Woweegen däit God ni al dai gebeeds hööre?

“Wen jij beere daue, daut ni ümer dai neemlige daile mål for mål säge.” (Mateus 6:7)

Jehovaa God däit ni dai gebeeds hööre wat wij uutm kop waite urer leese daue in aim gebeedbauk. Hai wil wij schåle tau em säge wat wij ine härts häwe. Gans sicher dij däir ni gefale wen air mit dij fortele däir, un säär ümer dai neemlige wöör, is ni wår? Dai lüür wat gaure ümgang häwe, fortele uutm härts woo sai sich befijne un forneeme daue. Wen wij tau God beere oiwer wosoo as wij oos forneeme un befijne, den daue wij wijse dat wij aine gaure ümgang mit em häwe wile.

“Wen jij wat forlange, jij krijge dat ni, weegen jij forlange dat mit forkërde wünsch.” (Tiago 4:3)

Wij koine ni denke dat God oos gebeeds antwoore däit wen wij em wat forlange wat em ni gefale däit. Denke ais: Ine Bijbel stäit God kan ni dai afgünigkët lijre, un uk dat wij döre ni anglööwe an dai daile wat dai lüür maine glük geewe däit. Den, stel dij ais foir, wen air gild were däir un däir beere taum glük häwe taum dat gewine, däir God soo’ne gebeed antwoore? (Isaías 65:11 un Lucas 12:15) Gans sicher doch ni! God däit bloos oos gebeeds antwoore wat t’hoopstime mit dat wat ine Bijbel in stäit.

“God hasst dem sij gebeed wat ni dai lei horge wil.” (Provérbios 28:9)

Ine früüsche tijd, God däir ni dai gebeeds antwoore fon dai wat em ni horge wule. (Isaías 1:15 un 16) Un hai is ni aners woore. (Malaquias 3:6) Wen wij wile dat God schal oos gebeeds antwoore, den muite wij oos anstrenge taum sijn geboote horge. Un wen wij trööguut wat forkërdes måkt häwe? Wil dat den säge, dat Jehovaa nij mër ais oos gebeeds hööre däit? Gewiss ni. God däit oos forgeewe wen wij anfänge måke wat richtig is un måke ni mër wat forkërd is. (Atos 3:19)