Daue dai huurig daile schåre urer ni?

Hüüt is dai wild ful huurig daile, un wek daue denke soo’s dat däit nischt.a Duu kast dit fijne in filmes, buiker, televisão, videogames, celulares un ine internet, un soo wijrer. Hüüt daue dai lüür feel mër huurig daile saie as airste. (Sai dai tåfel, Wek numer oiwer huurig daile)

Hüüt dai huurig daile sin aners as airste. Dai schaullërer Gail Dines hät sägt: “Früüer däire dai lüür daile saie wat sai sër soigisch maine däire, åwer hüüt daue sai maine dat dat ni mër soo slecht is.”

Wat mainst duu? Daue dai huurig daile schåre urer ni? Jësus hät sägt: “Neemlig soo, jërer gaud boom giwt gaur frucht, åwer jërer slecht boom giwt frucht åne wërd.” (Mateus 7:17) Wat fon daile kåme fon dai huurig daile? Taum dat waite wiman’s wek frågen oiwer huurig daile antwoore.

Wosoo koine dai huurig daile air mësch schåre?

WAT DAUE DAI UUTGELËRT SÄGE? Dai lüür wat huurig daile kijke, daue sich licht dat anwene, un dai uutgelërt daue dat t’hooppasse mit ain slim sort droga, dai crack.

Brianb hät sich anwent huurig daile ine internet kijke, hai sägt: “Ik krëg ni anhule, ik wäir gans uut mij, soo as wen ik air droga innåme har. Ik däir mij schuldig forneeme, un dårweegen däir ik sitre un sogår kopwaidåg häwe. Ik häw mij sër anstrengt taum anhule, åwer nog soo jåre nåheer däir ik huurig daile kijke.”

Lüür wat huurig daile kijke, wile mëst ümer bloos alaine blijwe un daue laige taum dës slecht moor forsteeke. Feel befijne sich alaine, beschåmt, unruig, åne lust wüütend un wek häwe im wile sogår sich doodmåke. Sérgio wat bijnå jërer dag huurig daile ine celular kijke däir, sägt: “Ik däir bloos an mij selwst denke un däir mij oiwer nischt ankëre. Ik däir mij alaine un åne lust befijne. Däir maine dat ik schuld har un dat kaine wërd har. Ik har angst un däir mij taudul schääme taum hülp forlange.”

Dai huurig daile koine air mësch schåre lijkerst wen sai dat bloos bits kijke däit. Judith Reisman, ain uutgelërt, hät fortelt oiwer wosoo dai huurig daile schåre koine, sai sägt: “Dai huurig daile wat air mësch kijke däit, dat blijwt ine gedanke, dai krijgt dat ni forgeete lijkerst wen dai dat forgeete wil.” Susan fon 19 jår, wat huurig daile ine internet keeke hät, sägt: “Ik krijg dat ni forgeete, mit ais kümt dat in mijn kop. Ik denk dat ik ni forgeete krijg.”

WAT LËRE WIJ DÅRFON? Dai mësch wat huurig daile kijke däit, wart eskrav dårfon un dat däit dai mësch sër schåre. (2 Pedro 2:19)

Wosoo koine dai huurig daile ain familg schåre?

WAT DAUE DAI UUTGELËRT SÄGE? “Huurig daile kijke däit dai forfrigt leewend un dai familg schåre.” - A Armadilha da Pornografia, fon Wendy un Larry Maltz (Ain bauk up englisch)

Huurig daile kijke däit dat forfrigt leewend un dai familg schåre, weegen:

• Kërl un fruug daue ni mër air an der andrer glööwe un eer lijb un ümgang wart swak. (Provérbios 2:12 bet 17)

• Dat mökt dat dai mësch bloos an sich selwst denkt, däit sich ni mër ankëre mit sij kërl urer sij fruug un dai bëd sin ni mër fröölig t’hoop. (Efésios 5:28 un 29)

• Dat mökt dat dai mësch sex måke wil up air forkërd årt. (2 Pedro 2:14)

• Dai wat huurig daile kijke däit wil sij kërl urer sij fruug andrijwe taum dai soigisch daile uk måke. (Efésios 5:3 un 4)

• Dat mökt dat der mësch anerd kërl urer anerd fruug sich neeme wil un sogår sex måke mit dem. (Mateus 5:28)

Dai Bijbel sägt dat kërl un fruug döre “ni hijnerlistig sin” air mit der anerd. (Malaquias 2:16) Wen dai kërl urer fruug ni reäl sin air mit der anerd un ni sijn woord hule daue, dai koine uutananergåe urer sich uutananersrijwe un dat däit dai gans familg schåre, sogår een kiner.

