Rutendo​—Mugariro Unotipa Simba

RUTENDO unotipa maningi simba. Inga muezaniso, pikija Sathana anoda kupeja ushamwari hwedu na Jehovha, rutendo unokwanisa “kujima . . . mupaxa yese yakabwaka ya Sathana.” (VaEfeso 6:16) Ngo rutendo, tinokwanisa kunyisa zvineso zvakadari inga dundhu. Jesu wakavhunja vajiji vake kuti: “Bzokadi ndinomubvunja kuti mukava no kutenda kudoko kudari inga mbhumba yo “mostarda”, maizobvunja dunthu iri kuti: Ibvai apa, uende iyo, irona raizoenda.” (Mateu 17:20) Zvecivoneka kuti rutendo unoita kuti ushamwari hwedu na Jehovha uvange, tingazvivhunjisa kudari: Rutendo icinyi? Rutendo unopsasiswa kudini ngo zviri mukati mo mwoyo wedu? Tingavangisa kudini rutendo hwedu? Zve tinodikana kuva no rutendo kuna ani?—VaRoma 4:3.

RUTENDO ICINYI?

Rutendo unopinda kukhohwa basi zvinonangwa ngo Bhaibheri, pikija no ‘madhimoni anotendavo [kuti Mwari ariyo] no kuthya.’ (Jakobo 2:19) Waro, rutendo icinyi?

Bhaibheri rinodurujira rutendo ngo njira mbiri. Njira yokutanga, “Rutendo ndihwona hwokadi hwokuti tino bziro bzo tinovetera.” (Vaheberi 11:1) Kudari muno rutendo, munova no cokwadi cokuti zvese zvakanangwa ndi Jehovha zvinozova zvokadi zve zvinokwanirisika. Inga muezaniso, Jehovha wakavhunja Vaiziraeri kuti: “Ukakona kugura citenderano cangu no masikati no citenderano no usiku, kuti kucazova no masikati no usiku mu mukuvo wakaimisihwa, cinozoguhwavo citenderano cangu na Davidi, muranda wangu.” (Jeremia 33:20, 21) Muri kuthya kuti njiku iriyese akuzovi no zuva kudenga zve akuzovizve no masikati no usiku here? Haiwa. Kudari muno cokwadi cokuti zuva rinozoenderera mberi recibwaka zve recibuda njiku jese, kureva kuti mungazokana-kana kuti Musiki wo zviro zvese anozokwanirisa zvigondiso zvake here? Na kamwe amuzokani-kani!—Isaia 55:10, 11; Mateu 5:18.

Njira yo cipiri, rutendo “ndihwona maitiro o kuvonesa bziro bzicikavoneki.” Bhaibheri rinonanga kuti rutendo i “maitiro o kuvonesa” kana kuva no mathangwe anotikhohwesa kuti cakati cinoitika pikija atiripi kucivona. (Vaheberi 11:1) Kuitisa kudini? Ngatiti mwana wamuvhunjisa kuti: ‘Munozvizivisa kudini kuti mbhepo iriyo?’ Pikija mucito mavona mbhepo, maizobhuya no mwana wiya ngo pamusoro po zviro zvinovonesa kuti mbhepo iriyo, inga muezaniso, zvainoita mbhepo, kufema no zvimweni zvakadaro. Kudari muezaniso wamapa mwana wiya wamukhohwesa, iyena anozozwisisa kuti zvinokwanisika kutenda ciro caticikakwanisi kuvona. Mukuezanavo, rutendo unodikana kucijikira pa zviro zvokadi.—VaRoma 1:20.

