इजकिएल
२५ यहोवाको यो वचन फेरि मकहाँ आयो। उहाँले मलाई भन्नुभयो: २ “हे मानिसको छोरा, अम्मोनीहरूतिर+ फर्केर तिनीहरूविरुद्ध भविष्यवाणी गर।+ ३ अम्मोनीहरूको विषयमा तिमीले भन्नू, ‘ब्रह्माण्डका मालिक यहोवाको वचन सुन। ब्रह्माण्डका मालिक यहोवा यसो भन्नुहुन्छ: “मेरो मन्दिर अपवित्र हुँदा, इस्राएलको भूमि उजाड हुँदा अनि यहुदाको घरानालाई कैद गरेर लगिँदा तिमीहरूले ‘बेसै भयो!’ भन्दै गिज्यायौ। ४ त्यसकारण म तिमीहरूलाई पूर्वका मानिसहरूको* हातमा सुम्पिनेछु। तिनीहरूले तिमीहरूको भूमिमा छाउनी* हाल्नेछन् र पाल टाँग्नेछन्। तिमीहरूको भूमिको उब्जनी तिनीहरूले खानेछन् र तिमीहरूका भेडाबाख्राको दूध पिउनेछन्। ५ राब्बाहलाई+ म उँटहरू चर्ने ठाउँ र अम्मोनीहरूको बस्तीलाई भेडाबाख्राको गोठ बनाउनेछु। अनि म नै यहोवा हुँ भनेर तिमीहरूले जान्नेछौ।”’”
६ “ब्रह्माण्डका मालिक यहोवा यसो भन्नुहुन्छ: ‘इस्राएलको दुर्गति देख्दा तिमीहरूले थपडी माऱ्यौ,+ बुर्लुक-बुर्लुक उफ्रियौ र हर्ष मनायौ। यसरी तिमीहरूले इस्राएललाई गिज्यायौ।+ ७ त्यसैले म तिमीहरूविरुद्ध आफ्नो हात उठाउनेछु र तिमीहरूलाई अरू जातिको हातमा सुम्पिनेछु र तिनीहरूले तिमीहरूलाई लुट्नेछन्। म तिमीहरूको नामोनिसान मेटिदिनेछु र तिमीहरूको भूमिबाट तिमीहरूलाई नष्ट गर्नेछु।+ म तिमीहरूको सर्वनाश गर्नेछु। तब म नै यहोवा हुँ भनेर तिमीहरूले जान्नेछौ।’
८ “ब्रह्माण्डका मालिक यहोवा यसो भन्नुहुन्छ: ‘मोआब+ र सेइरले+ “यहुदाको घराना पनि अरू जातिजस्तै त हो नि” भनेकोले ९ म मोआबको पाखा—त्यसको सिमानामा रहेका सुन्दर-सुन्दर सहरहरू बेथ-यसिमोथ, बाआल-मोन र किर्यथैमसमेत+ शत्रुहरूका लागि खुला छोडिदिनेछु। १० म अम्मोनीहरूसँगसँगै मोआबीहरूलाई पनि पूर्वका मानिसहरूको हातमा सुम्पिदिनेछु।+ यसरी अम्मोनीहरूको नामोनिसान मेटिनेछ।+ ११ म मोआबमा तिनीहरूलाई दण्ड दिनेछु।+ तब म नै यहोवा हुँ भनेर तिनीहरूले जान्नेछन्।’
१२ “ब्रह्माण्डका मालिक यहोवा यसो भन्नुहुन्छ: ‘एदोमले बदलाको भाव राख्दै यहुदाको घरानालाई आक्रमण गरेर ठूलो अपराध गरेको छ।+ १३ त्यसैले ब्रह्माण्डका मालिक यहोवा यसो भन्नुहुन्छ: “म एदोमविरुद्ध पनि आफ्नो हात उठाउनेछु र त्यहाँ भएका मानिस, वस्तुभाउ दुवैलाई सखाप पार्नेछु। म त्यसलाई उजाड पार्नेछु।+ तेमानदेखि ददानसम्म सबैलाई म तरबारले नाश गर्नेछु।+ १४ ब्रह्माण्डका मालिक यहोवा घोषणा गर्नुहुन्छ: ‘इस्राएलका मेरा मानिसहरूको हातबाट म एदोमसित बदला लिनेछु।+ तिनीहरूले मेरो रिस र मेरो क्रोध एदोममाथि खन्याउनेछन् अनि म कसरी बदला लिँदो रहेछु भनेर एदोमले थाह पाउनेछ।’”’+
१५ “ब्रह्माण्डका मालिक यहोवा यसो भन्नुहुन्छ: ‘पलिस्तियालीहरूले मेरा मानिसहरूसित इबी राख्दै* उनीहरूलाई नाश गरेर बदला लिन खोजेका छन्।+ १६ त्यसैले ब्रह्माण्डका मालिक यहोवा भन्नुहुन्छ: “हेर, म पलिस्तियालीहरूविरुद्ध आफ्नो हात उठाउनेछु।+ म कराथीहरूलाई+ र समुद्री किनारमा जो-जो बाँकी छन्,+ तिनीहरू सबैलाई नाश गर्नेछु। १७ तिनीहरूलाई कडाभन्दा कडा सजाय दिएर म तिनीहरूसित बदला लिनेछु। तब म नै यहोवा हुँ भनेर तिनीहरूले जान्नेछन्।”’”