“रमाइलो शनिबारको लागि साक्षीहरूलाई मेरो धेरै धेरै धन्यवाद”
नर्वेका ब्यूँझनुहोस्! संवाददाताद्वारा
टेलेमार्क आर्बेइडर्ब्ला भन्ने नर्वेली दैनिकका स्तम्भकार एभिन बिल्कस्टाले आफ्नो लेखको माथि उल्लिखित शीर्षक राखेका थिए। लेखको सुरुमा तिनले विशेषगरि शनिबार बिहान चिन्नु न जान्नु ढोकामै मालसामान बेचबिखन गर्न आउनेहरू, मालसामान बेच्न फोनबाट मोलतोल गर्नेहरू र घरमा आउने आगन्तुकहरूप्रति आफ्नो दिक्कदारी पोखे। त्यसपछि तिनले लेखे:
“अचानक तिनीहरू आइपुगे। ढोकैमा। को? यहोवाका साक्षीहरू। शनिबार बिहान। तिनीहरूको हातमा संख्या १७, सेप्टेम्बर ८, १९९६ को ब्यूँझनुहोस्! पत्रिका [“अमेरिकन इण्डियन्स्—तिनीहरूको भविष्य कस्तो छ?” (अंग्रेजी)] थियो। त्यो पत्रिकामा मलाई मन पर्ने विषय छ भन्ने विश्वास व्यक्त गर्दै तिनीहरूले त्यो पत्रिका पढ्न मलाई आग्रह गरे। . . . मलाई चासो छैन भन्नुअघि नै तिनीहरूमध्ये एकले अझै यसो भने: ‘यस पत्रिकामा अमेरिकन इण्डियनहरूबारे लेखिएको छ। अनि तपाईंले पनि यही विषयमा प्रशस्त लेखहरू लेख्दै हुनुहुन्छ भनेर हामीलाई थाह छ।’
“फुत्कने मौकै पाइनँ। मेरो कामको प्रशंसा गर्ने व्यक्तिको कुरा कसरी काट्ने? बिहान चमेना गर्दा त्यो पत्रिका पढ्न मलाई सकसक लाग्न थाल्यो। वास्तवमा यहोवाका साक्षीहरूले अमेरिकन इण्डियनहरूको भविष्यबारे लेख्नु मलाई असाध्यै अनौठो लाग्यो। त्यसैकारण, चस्मा लगाएँ र पढ्न थालें। यहोवाका साक्षीहरूको पत्रिका पढ्नु समयको बर्बादी सिवाय केही होइन भन्ने धारणा राख्दै पढें।
अमेरिकन इण्डियनहरूबारे यहोवाका साक्षीहरूले प्रस्तुत गरेको लेख राम्रो मात्र होइन अत्युत्तम थियो। म नर्वेली शिक्षकशिक्षिकाहरूलाई आ-आफ्नो पूर्वाग्रह दबाउने सुझाउ दिन्छु। आफ्नो कक्षाका प्रत्येक विद्यार्थीको निम्ति एक एक प्रति पुग्ने गरी यो पत्रिका मगाउनुहोस्! विषयवस्तु सह्रानीय हुनुका साथै शिक्षकहरूका निम्ति उपयोगी हुने ढंगमा प्रस्तुत गरिएको छ र प्रस्ट छ। त्यसबाहेक, इण्डियनहरू र यहोवाका साक्षीहरूको विचार कहाँ कहाँ कसरी बाझिएको छ, त्यसबारे एउटै कुरा नलुकाई सबै सुस्पष्ट बताइएको छ। साक्षीहरूले आफ्नो र इण्डियनहरूको कुनै कुनै विचार मेल खाँदैन भनेर लुकाउन खोजेका छैनन्। धेरैजसो इण्डियन बस्तीहरूमाथि आइपरेको एउटा विपत् जुवाघरहरूको स्थापना हो। यी जुवाघरहरूले खाँचोमा परेका धेरैजसोलाई जागिर त दिन्छन् तर यसमा नैतिकताको कुरा पनि बिथोलित छ। यससम्बन्धी उठाइएको प्रश्नको जवाफ यति कौशलतासाथ दिइएको छ कि आज हाम्रो समयमा एउटा इण्डियन भएर बाँच्नुपर्दा कस्तो हुन्छ, पाठकहरूलाई छर्लंग हुन्छ।”
बिल्कस्टा अन्तमा यसो भन्छन्: “इण्डियनहरूबारे लेखिएको लेख पढेर मेरो जाँगर बढेको हुनाले सम्पूर्ण ब्यूँझनुहोस्! नै पढी सिध्याएँ। बोनसस्वरूप मैले वेल्सस्थित रोन्डाको खानी उपत्यकामा बन्द भइरहेका च्यापेल र चर्चहरूको मार्मिक लेख पनि पढ्न पाएँ। . . .
के मेरो सुद्धिबुद्धि नै हराएको हो? नास्तिक भइकन पनि यहोवाका साक्षीहरूको विश्वासलाई निर्विरोध स्वीकारेको हो? . . . आज चाहिं पक्कै हो। पूर्वाग्रहको भित्तालाई भत्काउनैपर्ने आवश्यकताबारे हामीलाई बारम्बार सम्झाइरहनु आवश्यक छ। कथनकदाचित कतै कसैले यहोवाका साक्षीहरूलाई ढँटुवा भन्ने आरोप लगाएको सुनें भने कम्तीमा तिनीहरूले अमेरिकन इण्डियनहरूबारे त पटक्कै झूटो कुरा गरेका थिएनन् है भन्न म विश्वस्त हुनेछु।”
मूल अमेरिकीहरूबारे ब्यूँझनुहोस्!-को यो अंकको विशेष माग गरिएकोले न्यु योर्कस्थित वाचटावर सोसाइटीको छापाखानामा थप ३७,००० प्रतिहरू छापिए। अरिजोनाको एउटा मण्डलीले त आफ्नो इलाकाको कुनाकाप्चासम्म यो अंक पुऱ्याउन १०,००० प्रति मगाएका थिए।
तपाईं पनि पूर्वाग्रह नराखी यहोवाका साक्षीहरूबारे जानकारी प्राप्त गर्न चाहनुहुन्छ भने कृपया पृष्ठ ५ मा दिइएको तपाईंलाई नजिकै पर्ने ठेगानामा यस पत्रिकाका प्रकाशकलाई बिना हिचकिचाहट पत्र पठाउनुहोस् वा स्थानीय राज्यभवनमा सम्पर्क राख्नुहोस्। कुनै कर छैन, पैसा पनि पर्दैन। तपाईंले सही जवाफ पाउनुहुन्छ।
[पृष्ठ २७-मा भएको चित्रको स्रोत]
इण्डियन अनुहार: D. F. Barry Photograph, Thomas M. Heski Collection; नाचिरहेका इण्डियन: पुरुषहरू: A Pictorial Archive from Nineteenth-Century Sources/Dover Publications, Inc.;टीप्पीज्: Leslie’s; आयतकार बुट्टा: Decorative Art; गोलाकार बुट्टा: Authentic Indian Designs