“Engejeranyi Kutenda Kwedu”

‘Ndibeserenyi pandinoda rutendo’!​—MARCO 9:24.

NDUMBO: 81, 135

MAIZODAVIRISA KUDINI?

Ngenyi kuvangisa gonda redu kunosisira?

Mudanyu japi jatingaita kuitira kuvaka gonda?

Tingakhombijisa kudini kuti tino gonda rakavanga?

1. Gonda rinosisira zvakadini? (Vonanyi pikija yokutanga.)

MAKAMBOJIBVUNJISA kudari:, ‘Ndiri mushovo wo mundhu wo kuti Jehovha anozoda kuponesa pakati po dambujiko guru zve kunghwinisa mu nyika imbza here? Zvokadi kamare, kupokonyoka kunobatanija zviro zvizinji, asi kuno ciro cimwe cinosisira maningi cinodiwa cakagogomejehwa ndi mupostori Pauro cokuti: “Pacina rutendo, apana anodakarisa Mwari.” (Heb. 11:6) Izvi zvingava zvinozivika ngo vazinji, asi cokwadi ngo cokuti “andivopi vese vanotenda.” (2 Tes. 3:2) Tsamba iji jinotibesera kuzwisisa kusisira ko kusakurira gonda rakavanga.

2, 3. (a) Ngo capi catinojija kubva kuna Pedhuru ngo pamusoro po kusisira ko gonda? (b) Mubvunjo japi jatiri kuda kuvona?

² Mupostori Pedhuru wakagogomejeravo maningi kusisira ko rutendo, paakananga ngo pamusoro po kuva no “kutenda  . . . kokadi” “kunozopuwa goja no simba no rureremejo, ngari yo kujivonesa kwa Jesu Kristu.” (Verenganyi 1 Pedru 1:7.) Zvecivoneka kuti dambujiko guru riri kukhwedera, itusu tinoda kuva no cokwadi cokuti tiri umwe wa vayani vano mushovo wo gonda rinozosimbhwa ndi Mambo wedu mukuru paanoviya. Zvokadi kamare, itusu tinoda kuva “mufumbo wa vaya vakavanga pa rutendo hunozotiponesa.” (Heb. 10:39) Ngo kuva no cido ici, itusu tingatodeketera inga mwanarume wakanangaya kudari: “Ndibeserenyi pandinoda rutendo!” (Mc. 9:24) Inga vapostori va Jesu kangaije tingatoguma pa kunanga kudari: “Engejeranyi Kutenda Kwedu.”​—Luka 17:5.

³ Kuda kuva no gonda rakavanga kunotitora kuti tive no mubvunjo munganani. Tingarivakisa kudini? Tingavonesa kudini kuti tino gonda? Cicinyi cinotigondesa kuti mukumbiro jedu kuitira kuengejehwa gonda, jinozodavihwa?

KUVAKA GONDA RINODAKAJISA MWARI

4. Muezaniso japi jingatiita kuti tivangise gonda redu?

⁴ Zvecivoneka kuti “Bzese bzakatahwa kare bzakatahwa kuti tijije, kuti tivetere,” itusu tingakwanisa kujija kubva ku muezaniso jakawanda jo gonda jinowanika mu Bhaibheri. (Rom. 15:4) Patinoverenga ngo pamusoro po vandhu vakadari inga Abhirahama, Sara, Izaki, Jakobe, Mosi, Gidhioni, Bharaki, pomwe no vazinji vamweni, muezaniso javo jingatiita kuti tipopore gonda redu. (Heb. 11:32-35) Mu kuengejera, patinoverenga zviitiko zvo mazuva ano zvinobhuya ngo hama no hambzaji jedu jinovonesa kuva no gonda rinoshamaisa, izvi zvinotindundiravo kuti tishande ngo simba kuitira kuvangisa gonda.a

5. Erija wakakhombijisa kudini kuti gonda rake kuna Jehovha, rainga rakavanga, zve muezaniso wake unotiita kuti tirangarire kudini?

