इजकिएल
१२ यहोवाको वचन फेरि मकहाँ आयो। उहाँले मलाई भन्नुभयो: २ “हे मानिसको छोरा, तिमी विद्रोही घरानाका मानिसहरूबीच बस्दै छौ। तिनीहरूको आँखा त छ तर देख्दैनन्; कान त छ तर सुन्दैनन्।+ किनभने तिनीहरू विद्रोही घराना हुन्।+ ३ हे मानिसको छोरा, निर्वासनमा जानको लागि सामान पोको पार। अनि दिउँसो तिनीहरूले हेरिरहेको बेला निर्वासनमा जाऊ। तिनीहरूले हेरिरहेकै बेला घरबाट निस्क र अर्को ठाउँमा जाऊ। तिनीहरू विद्रोही घराना भए पनि सायद तिनीहरूले बुझ्लान् कि? ४ दिउँसो तिनीहरूले हेरिरहेकै बेला तिम्रो पोको बाहिर ल्याऊ अनि साँझ तिनीहरूले हेरिरहेकै बेला निर्वासित हुन लागेझैँ गरी निस्क।+
५ “तिनीहरूले हेरिरहेकै बेला भित्तामा प्वाल पार र त्यहीँबाट आफ्नो पोको बाहिर निकाल।+ ६ अँध्यारो भएपछि तिनीहरूले हेरिरहेकै बेला पोको काँधमा बोकेर निस्क। अनि भुईँ नदेख्नेगरि आफ्नो अनुहार छोप। किनभने इस्राएलको घरानाको निम्ति म तिमीलाई एउटा चिन्ह बनाउँदै छु।”+
७ मलाई आज्ञा गरिएअनुसारै मैले सबै गरेँ। निर्वासनमा जान लागेझैँ गरी मैले दिउँसो आफ्नो पोको बाहिर ल्याएँ र साँझ भित्तामा हातैले प्वाल पारेँ। अनि अँध्यारो भएपछि तिनीहरूकै अगाडि पोको काँधमा राखेर निस्किएँ।
८ बिहान यहोवाको वचन फेरि मकहाँ आयो। उहाँले मलाई भन्नुभयो: ९ “हे मानिसको छोरा, इस्राएलको घराना, त्यो विद्रोही जातिले तिमीलाई ‘यो के तमासा गरेको’ भनेर सोधेन? १० तिनीहरूलाई भन, ‘ब्रह्माण्डका मालिक यहोवा यसो भन्नुहुन्छ: “यो यरुसलेमका कुलनायक+ र सहरमा भएको इस्राएलको घरानालाई मैले दिन लागेको दण्डको घोषणा हो।”’
११ “तिनीहरूलाई यसो भन, ‘म तिमीहरूको लागि चिन्ह हुँ।+ मैले जे-जे गरेँ, तिनीहरूलाई पनि त्यही गरिनेछ। तिनीहरू निर्वासनमा लगिनेछन्।+ १२ तिनीहरूका कुलनायक आफ्नो पोको काँधमा बोकेर अँध्यारोमा निस्कनेछन्। तिनले सहरको पर्खालमा प्वाल पार्नेछन् र आफ्नो पोको बोकेर त्यहाँबाट निस्कनेछन्।+ भुईँ नदेख्नेगरि तिनले आफ्नो अनुहार छोप्नेछन्।’ १३ म तिनीमाथि आफ्नो जाल हान्नेछु र तिनी मेरो जालमा पर्नेछन्।+ त्यसपछि म तिनलाई कल्दियालीहरूको देश बेबिलोनमा ल्याउनेछु तर तिनले त्यो देश देख्न पाउनेछैनन् र त्यहीँ तिनी मर्नेछन्।+ १४ तिनका सबै सहयोगी र तिनको सेना, जो तिनको वरपर रहन्छन्, तिनीहरू सबैलाई म चारैतिर तितरबितर पारिदिनेछु+ र म तरबार थुतेर तिनीहरूलाई खेद्नेछु।