Måk starke ümgang airer as dat ën kåme däit

1-2. Soo as stäit in 1 Pedro 4:7 un 8, wat däit oos helpe dai swår tijd doirsete?

WIJ kåme ümer näige an dat ën fon “dai lätste dåg”. Dårweegen kan sin dat wij slim swårhëte doirsete. (2 Tim 3:1) Sai man’s wat passijrt is in ain gëgend fon África. Nåheer as wek bekandmåkt häwe dat welt ware wule, sin dai lüür sër wüütend woore un feel sin sër strijrig woore. Dårweegen mër as 6 månat is sër gefärlig woore for oos bruirers un swesters. Wat hät eer hulpe dat doirsete? Wek for eer häwe sich forsteeke in andrer bruirers un swesters eer hüüse woo sai sich behüüte küüne. Air braurer hät sägt: “As ik t’hoop wäir mit mijne bruirers un swesters in soo’ne slime tijd, bün ik sër fröölig bleewe. Wij häwe air der ande koråsch geewt.”

² Wen dai “groote nood” anfänge däit, daue wij uk fröölig sin dat oos bruirers un swesters wat oos lijbe daue näig an oos sin. (Apo 7:14) Dårweegen muite wij ale nuu oose ümgang mit oos bruirers un swesters stärke. (Lees 1 Pedro 4:7 un 8) Wij koine sër feel lëre for der profët Jeremias, hai hät sijn leewend rert in air slim tijd, airer as dai Jerusalém stad uutrot woore is, weegen wek lüür woo hai ümgang har häwe em mithulpe.b Wosoo koine wij Jeremias nåmåke?

DAU FON JEREMIAS LËRE

3. (a) Woweegen har küüt Jeremias alaine blijwe? (b) Wat däir Jeremias tau Baruque fortele un wat hät dat ruutergeewt?

³ Wënsig up 40 jåre lang, Jeremias däir leewe mank lüür wat ni reäl wäire mit God, wek fon eer wäire em sijn nåwers un kan sin dat wek wäire fründschaft wat in Anatote stad wåne däire. (Jer 11:21 un 12:6) Lijkerst soo, Jeremias däir ni wijdtaf blijwe for dai lüür, hai däir ni forsuike alaine blijwe. Gans aners, hai däir tau Baruque fortele, dai reäl mësch wat t’hoop mit em arbëre däir, woo hai sich befijne däir un doir dai Bijbel hät hai dat uk tau oos fortelt. (Jer 8:21, 9:1, 20:14 bet 18 un 45:1) Kan sin dat solang as Baruque upsrijwe däir ales wat in Jeremias sijn leewend passijre däir, häwe sai bëd lërt air der anerd lijbe un respektijre. (Jer 20:1, 2 un 26:7 bet 11)

4. Wat fone arbëd hät Jehovaa Jeremias oiwergeewt un wosoo hät dës arbëd dai ümgang fon Jeremias un Baruque stärkt?

⁴ Up feel jåre lang hät Jeremias mit koråsch taum dai israeliten sägt wat mit Jerusalém passijre däir. (Jer 25:3) Dun, hät Jehovaa uutsöcht luure taum saie of dat folk sich lëd daue däir. Jehovaa hät taum Jeremias forlangt, hai schul in air rul srijwe dai ganse beschaid wat hai taum dat folk geewt har. (Jer 36:1 bet 4) Kan sin dat Jeremias un Baruque feel månat lang t’hooparbëd häwe in dai amt wat God eer oiwergeewt hät. In dës tijd lang, gans sicher häwe sai air der ande eer gloobe stärkt doir dat wat sai fortele däire.

5. Wosoo hät Baruque weese dat hai wirklig ain gaur ümgang wäir taum Jeremias?

⁵ As dai rul trecht woore is, hät Jeremias taum Baruque sägt dat hai dai beschaid taum dat folk leese müst. (Jer 36:5 un 6) Dat wäir gefärlig, åwer Baruque hät dat mit koråsch måkt. Wosoo hät Jeremias sich befuune as Baruque dat måkt hät un dai rul taum dat folk leest hät? Sër fröölig. (Jer 36:8 bet 10) Dai schefs fon Judá häwe waiten kreege dat wat Baruque måkt har. Dun, häwes Baruque raupe taum dai rul for eer leese! (Jer 36:14 un 15) Dai schefs häwe uutsöcht taum dai köönig Jeoiaquim fortele dat wat Jeremias sägt hät. Sai sin gaud wäst un häwe Baruque sägt: “Gåe un forsteekt juuch, duu un Jeremias, un låt kaine waite woo jij bëd sin.” (Jer 36:16 bet 19) Dit is ain gaur formånen wäst!

