२२ “‘यदि तिमीहरूले कुनै गल्ती गऱ्‍यौ र यहोवा परमेश्‍वरले मोसालाई दिनुभएका यी सबै आज्ञा पालन गर्न चुक्यौ २३ अर्थात्‌ यहोवा परमेश्‍वरका ती सबै आज्ञा, जुन यहोवाले तिमीहरूलाई मोसामार्फत दिनुभएको दिनदेखि नै लागू भयो र तिमीहरूपछिका पुस्तौँपुस्तालाई पनि लागू हुनेछ, ती पालन गर्न चुक्यौ २४ अनि यो गल्ती अनजानमा भयो र समुदायलाई यसबारे थाह छैन तर पछि थाह भयो भने पूरै समुदायले अग्निभेटीको रूपमा एउटा बहर चढाओस्‌ र त्यो यहोवा परमेश्‍वरलाई मन पर्ने मीठो बास्ना होस्‌। साथै समुदायले अन्‍नभेटी र मद्यभेटी पनि चढाओस्‌। यी सबै भेटी तिनीहरूले नियमित प्रक्रियाअनुरूपै चढाऊन्‌।+ यसबाहेक तिनीहरूले पापभेटीको लागि बाख्राको एउटा पाठो पनि चढाऊन्‌।+