KUTI TIVE NO RUTENDO, TINODIKANA KUREREMEJA COKWADI

Zvecivoneka kuti rutendo unodikana kucijikira pa zviro zvokadi, mundhu kuti ave no rutendo, cokutanga anodikana “kuziva bzokadi.” (1 Timoti 2:4) Asi azviimiri pondhopo. Mupostori Pauro wakatara kuti: “Ngo mwoyo . . . unotenda.” (VaRoma 10:10) Mundhu aangatendi basi cokwadi, asi anodikanavo kucireremeja. Ngokudaro anozokwanisa kukhombija rutendo, izvi zvinoreva kuti, kupona mu kuzwirana no zvinodakaja Mwari. (Jakobo 2:20) Mundhu acikabongeseri zvecivha pasi po mwoyo ngo cokwadi caakawana, angaramba zvakacijikira pa zviro zvokadi ngokuti anoramba kucinja zvitendwa zvake kana anoda kuita mukuzwirana no zvaanoda. (2 Pedru 3:3, 4; Juda 1:18) Ndizvona zvakaitika mu nguva jo Bhaibheri. Asipi vese vaivona mushamaiso vaiva no rutendo. (Bziverengo 14:11; Johani 12:37) Mujimu mucena wa Mwari unopa rutendo kwa vaya vanoda cokwadi.—VaGalàsia 5:22; 2 VaTesalònika 2:10, 11.

ZVICINYI ZVAKABESERA DHAVHIDHI KUTI AVE NO RUTENDO WAKAVANGA?

Pakati po vese vainga no rutendo wakavanga, Mambo Dhavhidhi vaingepovo. (Vaheberi 11:32, 33) Izvi azvirevi kuti mbhuri yese ya Dhavhidhi yainga no rutendo inga ndiyena. Inga muezaniso, pa vhaza imweni nevanji va Dhavhidhi, Eriyabhi wakakhombija kutama kuva no rutendo, pavakanyangajwa ngo kuvona Dhavhidhi kuti waida kuhwisana na Goriyati. (1 Samueli 17:26-28) Akuna anobahwa no rutendo zve asipi ciro cokuti vabari vangapekeja mwana wavo. Asi rutendo wa Dhavhidhi wakava muviyo wo ushamwari waainga nawo na Mwari.

Pa Nduyo 27, Dhavhidhi wakananga cakamuitisa kuti ave no rutendo wakavanga kudaro. (Vhesi 1) Dhavhidhi wairangarijisisa zviro zvakamuitikira, no manera aakabesehwa ndi Jehovha kuti anyise vavengi vake. (Vhesi 2, 3) Iyena waireremeja maningi tabherinake. (Vhesi 4) Dhavhidhi waidakarira kwenda konamata Mwari ku tabherinake. (Vhesi 6) Iyena nguva jese waiita mukumbiro kuna Jehovha. (Vhesi 7, 8) Zve Dhavhidhi waida kujijiswa makwanja a Jehovha. (Vhesi 11) Rutendo waisisira maningi kuna Dhavhidhi zvomuita kuti anange kudari: “Ndinotenda kuti ndinozovona unaki hwa Tenji Mwari mu nyika yo uhomi.”—Vhesi 13.

MUNGAVANGISA KUDINI RUTENDO HWENYU?

Imwimwi mungavavo no rutendo hwakadari inga hwa Dhavhivi ngo kuteveja zvaakananga zvinowanika pana Nduyo 27. Zvecivoneka kuti rutendo wakacijikira pa uzivi hwokadi, kujija Bhaibheri no mabhuku akacijikira mu Bhaibheri, zvinozomubesera maningi kuti muvangise rutendo hwenyu. Pamunoenderera mberi mecijija, amuzonesehwi kusakurira mugariro wo mujimu wa Mwari. (Nduyo 1:2, 3) Toranyi nguva kuti murangarijisise pamunonga mecijija. Patinonga tecirangarijisisa zvatinonga tajija, kubongesera kwedu Jehovha kunoengejeka. Zve munozondundihwa kuti mumunamate no kucumaera vamweni ngo pamusoro po vetero yenyu. (Vaheberi 10:23-25) Zve tinokhombija rutendo patinoenderera mberi teciita mukumbiro ‘ngari yese, ticikarembi.’ (Luka 18:1-8) Ngokudaro, kumbiranyi Jehovha ‘mucikazorori’ mecithemba kuti “iyena anozomukorondha.” (1 VaTesalònika 5:17; 1 Pedru 5:7) Rutendo unotindunda kuti tiite ciricese zve zvondhozvo zvinozovangisa rutendo hwedu.—Jakobo 2:22.

