Dai recht taum her oiwer dai gemaind sin

1. Woweegen is Jehovaa sij folk soo ainig?

Wij lijbe sër dat wij tauhööre daue taum Jehovaa sij folk. Åwer woweegen hät dës folk sofeel freere un is soo ainig? Air dail wat eer helpe däit is dat wij ale oos sër anstrenge daue taum respektijre dai recht taum her oiwer dai gemaind sin, wat Jehovaa inset hät. Ji beeter as wij dit forståe daue, ainige blijwe wij.

2. Wat fon frågen ware antwoordet in dës lëren?

² In dës lëren daue wij lëre oiwer wee dai recht hät taum her ine gemaind sin. Wij daue uk saie dai antwoord taum dës frågen: Wat häwe dai swesters oiwer eer? Kan irgends air braurer her sin oiwer jërer swester? Hät air ülst ine gemaind dai selwig recht as air kërl ine familg? Airst daue wij saie wosoo wij denke muite oiwer oos swesters.

WOSOO MUITE WIJ DENKE OIWER OOS SWESTERS?

3. Wat kan måke dat wij mër wërd geewe daue up oos swesters?

³ Wij geewe sër feel wërd taum oos swesters wat eer best måke taum dai familg uppasse, dai gaure nijges preege un dai gemaind bijståe. In dës lëren daue wij nådenke wat Jehovaa un Jësus maine daue oiwer dai fruuges. Wij daue uk saie wosoo Paulo dai fruuges behandle däir. Dit mökt dat wij mër wërd geewe daue up oos lijb swesters.

4. Jehovaa giwt wërd tau kërls un fruuges. Wosoo wijst dai Bijbel oos dat?

⁴ Dai Bijbel wijst dat Jehovaa wërd giwt tau fruuges un kërls. Denk man ais an, an wat passijrt is, in dai apostels sijne tijd. Kërls un fruuges häwe Jehovaa sijn hailig gaist kreege taum bewunrig daile måke, soo as in feel språke fortele. (Atos 2:1 bet 4 un 15 bet 18) Kërls un fruuges sin uutsöcht woore doir hailig gaist taum regijre mit Kristus in himel. (Gál 3:26 bet 29) Kërls un uk dai fruuges daue dat ëwig leewend hijr upe ër krijge. (Apo 7:9, 10 un 13 bet 15) Kërls un sogår fruuges häwe dai amt kreege taum preege un dai gaure nijges inlëre. (Mat 28:19 un 20) In Atos bauk stäit oiwer Priscila, ain swester wat ain gaur arbëd måkt hät. Priscila un sij kërl Áquila häwe Apolo hulpe dai wårhët beeter forståe, lijkerst dat hai feel kenen har. (Atos 18:24 bet 26)

5. Soo as stäit in Lucas 10:38, 39 un 42, wat däir Jësus oiwer dai fruuges maine?

⁵ Jësus däir dai fruuges ëre. Jësus wäir gans aners as dai fariseus fon sijne tijd wat maine däire dat dai fruuges kaine wërd hare. Dai fariseus wule nog ni måls dat dai andrer eer saie däire mit dai fruuges fortele. Un wule ni mit dai fruuges oiwer dai Hailig Sriwt fortele. Åwer Jësus däir mit dai fruuges fortele un däir eer uk oiwer feel daile fone Hailig Sriwt inlëre.b (Lees Lucas 10:38, 39 un 42.) As Jësus rëse däir taum preege hai lait dat dai fruuges t’hoop mit em rëse däire. (Luc 8:1 bet 3) Un as Jësus upleewt woore is fon dood, hai hät låte dat dai fruuges dat taum dai apostels fortelt häwe. (João 20:16 bet 18)

6. Wosoo hät dai apostel Paulo weese dat hai dai fruuges ëre däir?

⁶ Dai apostel Paulo hät Timóteo andenke hulpe dat hai dai fruuges ëre müst. Hai hät sägt dat Timóteo müst dai “uler fruuges ëre soo as mama” un dai “jong fruuges soo as swesters.” (1 Tim 5:1 un 2) Paulo har Timóteo sër dul hulpe taum aine starke gloobe häwe, åwer hai wüst dat em sijn mama un groosmuter dai airste wäire wat Timóteo “dai hailig sriwt” inlërt hare. (2 Tim 1:5 un 3:14 un 15) As Paulo tau dai romanos sreewe hät, hät hai feel swesters up nåme maint. Hai hät sich bekümert oiwer ales wat sai måkt hare, åwer hät uk eer sägt wodul as hai wërd dår up geewe däir. (Rom 16:1 bet 4, 6, 12 un Fil 4:3)