Dai huurig daile koine dai kiner nog düler schåre. Brian, woo oiwer wij al fortelt häwe, sägt: “As ik 10 jår har, däir ik speele un häw mij forsteeke, un mit ais häw ik buiker mit huurig daile fuune, wat fon mij papa wäire. In forsteek häw ik anfunge dat kijke, åwer ik däir ni forståe woweegen ik dat gërn kijke däir. Fon dun an, häw ik dës slecht moor hat, wat feel jåre lang duurt hät, bet ik groot woore bün.” Uutgelërt lüür häwe ruuterfuune, dat dai juugende wat huurig daile kijke daue, daue airer anfänge sex måke, un daue dat mit feel lüür måke. Sai daue ossig sex måke, ware slecht im kop un daue sich slecht befijne.

WAT LËRE WIJ DÅRFON? Huurig daile kijke is soo as gift, däit dai familg schåre un bringt eelend. (Provérbios 6:27)

Wat sägt dai Bijbel oiwer huurig daile?

GOD SIJ WOORD SÄGT: “Måk den dood, dai daile fon dijn körper wat besägen hät mit huurerig, ni rëgen sin, wünsch taum seks bedrijwen, wünschen wat schåre un groot oogen häwe, wat falsch godes anbeere is.” (Colossenses 3:5)

Dit däit wijse dat Jehovaac God, däit dai huurig daile hasse. Åwer Jehovaa däit ni denke soo’s sex måke schåm is. Jehovaa hät oos soo måkt dat dai forfrigte sex måke koine, dat sai sich inenaner lust geewe, sich mër t’hoop lijbe daue, un dat sai sich t’hoop frööge schule mitm kiner. (Tiago 1:17)

Den, woweegen koine wij oos sicher sin dat Jehovaa dai huurig daile hasse däit? Wiman’s saie woweegen:

• Hai wät dat dai huurig daile koine dai lüür sër schåre. (Efésios 4:17 bet 19)

• Hai däit oos lijbe un hai wil oos behüüte fon dai slechte daile. (Isaías 48:17 un 18)

• Jehovaa wil dat dai familg un dai wat forfrigt sin t’hoop blijwe. (Mateus 19:4 bet 6)

• Hai wil dat wij rëgen sin ine gedanke un im körper un dat wij dai andrer ëre. (1 Tessalonicenses 4:3 bet 6)

• Jehovaa wil dat wij dat forfrigt leewend ëre un dat wij dai ber ërig hule. (Hebreus 13:4)

• Jehovaa wät dat dai huurig daile daue ni dai sex up dai richtig moor wijse, mökt dat dai mësch bloos an sich selwst denke däit, un däit wijse wat Satan oiwer dat sex denke däit. (Gênesis 6:2 un Judas 6, 7)

WAT LËRE WIJ DÅRFON? Dai huurig daile daue dem mësch sijne ümgang mit Jehovaa schåre. (Romanos 1:24)

Åwer Jehovaa däit beduure dai wat anhule wile huurig daile kijke. Dai Bijbel sägt: “Jehovaa is barmhärtsig un hät beduurnis, geduldig un ful mit lijb gaurigkët. Weegen hai wät gaud wosoo wij måkt sin, hai däit andenke dat wij stow sin.” (Salmo 103:8 un 14) Jehovaa däit dai gewöönlig nööge taum barmhärtsigkët krijge un unfordaind gaurigkët fijne taum ine richtig tijd helpe.” (Hebreus 4:16) Sai dai tåfel: Wosoo anhule huurig daile kijke.

Mit God sijn hülp, feel lüür ware frai fon huurig daile kijke. Sai wat dai Bijbel sägt oiwer wek wat dës un andrer slechte moors oiwerståe häwe: “Jij sin rëgen wusche woore, . . . sin hailig måkt woore, . . . un sin bekand måkt woore in Jësus Kristus dai Her sijne nåme un mit God sijne gaist.” (1 Coríntios 6:11) Soo as dai apostel Paulo, sai koine säge: “Tau ales bün ik stark doir dem wat mij kraft giwt.” (Filipenses 4:13)

Susan wat oiwerståe hät huurig daile kijke, sägt: “Bloos Jehovaa kan dij helpe dårfon frai ware, wen’s duu em sij hülp forlange däist, duu kast air gaure ümgang mit em häwe, hai däit dij nij ais besijdlåte.”