Woweegen hät God sij Regirung feele wërd tau Jësus?

Soo as wij al saie häwe, Jësus hät feel måkt in preegarbëd un fortelt oiwer “dai gaure nijges fon God sij Regirung”. (Lucas 8:1) Hai hät feel kilomëter gåe in Israel taum inlëre dai lüür oiwer God sij Regirung. Wat hai måkt hät is sreewe woore in fair buiker fone Bijbel, in Mateus, Marcos, Lucas un João, wat fortele mër as huunerd måls oiwer God sij Regirung. In mëstmål, is Jësus wääst wat dit sägt hät, oiwer dit is bloos air bits fon ales wat Jësus fortelt hät oiwer God sij Regirung. (João 21:25)

Woweegen har God sij Regirung sofeel wërd tau Jësus as hai hijr upe ër wääst is? Air dail is, dat hai waite däir dat hai uutsöcht wäir fon God taum köönig sin fon dës Regirung. (Isaías 9:6 un Lucas 22:28 bet 30) Åwer, hai wul ni dai ëren tau em. (Mateus 11:29 un Marcos 10:17, 18) Jësus hät ni an sich selwst andacht as hai fortele däir oiwer dës Regirung. God sij Regirung har un hät nog sër feel wërd tau Jësusa weegen dai daile wat dës Regirung måke däit taum dai lüür wat hai lijbe däit, sijn Himlisch Fåter un sijn rëal dijners.

WAT DÄIT DAI REGIRUNG MÅKE FOR JËSUS SIJN FÅTER?

Jësus fornimt groot lijb up sijn himlisch Fåter. (Provérbios 8:30 un João 14:31) Hai däit sich gefale fon sijn gaure moors, soo as sijn lijb, beduurnis un gerechtigkët. (Deuteronômio 32:4, Isaías 49:15 un 1 João 4:8) Dårweegen, Jësus däit hasse dai loigen wat sägt ware oiwer sijn Fåter: dat God sich ni ankëre däit mit dai nood fon dai lüür un sogår wil dat wij nood doirsete. Dårweegen däir Jësus sich soo dul anstrenge taum “dai gaure nijges fon God sij Regirung” preege. Hai däir waite dat dës Regirung, God sijne nåme hailig måke däir. (Mateus 4:23 un 6:9, 10) Wosoo God sij Regirung däit dit måke?

Doir dai Regirung, Jehovaa däit dai wild gans aners måke. ‘Hai däit jërer trån fon dai rëal lüür eer oogen afwische’. Hai däit dat wegbringe wat dai lüür hüüle mökt, soo as ‘dai dood, traurigkët, hüülen un waidåg’. (Apocalipse 21:3, 4) God däit al nood wegbringe doir em sij Regirung.b

Den, is ni taum bewunren dat Jësus wul sër gërn mit dai lüür fortele oiwer dai Regirung! Hai wüst dat dit Regirung däir wijse dat sij Fåter hät al gans kraft un sër barmhärtsig. (Tiago 5:11) Un nog, Jësus däir uk waite dat dit Regirung däir uk dai rëal lüür mithelpe.

WAT MÖKT GOD SIJ REGIRUNG FOR DAI REÄL LÜÜR?

Feel tijd airer as hai upe ër kåme is, Jësus hät in himel leewt mit sijn Fåter. Mit em sijn Kind, Jehovaa hät al dai daile måkt:  dai groot himel mit biljone stërne un uk oos fain Ër woo feel sort leewend is. (Colossenses 1:15, 16) Åwer, in ales wat måkt woore is, wat Jësus mëst gefale däir wäire dai lüür. (Provérbios 8:31)

As Jësus preege däir, hai däir sij lijb upe dai lüür wijse. Glijk fon anfang, hai hät klår låte dat hai upe ër wääst is taum oiwer dai gaure nijges fortele tau dai wat bruuke däire. (Lucas 4:18) Åwer, hai däir ni bloos säge oiwer dat lijb. Feel mål hai hät mit lijb daile for dai lüür måkt. Air mål, as feel lüür sich forsamelt häwe taum em hööre, Jësus “hät beduurnis fornåme un hät eer kranke gesund måkt”. (Mateus 14:14) As air kërl wat lepra krankhët har, Jësus sägt hät tau em kurijre wen hai wirklig wul, Jësus weegen lijb hät dai kërl kurijrt. Jësus hät mit gaurigkët em sägt: “Ik wil! Duu büst rëgen.” (Lucas 5:12, 13) As hai uk saie hät dat Maria hüüle däir weegen Lazarus sijn braurer sij dood, Jësus hät sich traurig un unruig fornåme un hät anfånge ane hüülen. (João 11:32 bet 36) Dun, Jësus hät wat bewunrig måkt, hai hät Lazarus upleewt nog dat hai al fair dåg dood wäir! (João 11:38 bet 44)

