निडर भान्जा

अब हामी एउटा मान्छेको कथा सुनौं। उसले आफ्नो मामालाई बचाएको थियो। त्यो मान्छेको मामा प्रेषित पावल थियो। त्यो मान्छेको नाम त हामीलाई थाह छैन। तर हामीलाई उसले गरेको कामचाहिं थाह छ। उसले नडराईकन एउटा ठूलो काम गऱ्‍यो। उसले के गऱ्‍यो तिमीलाई थाह छ?—

पावल यरूशलेम भन्‍ने ठाउँको जेलमा थियो। पावलले अरूलाई येशूको कुरा सुनाएकोले सिपाहीहरूले उसलाई जेलमा हालेका थिए। केही खराब मान्छे पावललाई मन पराउँदैनथे। त्यसैले तिनीहरूले पावललाई मार्ने विचार गरे। तिनीहरूले यस्तो सल्लाह गरे: ‘अब हामी सेनापतिसित कुरा गरौं। पावललाई अदालतमा ल्याऊ भनौं। हामीचाहिं बाटोमा लुकेर बसौं अनि अदालत पुग्नुअघि नै त्यो पावललाई मारिदेऔं।’

पावलको भान्जाले यो कुरा थाह पाउँछ। तिम्रो विचारमा उसले के गऱ्‍यो? ऊ जेलमा गयो र पावललाई सबै कुरा बतायो। पावलले आफ्नो भान्जालाई ‘तुरुन्तै गएर यो कुरा सेनापतिलाई बताइदेऊ’ भन्यो। सेनापति भनेको सिपाहीहरूको ठूलो मान्छे हो। पावलको भान्जालाई सेनापतिसित कुरा गर्न सजिलो भयो होला त?— पक्कै भएन। तर पावलको भान्जाले नडराईकन सेनापतिलाई सबै कुरा बताइदियो।

अब के गर्नुपर्छ भनेर सेनापतिलाई थाह थियो। पावललाई बचाउन उसले लगभग ५०० जना सिपाही खटायो! पावललाई त्यही राती सिजरियामा लैजाओ भनेर उसले सिपाहीहरूलाई आदेश दियो। पावललाई केही भयो कि भएन?— हो, ती खराब मान्छेहरूले पावललाई केही पनि गर्न सकेनन्‌! तिनीहरूले सोचेको जस्तो हुन पाएन।

यो कथाबाट तिमीले के सिक्यौ?— तिमी पनि पावलको भान्जाजस्तै निडर हुनुपर्छ। मान्छेहरूलाई यहोवाको कुरा बताउने बेलामा हामी डराउनु हुँदैन। तिमी पनि नडराईकन यहोवाको कुरा अरूलाई सुनाउँछौ?— सुनायौ भने तिमीले पनि अरूलाई बचाउन सक्छौ।