⁵ Umwe muezaniso uri mu Bhaibheri, ngo wo mu muphorofeti Erija. Amborangariranyi ngo pamusoro po zviitiko zvinotevera, zvinokhombija kuthemba kwakaperera kwaainga nako kuna Jehovha. Paakazivisa Mambo Akhabi cido ca Jehovha cokuda kuviisa cikava, Erija wakavereketa no kuthemba kwese eciti: “Ngo kupona ka [Jehovha] . . . akuzovi no veto nokuti nvura, mbhera inini ndinange!” (1 Maj. 17:1) Erija wakathemba kuti Jehovha waizosapota iyena no vamweni mukati mo cikava. (1 Maj. 17:4, 5, 13, 14) Iyena wakavonesa kuthemba kwake kuti Jehovha waizokwanisa kumusa mwana umweni wainga akafa. (1 Maj. 17:21) Iyena aazivi kukana-kana kuti Jehovha waizoviisa muriro kuitira kupisa cipiriso cake, pa Dundhu Karmero. (1 Maj. 18:24, 37) Nguva yo kuti Jehovha apeje cikava payakaguma, kucito kwatova no ciri cese caivonesa kuti nvura yaida kuna, Erija wakabvunja Akhabi: “[Mukanyi], ihanyi no kumwa, ngokuti ndiri kuzwa caungu co nvura.” (1 Maj. 18:41) Zviitiko izvi, azvitiitisi kuti tijipopore pacedu kuitira kuvona kuti gonda redu rakavanga here kana kuti haiwa?

ZVICINYI ZVATINGAITA KUITIRA KUVAKA GONDA?

6. Ngo zvapi zvatingakumbira kuna Jehovha kuitira kuvaka gonda?

⁶ Itusu atingakwanisi kuvaka gonda ngo simba redu basi. Gonda i divi ro mucero wo mujimu mucena wa Mwari. (Gal. 5:22) Ngo kudaro, ngo zvo ungwaru kwatiri kutevera mbhangiro ya Jesu yo kuita mukumbiro kuitira kupuwa mujimu wondhowo, ngo kuti iyena wakatigondisa kuti Baba ‘vanozopa mujimu mucena kwa vaya vanoukumbira kovari.’​—Luka 11:13.

7. Ipanyi muezaniso wokuti tingaitisa kudini kuti tirambe tino gonda rakavanga.

⁷ Zvecivoneka kuti taano gonda, tinodikana kuramba tecirihisa. Gonda redu rakadari inga muriro wo huni. Paunotanga kubwaka, ungabhubhuma. Asi, pakatama kuitwa ciri cese, murazvu wiana unonjaka wova masimbe, zve ukasiiwa kudaro, unozotogumisira pa kuva marota akatondhora. Asi, kudari muriro wiana ukaramba weciengejehwa huni, unondoramba uripo. Mukufananavo gonda redu rinozoramba rakavanga kudari rikahiswa nguva jese ngo Soko ra Mwari. Ngo kuenderera mberi tecijija Bhaibheri, itusu tinozoramba teciengejeravo rudo hwedu kwariri no kuno Munewaro, zve zvondhozvo zvinozova cicijikiro kuitira kuengejera gonda redu.

8. Ngo zvapi zvingatibesera kuvaka gonda zve toramba tinaro?

⁸ Zvicinyi zvamungaitazve kuti muvake gonda rakavanga zve murambe munaro? Mucadakara basi ngo kuva no zivo yomwakawana kuti muzogume pa kubhabhatijwa. (Heb. 6:1, 2) Sotesesanyi zviphorofita zvo mu Bhaibheri zvakakwanirisika ngo kuti izvona zvinozomupa mathangwe akavanga kuti muve no gonda. Mungashandisazve Soko ra Mwari inga mupimo, kuti mupime gonda renyu, murivone kuti rino zvinovetehwa kuno vayani vano gonda rakavanga here.​—Verenganyi Jakobo 1:25; 2:24, 26.

9, 10. Zviro izvi zvinobesera kudini kuitira kuvaka gonda: (a) ushamwari hwakanaka? (b) musongano jo ungano? (c) basa ro mu munda?

⁹ Mupostori Pauro wakabvunja vatendi doni kuti ivona vaizokwanisa ‘kuvangisana ngo ndava yo kutenda.’ (Rom. 1:12) Patinosonganirana no vatendi doni, tinokwanisa kuvaka rutendo hwo umwe kuno umweni, maningi-ningi patinonga tina vaya vakavonesa kuva no ‘rutendo hwakaejwa.’ (Jak. 1:3) Ushamwari hwakashata hunophwanya gonda, asi ushamwari hwakanaka hunorivaka. (1 Kor. 15:33) Ngo iyo ndava tinopuwa mbhangiro yokuti atidikani kutama “kuenda ku musongano wedu.” (Verenganyi Vaheberi 10:24, 25.) Thangwe rimweni ngo rokuti zvinojijwa pa musonganopo basi, zvinopa ndhungamiro jinovaka gonda redu. Izvi zvinozwirana no zvakananga Pauro kuti: ‘Gonda rinovia ngo kuzwa.’ (Rom. 10:17, Baiberi Mazwi Akacena aMwari) Kuva pamwepo pa musongano jo ciKristu i ciro ciri kutora rutivi mu upenyu nguva jese here?

