बट्टाको भोजनले साक्षी दिन्छ
गत जनवरी महिना जापानको कोबे शहरमा भूकम्प गएको केही दिनपछि प्रभावित क्षेत्रका मानिसहरूलाई खानेकुरा प्राप्त गर्न साह्रै गाह्रो भएको थियो। तर आफ्ना मित्रहरूको दयालु सहयोगले गर्दा यहोवाका साक्षीहरू भोकै बस्नुपरेन। भूकम्प गएको पहिलो दुइ तीन दिनसम्म नजीकैका मण्डलीहरूले भातको लड्डु खुवाए। त्यसपछि चाँडै नै तिनीहरूका चिन्तित मित्रहरूले बट्टामा भोजन राखेर दिन थाले। ती बट्टाहरूमा थुप्रै मित्रहरूले सानो पर्चामा आफ्नो चिन्ता व्यक्त गरेर बट्टामा टाँसेका थिए। बट्टाको भोजन पाउनेजति सबैले ती पर्चा पढ्दा आफ्नो आँसु थाम्न नसकेर भोजन आँसुले “नुनिलो” भएको कुरा बताए।
यहोवाका साक्षीहरूले खाँचोमा परेका अन्य मानिसहरूलाई पनि भोजन बाँडे। एउटै कम्पनीमा काम गर्ने गैर-साक्षी सहकर्मीसँग गाडीमा यात्रा गर्दा एक जना साक्षी त्यो बट्टाको भोजन खाँदैथिए। तिनले आफ्नो सहकर्मीलाई पनि भोजन दिए।
“तपाईंले यो भोजन कहाँ किन्नुभयो”, सहकर्मीले सोधे। त्यसपछि हाम्रो भाइले साक्षीहरूको राहत कार्यबारे बताए। “मैले तरकारी नखाएको निकै दिन भइसक्यो। त्यसकारण अलिकता तरकारी म मेरो परिवारका लागि पनि लैजान्छु।” त्यो मानिसले मूल्यांकन जाहेर गर्दै भने।
तेस्रो पटक पनि त्यस्तैगरि बट्टाको भोजन पाएपछि त्यो सहकर्मीले ३,००० जापानी येन (करिब ३५ अमेरिकी डलर) साक्षीलाई दिंदै यसो भने: “म तपाईंहरूको कामसित परिचित छु। त्यसैले म यो पैसा चन्दास्वरूप दिन चाहन्छु। र तपाईंले आफ्नो भोजन मसित बाँड्नु भएकोमा म आफ्नो मूल्यांकन पनि जाहेर गर्छु। तपाईंका मित्रहरू साँच्चै असल हुनुहुँदोरहेछ।”