7. Wat fon frågen ware antwoordet?

⁷ Bet hijr hen häwe wij lërt dat dai Bijbel ni inlëre däit dat dai swesters wënige wërd häwe as dai bruirers. Oos swesters sin lijblig un fraigeewig, sin geschenke tau dai gemainde. Taum dai freere un ainigkët hule ine gemaind daue dai ülste sich up eer forlåte. Åwer wek frågen muite antwoordet ware, soo as: Woweegen wil Jehovaa dat dai swesters öftens eene kop bedeke muite? Dat bloos kërls ülste un hülpsdijners koine sin, kan irgends air braurer ine gemaind her oiwer dai swesters sin?

KAN IRGENDS AIR BRAURER HER SIN OIWER JËRER SWESTER?

8. Soo as stäit in Efésios 5:23, kan irgends air braurer her sin oiwer jërer swester? Dau uutdüüre.

⁸ Në. Bloos Kristus is dai her fon jërer swester ine gemaind. (Lees Efésios 5:23.) Ine familg, dai kërl is dai her oiwer sijn fruug. Air jong wat tauwt is, is ni her oiwer sijn mama. (Efé 6:1 un 2) Un ine gemaind, dai ülste häwe dai recht taum her oiwer dai bruirers un swesters sin. (1 Tes 5:12 un Heb 13:17) Ain swester wat ni forfrijgt is un däit alaine wåne, mut bijblijwe dai papa un mama un dai ülste ëre, åwer soo as dai andrer kërls ine gemaind, een ainsig her is Jësus.

9. Woweegen muite dai swesters öftens eene kop bedeke?

⁹ Jehovaa hät tau dai kërls geewt dai recht taum her oiwer dai gemaind sin un ni tau dai fruuges. (1 Tim 2:12) Woweegen? Soo as Jësus dai amt kreege hät taum her sin oiwer dai kërl, dai kërls häwe dai recht taum her oiwer dai gemaind sin, taum dai gemaind in ordnung hule. Kan passijre dat ain swester air dail måke mut wat air braurer måke müst, wen soo wat passijrt, giwt Jehovaa dai ordnung dat dai fruug eene kop bedekt.c (1 Cor 11:4 bet 7) Jehovaa forlangt dat, ni dat sai wënige wërd häwe, åwer dat sai wijse daue dat sai ëre dai wat dai recht häwe taum her sin. Dat wij nuu dat lërt häwe, wiman’s antwoore dai fråg: Wat häwe dai schefs fone familg un dai ülste oiwer sich?

WAT HÄWE DAI SCHEFS FONE FAMILG UN DAI ÜLSTE OIWER EER?

10. Woweegen kan air ülst leis ine gemaind måke wile?

¹⁰ Dai ülste lijbe Kristus un sai lijbe uk dai wat Jehovaa un Jësus eer oiwergeewt häwe. (João 21:15 bet 17) Dat dai sich sër bekümre oiwer dai bruirers un swesters, air ülst kan maine dat hai soo as air fåter is ine gemaind. Air ülst kan maine wen air papa leis måke kan taum sijn familg behüüte, air ülst kan dat uk måke taum dai gemaind behüüte. Un nog, kan passijre wek bruirers koine air ülst taureere dit måke wen sai forlange dat air ülst wat uutsuike schal in eene stel. Åwer hät dai ülst dai neemlig recht oiwer dai gemaind as dai kërl oiwer sijn familg?

11. Wat is oiwerain tüschen air schef fone familg un air ülst?

¹¹ Doir dat wat dai apostel Paulo sreewe hät, wij koine forståe dat wek daile sin oiwerain tüschen air schef fone familg un air ülst. (1 Tim 3:4 un 5) Soo as, Jehovaa wil dat dai kiner dai schef fone familg horge daue. (Col 3:20) Un hai wil dat dai bruirers un swesters ine gemaind dai ülste horge daue. Jehovaa wil dat dai schefs fone familg un dai ülste gaud uppasse daue dai wat eer oiwergeewt woore sin, doir eer helpe stark in gloobe sin un sich gaud forneeme. Wen bruirers un swesters nood doirsete daue, dai ülste måke ales wat sai koine taum helpe, soo as air gaur schef fone familg måke däit. (Tia 2:15 bet 17) Un nog, Jehovaa wil dat dai ülste un dai schefs fone familg andrer helpe daue em sij leis horge. Åwer hai luurt uk dat sai ni ‘gåe daue oiwer dat wat sreewe stäit’ ine Bijbel. (1 Cor 4:6)

12-13. Soo as stäit in Romanos 7:2 wat is aners tüschen dai amt fon air schef fone familg un dai amt fon air ülst?