¹⁰ Patinotora rutivi mu basa ro mu munda, ativaki gonda ro vamweni basi, asi gonda redu rinoengejerekavo. Mukufanana no maKristu okutanga, tinojijira kugonda Jehovha zvakakwana, no kuvereketa no cicunge pa mugariro uri wese.​—Mait. 4:17-20; 13:46.

11. Ngenyi Karebhi na Joshuwa vainga no gonda rakavanga, zve itusuvo tingaezanavo kudini naivona?

¹¹ Patinovona mabesere anotiita Jehovha mu upenyu hwedu zve madavirire aanoita mukumbiro jedu, gonda redu rinoengejeka. Ngo zvakaitika kuna Joshuwa na Karebhi. I zvokadi kuti, ivona vakavonesa kuva no gonda kuna Jehovha pavakaenda koofeya Nyika yo Cipikihwa. Asi pasure pa izvi, pavakavona ndhungamiro ya Jehovha mu upenyu hwavo pacavo, gonda ravo rakaengejekazve maningi. Ngo iyo ndava, azvitikahamaji kuzwa kuti Joshuwa wakabvunja vaIziraeri no kukhohwa kwese, kudari: “Bzigondiso bzese bzaakamuitira [Jehovha] Mwari wenyu, bzakatevejwa bzese; apana cakaposa.” Perepo, iyena wakaengejera eciti: “Ndibzo bzino ithyanyi [Jehovha], no kumuxandira ngo mwoyo yese no ngo bzokadi . . . Inini no mbhuri yangu, tinozoxandira [Jehovha].” (Jox. 23:14; 24:14, 15) Itusu tingakwanisavo kukurisa kuthemba kwakadaro, patinovona unaki hwa Jehovha.​—Ndu. 34:8.

KUKHOMBIJA GONDA REDU

12. Ngo pamusoro po gonda, ngo zvapi zvinodiwa zvakananga Jakobe?

¹² Tinokhombijisa kudini kuti tino gonda rakavanga? Mujiji Jakobe wakadavira mubvunjo uwu ngo magama aya: “Ngo zviito zvangu ndinozokutatija rutendo hwangu.” (Jak. 2:18) Zviito zvedu zvicazokhombija kuti itusu tino gonda rokadi kamare. Ngatende tivone muezaniso munganani.

13. Basa ro kucumaera rinokhombijira gonda redu ngo maitiro api?

¹³ Njira imweni yakanaka maningi yo kukhombija gonda redu, ngo yo kutora rutivi mu basa ro kucumaera. Ngenyi tecidaro? Kuita basa iri kunoda kuti tive no gonda ro kuti Mwari wakatema nguva kuitira kupeja mugariro uno wo zviro, tecithemba kuti ‘aidononoki!’ (Hab. 2:3) Njira imweni yatingashandisa kuti tipime gonda redu ngo yo kusota makurire o cido cedu co kujipira mu basa ro kucumaera. Tiri kuita zvese zvatinokwanisa, kangaije ngo kupsaka mukana jo kuengejera mu kutora rutivi mu basa ro kucemaera here? (2 Kor. 13:5) Hina, ‘kutokotesa . . . ruponeso’ i njira yakavanga maningi yo kukhombija kuti tino gonda mu mwoyo mwedu.​—Verenganyi VaRoma 10:10.

14, 15. (a) Tingakhombijisa kudini gonda redu mu upenyu hwedu wo njiku ngo njiku? (b) Verenganyi zvakaitika zvinopa muezaniso wo kushanda ko gonda rakavanga.

¹⁴ Itusu tinokhombijavo gonda redu patinosotana no zvineso zvo njiku ngo njiku. Ingava ndhendha, kungava kuvora mwoyo, kuneseka ngo murangariro, urombo, kana cineso cimweni haco, itusu tinothemba kuti Jehovha no Mwana wake ‘vanozotibesera pa ngari yo kudikana.’ (Heb. 4:16) Tinokhombija kuthemba kondhoko ngo kuita mukumbiro ucikapereri basi pa kukumbira zvinodiwa zvedu zvo kumujimu. Jesu wakananga kuti tingakumbiravo zviro zvo kunyama, zvinobatanija “kuha ko njiku jese.” (Luka 11:3) Zviri mu Bhaibheri zvinotithembesa kuti Jehovha angatipa zvinodiwa zvedu zvo kunyama. Mukati mo nguva yo cikava cikuru cakaitika mu Iziraeri, Jehovha wakapekeja Erija zvokuha no kumwa. Jehovha wakaita kuti “magunguvo aviise mukate co magwanani, no nyama co madeko, naye waimwa kumwa yo murambo.” (1 Maj. 17:3-6) Tinogonda kuti Jehovha angashandisa magariro ari ese kuti tiwane zvinodiwa zvedu.

