Jehovaa un Jësus daue dai fruuges ëre

As Jësus hijr upe Ër wääst is hai däir grår soo måke as Jehovaa. Hai hät sägt: ‘Ik måk nischt fon mijne aigen wile, åwer soo as mij Fåter mij inlërt hät, dau ik dës daile säge. . . . Måk ümer dai daile wat em gefale.’ (João 8:28, 29 un Colossenses 1:15) Wen wij lëre daue wosoo as Jësus dai fruuges behandle däir, den daue wij forståe wosoo Jehovaa wil wij schåle dai fruuges behandle.

Weegen dat wat stäit in dai buiker fone Bijbel, Mateus, Marcos, Lucas un João, wek uutgelërte häwe forståe soo as Jësus sër aners wäir mit dai fruuges. Åwer wosoo aners? Un dat wat Jësus inlërt hät, däit dat hüüt uk nog dai fruuges mithelpe?

Wosoo däir Jësus dai fruuges behandle?

Jësus däir ni maine dat dai fruuges bloos wäire taum seks bedrijwe. Wek religion schefs fon dai judeus, däire maine dat t’hoopblijwe mit dai fruuges, dat küün huurerig ruutergeewe. Weegen dit, dai fruuges küüne ni weggåe fon t’huus åne der slaier üm der kop, un uk ni fortele mit dai kërls upe ruu. Åwer Jësus hät ni sägt dat dai kërls ni fortele schule mit dai fruuges, åwer sai schule sich hule krijge taum eer ëre. (Mateus 5:28)

Jësus hät uk sägt: “Wee sich uutenanersrijwe däit fon sijn fruug un däit frijge mit aim ander, däit huurerig måke gëgen eer.” (Marcos 10:11, 12) Jësus däir ni anneeme dat dai kërl sich uutenanersrijwe müst “weegen irgends air dail”. (Mateus 19:3, 9) Dat wat Jësus inlëre däir, wäir wat nijges tau dai judeus. Sai däire inlëre dat dai kërls küüne sich ain anerd fruug neeme un kair däir denke dat sai forkërd wäire! Air wat oiwer dai Bijbel lërt hät, hät uutdüürt dat Jësus hät dai fruuges un kërls oiwerain nent. Un dit hät feele wërd geewt tau dai fruuges.

Un hüüt, gåe wij nå wat Jësus inlërt hät? Up oos forsamlung oiwer dai Bijbel, dai kërls un fruuges sijn ale oiwerain. Dår bruuke dai fruuges kain angst häwe, sin dai kërls ale fornünftig mit dai fruuges, dai kërls lëre sai muite dai ülste fruuges behandle as ain mama un dai fruuges wat jünger sin as ain swester un mit feele wërd. (1 Timóteo 5:2)

Jësus hät sich tijd ruuternåme taum dai fruuges inlëre. Dai religion schefs häwe dår inlërt dat dai fruuges dürwste nischt lëre. Åwer Jësus wäir gans aners, hai hät dai fruuges inlërt. Hai hät sägt dat dai fruuges küüne säge wat sai wule. Air mål hät hai Maria bijståe as sai wul bij em blijwe taum lëre un ni bloos ine koiken gåe taum kåken, gans aners as dai lüür denke däire wat dai fruuges måke müste. (Lucas 10:38 bet 42) Marta, wat Maria sijn swester wäir, hät uk lërt oiwer Jësus. Dat bliwt klår wat sai sägt hät nåheer as Lázaro doodbleewe is. (João 11:21 bet 27)

Jësus däir sich sër ankëre an dai fruuges wat sai denke däire. In dai tijd, däire dai fruuges denke, taum fröölig sin, wen sai air kind luure däir dat müst air jong sin. Wen dat air jong wäir un wäir air profeta, den wäire sai nog mër frööliger. Ain fruug hät sägt: “Fröölig is dai fruug wat dij luurt hät!”. Dun, Jësus hät sägt oiwer air dail wat sër beetet wäir. (Lucas 11:27, 28) Jësus däir wijse dat wat best wäir, wäir lëre oiwer God. Jësus hät klår låte dat dai fruuges mër måke küüne as dai lüür maine däire. (João 8:32)

Un hüüt, gåe wij nå wat Jësus inlërt hät? Dai kërls wat inlëre daue oiwer dai Bijbel ine gemaind daue sich frööge mit dat wat dai fruuges säge daue oiwer dai Bijbel. Sai daue dai fruuges wërd geewe fon dat wat gaud is wat sai inlëre tau eer kiner un uk tau dai ander lüür. (Tito 2:3) Dës fruuges daue dit måke doir dat wat sai måke un säge. Dës kërls daue waite dat dai fruuges sër mithelpe daue dai gaure nijges preege. (Salmo 68:11) Sai dai tåfel: “Hät Paul sägt dai fruuges schule ni fortele?”, up dai sijr 9.