¹² Sin feel daile wat aners sin tüschen dai amt wat air ülst hät un dai amt wat air schef fone familg hät. Soo as, Jehovaa hät tau dai ülste geewt dai recht taum gerichte. Sai koine ruuterschike fone gemaind air wat groot süün måkt hät un wat sich ni lëd daue wil. (1 Cor 5:11 bet 13)

¹³ Åwer tau dai schef fone familg Jehovaa hät dat geewt wat hai ni geewt hät tau dai ülste. Jehovaa hät tau dai schef fone familg geewt dai recht taum leis måke ine familg un forlange dat dës leis horgt ware. (Lees Romanos 7:2.) Soo as, dai schef fone familg hät dai recht taum uutsuike wat fon stuun as sijn kiner na huus kåme muite ine nacht. Un wen em sijn kiner ni horge daue dës leis, hai hät dai recht taum eer streng formåne. (Efé 6:1) Åwer airer as ain lei måke, air lijblig schef däit mit sijn fruug fortele, weegen sai bëd sin “soo as air.”d (Mat 19:6)

DAU KRISTUS ËRE SOO’S DAI HER FON DAI GEMAIND

14. (a) Soo’s stäit in Marcos 10:45 woweegen stimt dat Jehovaa Jësus oiwergeewt hät her sin oiwer dai gemaind? (b) Wat häwe oiwer sich dai Grup Kërls wat Jehovaa sijne arbëd lenkt? (Kijk dai tåfel “Wat fon amt hät dai Grup kërls wat Jehovaa sijne arbëd lenkt?”)

¹⁴ Doir Jësus sij dood Jehovaa hät köft jërer mësch sij leewend ine gemaind un al dai wat Jësus någåe wile. (Lees Marcos 10:45, Atos 20:28 un 1 Cor 15:21 un 22) Dat Jësus sij leewend geewt hät taum oos fraimåke, däit genau stime dat Jehovaa em her måkt hät oiwer dai gemaind. Dat hai oos her is, Jësus hät dai recht taum leis måke wat jërer mësch, familg un gemaind måke muite. Un hai hät recht taum forlange dat wij dës leis horge daue. (Gál 6:2) Åwer Jësus däit ni bloos leis måke, hai däit oos stärke ine gloobe un passt jërer ainsig fon oos up mit lijb. (Efé 5:29)

15-16. Wat häst duu lërt mit dat wat ain swester wat Marley hit un air braurer wat Benjamin hit sägt häwe?

¹⁵ Kristus hät der kërls oiwergeewt dai swesters uppasse, den wen dai swesters dai belërungs någåe daue wat dës kërls geewe, sai daue Kristus ëre. Marley ain swester wat in Estados Unidos wånt, hät wat sägt wat feel swesters uk maine daue. Sai hät sägt: “Ik dau groot wërd geewe tau mijn amt soo as ain swester ine gemaind un tau mijn amt soo as ain forfrigt fruug, ik dau mij sër anstrenge taum ëre dat wat Jehovaa inset hät oiwer dai wat recht häwe taum her sin. Mij kërl un dai bruirers ine gemaind daue mij ümer ëre un mij danke oiwer ales wat ik måke dau, soo wart lichter tau mij sin eer ümer horge.”

¹⁶ Dai bruirers daue wijse dat sai gaud forståe daue wat besägen hät oiwer dai wat recht häwe taum her sin wen sai dai swesters gaud behandle daue. Benjamin air braurer wat in Inglaterra wåne däit, sägt: “Ik dau feel lëre mit dai swesters wat sich mile daue upe forsamlunge, sai daue oos ümer helpe taum beeter studijre un taum beeter preege. Ales wat sai måke daue tau der gemaind hät groote wërd.”

17. Woweegen muite wij ale ëre dat wat Jehovaa inset hät oiwer dai wat recht häwe taum her sin?

¹⁷ Ale blijwe in freere ine gemaind wen kërls, fruuges, schefs fone familg un ülste gaud forståe un ëre daue dat wat Jehovaa inset hät oiwer dai wat recht häwe taum her sin. Un dat haupt, wij ëre oos lijblig Fåter Jehovaa. (Sal 150:6)