¹⁵ Tinothemba kuti kushandisa zviambi zvo Bhaibheri, kungatibesera kuti tiwane zvokuha. Rebheka, imwe hambzaji yakarovohwa yo ku Azia, yakazvivonera pa mbhuri payo kamare kuti izvi zvinoitikadi kamare. Ivona vakashandisa Mateu 6:33 zve Mazwi Akangwara 10:4 mu upenyu hwavo ngo kudira zviro zvo Umambo pakutanga zve ngo kuva vandhu vanoshanda ngo simba. Rabeka wakananga pa bvaza imweni mwamuna wake wakavona mugariro wo basa rake pomwe no nguva yoraimutorera zvaivasiya vari pa ngozi kumujimu, wakaregera basa riana. Asi, ivona vainga no vana varongomuna kuti vasapote. Rabeka wakananga zvakaitika: “Takatanga kuita masuiti, tecitengesa. Mukati mo makore o takapeja tecirarama kudaro, takavona kuti Jehovha aazivi kumbotisiya. Narini hako atizivi kumbotama zvokuha.” Imwimwi muri kukwanisavo kukhombija kuti munothemba kuti Bhaibheri rino ndhungamiriro yakanaka maningi kupinda jese kuitira vandhu nyamasi uno here?

16. Ngo wapi unozova muviyo wokugumisira kudari tikathemba Mwari?

¹⁶ Narini hako itusu atidikani kukana-kana kuteverera ndhungamiro ja Mwari, jinozoviisa kugarisika kwakanaka kwatiri. Pauro, ecihwirijira magama akafemehwa a Habhakuki, wakatara kudari: “Wakarurama anozopona ngo kutenda kwake.” (Gal. 3:11; Hab. 2:4) Ngo kudaro, zvinosisira maningi kugonda Wiana, wokuti zvokadi kamare anokwanisa kutibesera. Pauro wakaticeukijira kuti Mwari, “ana simba ro kuita bzese motiri, kucina mugano no kupindirija mukumbiro no murangariro yedu.” (Ef. 3:20) Vashandiri va Jehovha vanoita zvese zvavanokwanisa kuitira kuita kuda ka Mwari, asi veciziva panoperera simba ravo, ivona vanosota Jehovha kuti akomborere muviyo wo kuvangisira kwavo. Atidakajihwi here ngo kuziva kuti Mwari wedu ana itusu?

CIKUMBIRO KUITIRA GONDA CAKAPINGUHWA

17. (a) Mukumbiro wo vapostori kuitira gonda, wakapinguriswa kudini? (b) Ngenyi tingaveteravo kuti mukumbiro wedu kuitira kuengejehwa gonda unozopinguhwa?

¹⁷ Pasure po zvese zvatazwari, itusu tingava no mazwiro akadari inga akava no vapostori pavakabvunja Tenji, kudari: “Engejeranyi kutenda kwedu.” (Luka 17:5) Zvavakakumbira zvakadavihwa, maningi-ningi pa pentekoste ya 33 N.V.Y. pavakadururihwa mujimu mucena zve ivona vowana zwisiso yakajika ngo pamusoro po cidisiso ca Mwari. Izvi zvakavangisa gonda ravo. Inga muviyo, ivona vakatanga fafanya yo kucumaera huru maningi, yo mu nguva yondhoyo. (Kol. 1:23) Tingavavo no gwinyiso rokuti mukumbiro jedu kuitira kuengejehwa gonda jinozopinguhwa here? Bhaibheri rinotigondesa kuti tinokwanisa apo ‘tikamukumbira ciro, ngo kuteveja kuda ka [Mwari].’​—1 Jo. 5:14.

18. Jehovha anokomboresa kudini vayani vanosakurira gonda?

¹⁸ Zvakajeka kuti, Jehovha anodakajihwa ngo vaya vanomuthemba zvakaperera. Jehovha anozopinguravo mukumbiro jedu kuitira kuengejehwa gonda, zve gonda redu rinozokura maningi, rotitungamirira ‘kuti tifanere Umambo hwa Mwari.’​—2 Tes. 1:3, 5.

[Masoko o pasi]

[Pikica pa pejhi 20]

Vayani vanojipira kamare mu mushando vari kukhombija kuvanga ko gonda ravo (Vonanyi ndima 13)

[Pikica pa pejhi 21]

Tinovonesa gonda patinosongana no zvineso mu njiku jo upenyu hwedu (Vonanyi ndima 14)