6. Wat häwe Jeremias un Baruque måkt as dai köönig Jeoiaquim gëgen eer wäir?

⁶ Dai köönig Jeoiaquim is wüütend woore mit Jeremias sijn wöör in dat rul. Hai hät dai rul forbrent un hät ordnung geewt taum Jeremias un Baruque inspuunt ware. Åwer Jeremias hät dai angst oiwerståe. Hai hät anerd rul nåme un hät dai taum Baruque geewt. Solang as Jeremias, Jehovaa sijn beschaid säge däir, däir Baruque upsriwe “al wöör wat in dai airst rul in wäire, wat Jeoiaquim, köönig fon Judá, forbrent hät.” (Jer 36:26 bet 28 un 32)

7. Wat kan sin is passijrt solang as Jeremias un Baruque t’hooparbëre däire?

⁷ Lüür wat swårhëte t’hoop mitmåke daue, mëstümer daue air stark ümgang häwe. Nog ais häwe müst Jeremias un Baruque t’hooparbëre taum dai rul wat dai slecht köönig Jeoiaquim forbrent hät, werer srijwe. Solang as sai arbëd häwe, kan sin häwe sai lërt nog mër wërd geewe air taum der anerd weegen een gaur moors. Wat koine wij lëre fon dës bëd reäl kërls?

UUTM HÄRTS T’HOOPFORTELE

8. Woweegen is dat öftens ni licht uutm härts mit andrer fortele, åwer woweegen is gaud dit måke?

⁸ Mainst duu ni licht mit andrer fortele oiwer wosoo duu dij befijne däist un denke däist? Kan sin dat dat passijre däit weegen air dij al argret hät. (Prov 18:19 un 24) Urer kan sin dat’s duu maine däist, dat’s duu kair kraft un tijd häst taum starke ümgang häwe. Åwer dau ni nålåte! Wen wij wile dat oos bruirers un swesters bij oos blijwe daue wen wij swårhëte doirsete daue, muite wij lëre oos nuu up eer forlåte, eer säge dat wat wij denke un woo wij oos befijne daue. Dat is sër nöörg taum starke ümgang häwe. (1 Ped 1:22)

9. (a) Wosoo hät Jësus weese dat hai sich forlåte däir up dai womit hai ümgang har? (b) Wosoo uutm härts t’hoop fortele kan dij helpe stärke ümgang hät? Dau oiwer Cindy fortele.

⁹ Jësus däir sich upforlåte an dai wat ümgang mit em hare. Hai hät dat weese weegen däir mit eer uutm härts fortele. (João 15:15) Wosoo kast duu em nåmåke? Dau lëre mit andrer fortele oiwer dat wat dij lust urer traurig löt un oiwer dijn kopbreeken. Duu must hööre wen air mit dij fortele däit. Kan sin dat jij ruuterfijne dat feel daile wat jij denke, forneeme un im wile häwe måke, oiwerain sin. Dau saie wat passijrt is mit Cindy, ain swester wat 29 jår har. Sai un Maria Luísa, ain pionijr mit 67 jår, häwe ain gaur ümgang. Sai bëd daue jërer dunerdags morgens nam preegearbëd t’hoopgåe un daue oiwer ales fortele. Cindy sägt: “Ik mag gërn oiwer daile fortele wat groote wërd häwe mit dai womit ik ümgang häw, weegen dat däit mij helpe eer beeter kene un eer beeter forståe.” Dat 2 lüür stark ümgang häwe koine, muide sai bëd uutm härts fortele. Soo as Cindy, wen’s duu anfänge däist uutm härts mit andrer fortele, wart dij ümgang grööter un stärke. (Prov 27:9)