TENDANYI JESU

Pa usiku Jesu acito afa, wakavhunja vajiji vake kudari: “Tendanyi Mwari tendanyivo inini.” (Johani 14:1) Izvi zvinotatija kuti kusiyapo kutenda Mwari basi, tinodikanavo kutenda Jesu. Mungatatijisa kudini kuti munotenda Jesu? Ngativone njira ndhatu jatingakhombija ndijona.

Njira yokutanga, vonanyi muripo inga cipo cinovha kuna Mwari kuitira imwimwi kamare. Mupostori Pauro wakati: “Ndinopona . . . ngo kumutenda Mwana wa Mwari, wakandidisa no kujipira ega, ngo ndava yangu.” (VaGalàsia 2:20) Pamunotenda Jesu, munova no cokwadi cokuti muripo unosisira maningi kwamuri zve i njira imwe basi yamungaregerehwa ndiyona zvishaishi zvenyu. Muripo unopazve vetero yo kupona kwenda no kwenda zve i njira inovonesa rudo hwa Mwari kwamuri. (VaRoma 8:32, 38, 39; VaEfeso 1:7) Pamunova no cokwadi cokuti muripo unomubesera, amuzovi no mavonero akashata ngo pamusoro penyu.—2 VaTesalònika 2:16, 17.

Njira yo cipiri, itanyi mukumbiro nguva jese kuna Jehovha. Muripo wa Jesu unoita kuti mukwanise kuva shamwari ya Mwari. Ngo pamusoro po muripo, tinokwanisa kuita mukumbiro kuna Jehovha no cokwadi cese, kuti “tiwane [usizi], topuwavo unyaxa [ucikaezaniswi] hwo kuzobeswa pa ngari yokudikana.” (Vaheberi 4:15, 16; 10:19-22) Kuita mukumbiro, kungabesera cisungo cedu co kuramba kushaishira Jehovha. —Luka 22:40.

Njira yo citatu, kuzwira Jesu. Mupostori Johani wakatara kudari: “Ndiani anotenda Mwana ano uhomi hucingaperi; kaveta ndiani acikapurukiri Mwana aazowani uhomi: uxungu hwa Mwari unozomuwira.” (Johani 3:36) Vonanyi kuti Johani wakananga kuti musiyano wo kutama rutendo i kushaisha. Ngokudaro, munotenda Jesu pamunomuzwira. Munozwira Jesu ‘ngokuteveja Mupango wa Kristu.’ Izvi zvinoreva, kuteveja zvese zvaakajijisa no zvaakananga. (VaGalàsia 6:2) Mungazwirazve Jesu ngo kuteveja jijiso jaanopa ecishandisa “muranda wakagondeka no wakangwara.” (Mateu 24:45) Ngokuzwira Jesu, munozocungirira zvineso zvinovoneka kuva zvakavanga inga dutu.—Luka 6:47, 48.

“CIJIKIRANYI NJIKI YO RUTENDO HWENYU HWOKUCENA”

Nguva imweni, mwanarume umweni wakadeketerera Jesu, eciti: “Ndinotenda! Kaveta ndibesei kuxoma kutenda kwangu.” (Marco 9:24) Rutendo hwake wainga padoko, asi iyena wakatendera zvaari zve waizviziva kuti waidikana kuengejera rutendo hwake. Inga mwanarume uu, nguva jimweni tinodikana kuengejera rutendo hwedu. Tese tingavangisa rutendo hwedu wari. Inga zvotaperari kuvona, tingavangisa rutendo hwedu patinojija Bhaibheri no kurangarijisisa zvotaperaro kuverenga. Izvo zvinozotiita kuti tibongesere maningi Jehovha. Rutendo hwedu hwunozogumazve pa kuvanga kudari itusu no hama jedu, tikanamata Jehovha, tocumaera ngo pamusoro po zvatiri kuimira no kuita mukumbiro nguva jese. Kusiyapo izvo, patinovangisa rutendo hwedu, tinoashira mupocero wakakura maningi kupinda zvese. Bhaibheri rinotivhunja kuti: “Kaveta imwimwi, vokudikana cijikiranyi njiki yo rutendo hwenyu hwokucena . . . Vanganyi mu rudo hwa Mwari.”—Juda 1:20, 21.