Is klår dat Jësus waite däir dat wat hai dun måkt hät wäir fon ain kord tijd. Hai däir waite dai ale wat hai gesundmåkt har däire werer krank blijwe un ale wat hai upleewt har däire werer doodblijwe. Jësus däir uk waite dat God sij Regirung wäir wat dës nood almåke däir for ümer. Is dårweegen dat hai ni bloos bewunrig daile måkt hät, åwer hai hät sich sër anstrengt taum preegen “dai gaure nijges fon God sij Regirung”. (Mateus 9:35) Dës bewunrig daile wat Jësus måkt hät daue wijse dat wat God sij Regirung bald måke däit upe ganse Ër. Wiman’s saie dai daile wat dai Bijbel sägt oiwer dës tijd.

• 

  Is den kain krankhët mër.

  “Den, in dai tijd, dai oogen fon dai bline lüür daue saie un dai oore fon dai doofe daue hööre. In dai tijd, dai låm däit ruperkruupe soo as dai rëbuk un dai tung fon dai stume däit mit lust juuche.” Un nog, “kair wat upe ër wånt wart säge: ‘Ik bün krank’”. (Isaías 33:24 un 35:5, 6)

• 

  Dai dood is den ni mër.

  “Dai ër wart dai gerechte hööre un sai daue ümer up dai leewe.” (Salmo 37:29)

  “Hai däit dai dood up ümer uutrote un dai Alehöögst Her Jehovaa däit dai tråne fon al dai gesichte afwische.” (Isaías 25:8)

• Dai doore ware upleewt.

  “Ale dai wat im andenken grääwer sin, sijn stim hööre un kåme ruuter”. (João 5:28, 29)

  “Dat dat air upleewen fon dood geewe däit.” (Atos 24:15)

• 

  Ale häwe den arbëd un ain stel taum wånen.

  “Dai daue hüüser buuge un daue dår in wåne; Daue wijn plante un daue dårfon eete. Daue ni buuge taum andrer in wånen, daue uk ni plante taum andrer eeten. . . . mijn uutgesöchte daue gaud benutse der arbëd wat sai måke mit sijne häin”. (Isaías 65:21, 22)

• 

  Is den kair krijg mër.

  “Hai bringt tau ën dai krijgs up dai ganse ër.” (Salmo 46:9)

  “Kain folk gäit int dai anerd gëgen mit dai espada hooghule un ni mër daue dai dere krijg lëre.” (Isaías 2:4)

• 

  Is den kain hungersnood mër.

  “Dai ër däit den sijn ernt geewe; God, oos God, däit oos seegne.” (Salmo 67:6)

  “Wart feel sort köörn upe ër sin, un uk feel sort eeten båwen upm bärg.” (Salmo 72:16)

• Kair wart arm sin.

  “Åwer dai arme lüür ware doch ni up ümer forgeeten blijwe”. (Salmo 9:18)

  “Weegen hai däit der arm fraimåke wat hülp bire däit, un uk dai gewöönlig un jërer dai wat kair helpe däit. Wart beduurnis häwe oiwer der gewöönlige un der arme, un däit der arme eer leewend rere.” (Salmo 72:12, 13)

Wen’s duu oiwer dës daile leest wat forspråke woore sin, krijgst duu forståe woweegen Jësus God sij Regirung feele wërd geewe däir? As hai upe Ër wääst is, hai däir sich sër anstrenge taum mit al dai lüür fortele oiwer God sij Regirung wat hööre wule weegen hai däir waite dat dës Regirung däir al dai eelend un nood ine wild uutrote.

Hät dij gefale leese dat wat dai Bijbel sägt wat dai Regirung bald måke däit. Den, wosoo kast duu mër oiwer dës Regirung lëre? Un wat kast duu måke dat’s duu uk hülp krijgst fon dës seegen? Dai lätst stük däit dij dës frågen antwoore.