DAUT T’HOOPPREEGE

10. Soo as stäit in Provérbios 27:17, wat kan passijre wen wij mit oos bruirers un swesters t’hooppreege?

¹⁰ Jeremias un Baruque sij ümgang is stärke woore as sai t’hooparbëd häwe. Den, wen wij t’hooppreege daue mit oos bruirers un swesters un een gaure moors saie daue, koine wij sër feel mit eer lëre un eer nog düler lijbe. (Lees Provérbios 27:17) Denk an wat passijre däit wen’s duu preege däist mit aim womit duu ümgang häst. Wen’s duu saie däist dat dai, dai wårhët mit koråsch uutdüüre däit un mit gloobe fortele däit oiwer Jehovaa un dat wat hai forspråke hät, wosoo däist duu dij befijne? Kan sin dijn lijb up dës mësch womit duu ümgang häst tauneeme däit.

11-12. Dau säge wosoo dai preegarbëd oos starke ümgang geewe däit.

¹¹ Wiman’s saie woo dat preegarbëd wek swesters hulpe hät een ümgang stärke. Adeline ain swester wat 23 jår hät, hät Camila, ain womit sai ümgang hät forlangt taum mit eer preege in ain gëgend woo wënig Jehovaas Tüügen preege daue. Adeline sägt: “Wij wule mër lust häwe taum preege un dat dai preegarbëd oos düler gefale däir. Wij bëd bruukte air dail taum oos koråsch geewe dat wij bijblijwe däire oos best taum Jehovaa geewe”. Is dat gaud wääst for eer t’hooppreege? Adeline sägt: “Ine sluus fon jërer dag däire wij fortele oiwer wosoo wij oos befijne däire, oiwer air dail wat wij fortelt häwe urer höört häwe upm preegarbëd wat oos koråsch geewt hät un oiwer wosoo klår saien wäir dat Jehovaa oos lenke däir. Dat wat wij bëd uutm härts fortele däire, wäir gaud for oos bëd un hät oos hulpe oos beeter kene.”

¹² Layala un Marianne, wat ni forfrigt sin un in França wåne daue, däire 5 weeke lang preege in ain stel fon África wat Bangui hit, woo feel lüür wåne daue. Layala hät sägt: “Wij bëd häwe wek swårhëte doirset, åwer ümer ain mit dem anerd fortele un dai wår lijb häwe, hät oos ümgang stärkt. Ik häw saie dat Marianne küün sich drööge mit irgënds air dail. Sai däir dai lüür sër lijbe un däir sich sër anstrenge upm preegarbëd. Dårweegen dau ik eer mër respektijre.” Duu bruukst ni nam anerd land rëse taum sich soo befijne. Dau dij anstrenge taum t’hooppreege mit dai bruirers un swesters fon dijn gemaind. Dit däit dij helpe eer beeter kene un dijn ümgang mit eer wart stärke.

HUL DIJ AN DAI GAURE MOORS UN DAU FORGEEWE

13. Wat fon swårhëte koine passijre wen wij t’hooppreege mit oos bruirers un swesters?

¹³ Öftens wen wij t’hoop arbëre daue mit oos bruirers un swesters koine wij eer gaur moors saie, åwer uk eer fëgels. Wat kan oos dårmit helpe? Dau man’s werer andenke an Jeremias. Wat hät em hulpe dai andrer eer gaur moors saie un ni sich hule na een fëgels?

14. Wat hät Jeremias oiwer Jehovaa lërt un wosoo hät em dat hulpe?

¹⁴ Kan sin dat Jeremias ni bloos air bauk sreewe hät wat Jeremias haite däit, åwer uk dai buike airst un twait Reis. Dës arbëd hät Jeremias hulpe saie dat Jehovaa barmhärtsig mit dai lüür is. Jeremias däir waite wat mit dem köönig Acabe passijrt wäir. Acabe hät sër feel forkërde daile måkt, åwer dat hät em lëd dår, dårweegen hät Jehovaa bloos Acabe sijn familg uutrot nåheer as hai doodbleewe is. (1 Reis 21:27 bet 29) Jeremias däir uk waite wat dai köönig Manassés måkt hät, hai wäir slechte as Acabe. Åwer dat hät em lëd dår un Jehovaa hät em dat forgeewt. (2 Reis 21:16, 17 un 2 Crô 33:10 bet 13) Dës geschicht waite hät Jeremias hulpe geduldig un barmhärtsig sin mit dai andrer soo as Jehovaa is. (Sal 103:8 un 9)

15. Wosoo hät Jeremias Jehovaa sijn geduld nåmåkt as Baruque sich forstööre låte hät mit andrer daile?

¹⁵ Dau man’s andenke an woo Jeremias Baruque hulpe hät as hai sich forstööre låte hät mit andrer daile. Jeremias hät ni Baruque glijk ümstig låte. Gans aners, hai hät em hulpe mit Jehovaa sijn gaur un klår wöör. (Jer 45:1 bet 5) Wat koine wij dårmit lëre?

