परमेश्वरले अवश्यै चासो राख्नुहुन्छ!
अदनमा सुरु भएको विद्रोह समाधान गर्न परमेश्वरले जुन तरिका चलाउनुभयो, त्यसबाट उहाँ हामी प्रत्येकलाई असाध्यै प्रेम गर्नुहुन्छ र हाम्रो भविष्यप्रति चिन्ता लिनुहुन्छ भनेर स्पष्ट हुन्छ। परमेश्वरले साँच्चै हाम्रो चिन्ता लिनुहुन्छ भनी बुझ्न तल दिइएको प्रमाणलाई कृपया विचार गर्नुहोस् र त्यहाँ दिइएका बाइबल पदहरू आफ्नो बाइबल खोलेर पढ्नुहोस्।
❖ उहाँले हामीलाई प्राकृतिक सौन्दर्यले भरिएको, आकर्षक पशु-प्राणीहरूले भरिभराउ र प्रशस्त उब्जनी हुने पृथ्वी दिनुभएको छ।—प्रेरित १४:१७; रोमी १:२०.
❖ उहाँले हामीलाई दिनदिनै आनन्द उठाउन सक्ने अद्भुत शरीर दिनुभएको छ। जस्तै: स्वदिष्ठ खानेकुरा खाँदा, सूर्योदयको मनोरम दृश्य हेर्दा, स-साना बालबालिका हाँसेको सुन्दा र प्रियजनको कोमल स्पर्श पाउँदा हामी आनन्द महसुस गर्छौं।—भजन १३९:१४.
❖ उहाँले हामीलाई समस्या र दबाबहरू सामना गर्न बुद्धिमानी डोऱ्याइ दिनुहुन्छ।—भजन १९:७, ८; ११९:१०५; यशैया ४८:१७, १८.
❖ उहाँले हामीलाई अद्भुत आशा दिनुहुन्छ जसमा पार्थिव प्रमोदवनमा बस्न पाउने प्रत्याशा र प्रिय मृतजनहरू ब्यूँत्याइएको हेर्न पाउने कुरा समावेश छन्।—लूका २३:४३, NW; यूहन्ना ५:२८, २९.
❖ हामीले सधैंभरि बाँच्ने आशा पाउन सकून् भनी उहाँले आफ्ना एकलौटो पुत्र मर्न पृथ्वीमा पठाउनुभयो।—यूहन्ना ३:१६.
❖ उहाँले स्वर्गमा मसीही राज्य स्थापित गर्नुभएको छ र त्यस राज्यले अब चाँडै पृथ्वीमाथि पूर्ण नियन्त्रण जमाउनेछ भनेर प्रशस्त प्रमाण पनि दिनुभएको छ।—यशैया ९:६, ७; मत्ती २४:३, ४, ७; प्रकाश ११:१५; १२:१०.
❖ उहाँले हामीलाई प्रार्थनामा कुरा गर्न, आफ्नो मनको कुरा पोखाउन निमन्त्रणा दिनुहुन्छ र त्यसो गर्दा उहाँले त्यो सुन्नु पनि हुन्छ।—भजन ६२:८; १ यूहन्ना ५:१४, १५.
❖ उहाँ मानिसजातिलाई असाध्यै प्रेम गर्नुहुन्छ र तिनीहरूको चिन्ता गर्नुहुन्छ भनेर बारम्बार आश्वासन दिनुहुन्छ।—१ यूहन्ना ४:९, १०, १९. (g 11/06)