+ १५ तिनीहरूलाई अरू जातिबीच र देश-देशमा तितरबितर पारेपछि म नै यहोवा हुँ भनेर तिनीहरूले जान्नेछन्। १६ तर म तिनीहरूमध्ये केहीलाई भने तरबार, अनिकाल र महामारीबाट उम्कन दिनेछु र तिनीहरूले आफू जहाँ गए पनि मानिसहरूलाई आफूले गरेका सबै घृणित कामबारे बताउनेछन्। तब म नै यहोवा हुँ भनेर तिनीहरूले जान्नेछन्।”
१७ यहोवाको वचन फेरि मकहाँ आयो। उहाँले मलाई भन्नुभयो: १८ “हे मानिसको छोरा, थरथर काँप्दै रोटी खाऊ; चिन्तित र व्याकुल हुँदै पानी पिऊ।+ १९ अनि देशवासीहरूलाई यसो भन, ‘इस्राएलको यरुसलेममा बस्नेहरूलाई ब्रह्माण्डका मालिक यहोवा यसो भन्नुहुन्छ: “त्यहाँका बासिन्दाहरू हिंस्रक भएकोले+ भूमि पूरै उजाड हुनेछ।+ त्यसैले तिनीहरूले व्याकुल हुँदै रोटी खानेछन् र डरैडरमा पानी पिउनेछन्। २० मानिसहरूले भरिभराउ सहरहरू नाश हुनेछन् र देश उजाड हुनेछ।+ तब तिमीहरूले म नै यहोवा हुँ भनेर जान्नेछौ।”’”+
२१ यहोवाको वचन फेरि मकहाँ आयो। उहाँले मलाई भन्नुभयो: २२ “हे मानिसको छोरा, इस्राएलमा चल्दै आएको यो उखान के हो: ‘दिनहरू बित्दै जान्छन् तर एउटा पनि दर्शन* पूरा हुँदैन’?+ २३ त्यसैले तिनीहरूलाई भन, ‘ब्रह्माण्डका मालिक यहोवा यसो भन्नुहुन्छ: “म यो उखानको अन्त गरिदिनेछु र इस्राएलमा फेरि कहिल्यै यो उखान चलाइनेछैन।”’ तर तिनीहरूलाई यसो भन, ‘दिन नजिकै छ+ र एक-एक दर्शन पूरा हुनेछ।’ २४ त्यसपछि इस्राएलको घरानामा कसैले पनि झूटा दर्शन देख्नेछैन र जोखना हेरेर फुस्लाउने* कुरा गर्नेछैन।+ २५ ‘ब्रह्माण्डका मालिक यहोवा घोषणा गर्नुहुन्छ: “किनकि म यहोवा तिमीहरूसित बोल्नेछु। मेरो मुखबाट निस्कने वचनले बियाँलो गर्नेछैन।+ ए विद्रोही घरानाका मानिसहरू, मैले जे बोलेँ, तिमीहरूकै जीवनकालमा+ त्यो पूरा पनि गर्नेछु।”’”
२६ यहोवाको वचन फेरि मकहाँ आयो। उहाँले मलाई भन्नुभयो: २७ “हे मानिसको छोरा, इस्राएलका मानिसहरू* यसो भन्दै छन्, ‘त्यसले देखेको दर्शन धेरै पछि मात्र पूरा हुन्छ; त्यसले गरेको भविष्यवाणी पूरा हुने कहिले हो कहिले!’+ २८ त्यसैले तिनीहरूलाई भन, ‘ब्रह्माण्डका मालिक यहोवा भन्नुहुन्छ: “‘मेरो हरेक वचन समयमै पूरा हुनेछ; मैले बोलेको कुरा अवश्य पुग्नेछ,’ ब्रह्माण्डका मालिक यहोवा घोषणा गर्नुहुन्छ।”’”