Jësus däir sich ankëre mit dai fruuges. In Jësus sijn tijd dai määkes hare ni sofeele wërd as dai jonges. Air bauk up judaica språk, wat Talmude haite däit, sägt dat fröölig is dai wat jonges hät un ni määkes. Sai müste aine bruudman tau eer uutsuike un nog gild un andrer daile geewe weegen dai hochtijd, un wäir uk nog kair mësch wat eer uppasse däire wen sai uld ware däire.

For Jësus wäir dat ales oiwerain wen dat air jong urer air määke wäir, sai bëd hare wërd tau Jësus. Wij koine dat klår saie as hai Jairo sij määke upleewt hät fom dood, un uk as hai in Naim stad wäir, hät hai ain witfruug sij jong upleewt. (Marcos 5:35, 41 un 42 un Lucas 7:11 bet 15) As ain fruug wat gans krum gåe däir al 18 jårelang, Jësus hät dai kurijrt un hai hät dai nent soo as Abraão sij kind. Dat wäir dun ni moor, bloos dai jonges wäire soo nent. (Lucas 13:10-16) Weegen dit Jësus hät weese dat sai tauhööre däir tau dat folk un har aine starke gloobe. (Lucas 19:9 un Gálatas 3:7)

Un hüüt, gåe wij nå wat Jësus inlërt hät? Wek lüür fone Ásia säge: “Air määke uptreke is grår as aine nåwer sijne gåre natmåke.” Dai papa un mama wat Jësus nåmåke daue ni soo denke. Dai papa un mama daue eer kiner gaud uptreke, gaud behandle, gaud inlëre, daue sorge tau eer gesundhët un daue dai ale oiwerain reekne wen dat air jong urer määke is.

Jësus däir anglööwe an dai fruuges. In Jësus sijn tijd, wen ain gericht wäir, wen dai fruuges aine tüüge geewe däire, dai lüür däire dat ni anneeme. For eer dat wäir grår soo as air eskrav wat fortele däir. Josefo, wat uutgelërt wäir in dai tijd, hät soo sägt fon dai fruuges: “Dai fruuges ware ni annåme taum tüügen geewe. Dai sin swak un fortele tau feel.”

Åwer Jësus wäir gans aners. Jësus hät dai fruuges uutsöcht taum säge dat hai upleewt wäir. (Mateus 28:1, 8-10) Dës fruuges häwe saie dat hai dood un inhakt wäir, åwer dai apostels häwe eer ni glööwt. (Mateus 27:55, 56, 61 un Lucas 24:10, 11) Sai sin dai airste wääst wat saie häwe dat hai upleewt wäir. Dit däit wijse dat Jësus däir uk maine dat der fruuges eer tüügen har uk wërd. (Atos 1:8, 14)

Un hüüt, gåe wij nå wat Jësus inlërt hät? Ine gemaind fon Jehovaas Tüügen kërls wat amt häwe horge uk wat dai swesters säge daue un dai kërls daue eer fruuges ëre dat sai eer hööre. ( 1 Pedro 3:7 un Gênesis 21:12)

Dai formånen fone Bijbel helpe dai fruuges mit taum fröölig sin

Jehovaa hät wut ümer häwe dat dai fruuges schule ërt ware un fraihët häwe. Wen’t kërls Jësus någåe daue, den krijge dai fruuges wat God häwe wul for eer. (Gênesis 1:27, 28) Wen’t kërls någåe daue wat dai Bijbel säge däit, den sin eer fruuges sër fröölig. (Efésios 5:28, 29.)

Wiman’s saie wat passijrt is mit Yelena. Eer kërl däir eer slecht behandle, åwer sai däir dat tau kaim fortele. “Mij kërl is uptrekt woore in ain familg woo dat moor wäir dai fruuges slecht behandle.” Åwer Yelena hät anfånge dai Bijbel lëre. Sai sägt soo: “Dat wat ik ine Bijbel lërt häw, hät mij kraft geewt. Ik häw forståe dat air wäir wat mij lijbe däit, däir mij wërd geewe un däir sich bekümre mit mij. Ik däir denke wen mij kërl dai Bijbel lëre däir, hai däir uk aners ware.” As hai anfånge hät dai Bijbel lëre un hät sich tauwe låte, dun is passijrt wat Yelena häwe wul. “Mij kërl hät lërt sich hule krijge. Wij bëd häwe lërt air der ander forgeewe. Dat wat ik ine Bijbel lërt häw hät mij hulpe forneeme dat ik wërd häw un dat ik behüütet bün im forfrigt leewend.” (Colossenses 3:13, 18 un 19)

Dat is ni bloos passijrt mit Yelena. Miljone fruuges wat God dijne daue sin fröölig. Sai un eer kërls daue nåleewe wat dai Bijbel sägt in eer forfrigt leewend. Ine gemaind, mit dai bruirers un swesters sai ware ërt, trööst un krijge fraihët. (João 13:34, 35)

Ale wat God dijne daue, fruuges un kërls, waite dat sai süün un fëgels häwe daue. Åwer wen sai ranerkåme daue an eer God un Fåter Jehovaa sai häwe dai hofnung dat sai frai sin fone süün. Dat is ain schöön hofnung fon dai fruuges un kërls wat God behüüte däit! (Romanos 8:20, 21)