutama kukwana. Kubongesera kwedu kuna Mwari kunobva mu mwoyo kwakabatana no gonda rakakura ngo pamusoro po zvigondiso zvake ngakutikwevere kuti tiite zvese zvatinokwanisa kuti tive vanokwanirisa kunghwina mu nyika imbza. Zvinovangisa kuziva kuti mushamaiso jakaita Jesu paainga ari pasi pano, jinovonesa kusujunuhwa ko kwenda no kwenda kunozova no vandhu sambi-sambi pasi po utongi hwo Umesia.