16. Soo as stäit in Provérbios 17:9, wat muide wij måke dat oos ümgang stark blijwt?

¹⁶ Wij döre ni luure dat oos bruirers un swesters åne fegels sin. Nåheer dat wij ümgang mit dai häwe, wij muite oos anstrenge taum dat hule krijge. Kan sin wen air woo wij ümgang häwe wat forkërd måke däit, muite wij em gaud un streng formåne nå dat wat dai Bijbel sägt. (Sal 141:5) Wen air oos argre däit wij muide dem forgeewe un nåheer muide wij oos anstrenge taum ni mër fortele dåroiwer. (Lees Provérbios 17:9) In dës swår tijd woo wij leewe daue wij muide oos hule an der bruirers un swesters sijn gaur moors un ni oos ankëre an een fëgels. Wen wij dat måke daue, den daue wij oos ümgang mit eer stärke. Wen dai grood nood kåme däit, den bruuke wij air der andrer.

HUL DIJ AN DAI MIT LIJB

17. Wosoo hät Jeremias weese dat hai air wäir woo dai andrer sich wirklig upforlåte küüne?

¹⁷ Dai womit Jeremias ümgang har, küüne sich up em forlåte in der swår tijd. As Jeremias in ain laim loch wäir, Ebede-Meleque hät em hulpe dat hai ni doodblijwe däir. Dårweegen hät Ebede-Meleque angst hat dat andrer em doodmåke däire. As Jeremias dat waiten kreege hät, hai is ni stil bleewe. Jeremias däir ni maine dat Ebede-Meleque kair hülp bruuke däir. Lijkerst dat hai inspuunt wäir, Jeremias hät tau Ebede-Meleque sägt wat Jehovaa em forspråke hät un dat hät em trööstet. (Jer 38:7 bet 13 un 39:15 bet 18)

18. Soo as Provérbios 17:17 sägt, wat muide wij måke wen oos bruirers un swesters wat doirsete daue?

¹⁸ Hüütsendåg oos bruirers un swesters daue feel sort swårhete doirsete. Feel daue unwerer, ërschütlen un grood wåter doirsete. Andrer daue slimhëte doirsete weegen dai daile wat kåme daue fon krijg un ërschütlen. Wen dit passijre däit, kan sin dat wij wek for oose bruirers un swesters anneeme daue in oose huus. Andrer koine mit gild mithelpe. Åwer ain dail wat wij ale måke koine, is beere for oos bruirers un swesters un forlange tau Jehovaa dat hai eer helpe schal. Wen wij waiten krijge daue dat air braurer urer ain swester traurig is, wek måls waite wij ni wat wij säge urer måke koine. Åwer wij ale koine mithelpe! Wij koine tijdhåle taum t’hoop sin mit dai andrer, eer horge wat sai taum sägen häwe un eer aine spruch leese ine Bijbel wat oos sër gefale däit. (Isa 50:4) Wat mëre wërd hät is dat’s duu dår büst taum mithelpe. (Lees Provérbios 17:17)

19. Wosoo däit oos dat helpe in dai tijd foiruut oos ümgang mit oos bruirers un swesters nuu stärke?

¹⁹ Nuu is dai tijd taum starke ümgang häwe mit oos bruirers un swesters. Woweegen? Weegen oos fainde daue laigen benutse dat wij ni ainig sin. Sai wile dat wij ni mër oos upforlåte up oos bruirers un swesters un dat wij ni mër eer bijståe daue. Åwer sai krijge dat ni måkt. Oos fainde krijge nij ais dat oos lijb up oos bruirers un swesters alware däit. Nischt kan oos ümgang mit oos bruirers un swesters uutrote. Gans sicher wij daue ni bloos amigos sin in dës lätste dåg, åwer up ümer!