राज्य उद्घोषकहरूका रिपोर्ट
प्रजातान्त्रिक गणतन्त्र कंगोका युवाहरू परमेश्वरको प्रशंसा गर्छन्
शताब्दीयौंअघि भजनरचयिताले युवाहरूलाई अनन्तका महाराजाको प्रशंसा गर्न न्यानो निमन्त्रणा दिंदै यसो भने: “जवान ठिटा र कुमारीहरू, वृद्ध मानिस र केटी-केटीहरू . . . सबैले परमप्रभुको नाउँको प्रशंसा गरून्, किनकि उहाँको नाउँ मात्रै उच्च मानिएको छ।” (भजन १४८:१२, १३) यस अतुलनीय सुअवसरलाई प्रजातान्त्रिक गणतन्त्र कंगोबाट प्राप्त निम्न अनुभवहरूले प्रकाश पार्छन्।
• यहोवाका साक्षीहरूको आचरण देखेर एक विशेष अग्रगामीका घरधनी असाध्यै प्रभावित भए। यसकारण, तिनले साक्षीहरूलाई आफ्नी पाँच वर्षकी छोरी फिफिसित अध्ययन गर्ने अनुमति दिए। बाइबलका कथाहरू भएको मेरो पुस्तकa अध्ययनमा फिफिको प्रगति देखेपछि उनको बुबाले उनलाई राज्यभवनका सभाहरूमा पनि जान दिए। त्यहाँ यस सानी फिफिले साक्षीहरूका गीति पुस्तकबाट राज्य गीतहरू सिकिन्। उनलाई गीत नम्बर ४ सबैभन्दा मन पर्थ्यो। त्यो गीतको शीर्षक थियो, “परमेश्वरले प्रतिज्ञा गर्नुभएको प्रमोदवन।”
एक दिन फिफिका बुबाले उनलाई चर्चमा लैजाने निधो गरे। फिफिले चर्चका गीतहरू गाउन नमानेको देखेर सबै छक्क परे। किन? किनभने उनलाई बुबाको चर्चमा गाइने गीतहरू आफूले बाइबल अध्ययनबाट सिकेका कुराहरूसित नमिलेको जस्तो लाग्यो। त्यो नगाएर बरु साहसी भई आफूलाई सबैभन्दा मन पर्ने राज्य गीत गाइन्।
उनको सोचाइ बदल्न गरिएका अनेक प्रयास असफल भएपछि चर्चका नेताहरूले पाँच वर्षकी फिफिलाई चर्चबाट निकाल्ने निधो गरे! यस्तो दुर्व्यवहारको बावजूद उनको बुबा चुपो लागेर बसे। आफूले विश्वास गरेको कुरामा फिफिले यस्तो अडान लिएकीमा बुबाले गर्व गरे। फिफिका बुबा र आमा, उनले यहोवाका साक्षीहरूसित सरसंगत गर्न नछाडोस् भन्ने चाहन्छन्।
• लुकोडी नाउँका किशोरले यहोवाका साक्षीहरूसित बाइबल अध्ययन गर्ने निर्णय गर्दा तिनको बुबाले असाध्यै विरोध गरे। एक चोटि लुकोडी राज्यभवनमा हुने सभामा जान तयार हुँदा तिनको बुबाले चुपीले हान्ने धम्की दिए। अर्को चोटि भने लुकोडीको बुबाले तिनलाई लट्ठीले हिर्काएर ढाडमा गहिरो घाउ बनाए। अत्यन्तै विरोधको बावजूद लुकोडीले यहोवाको साक्षी बन्ने आफ्नो अडान त्यागेनन्। तिनले प्रगति गरिरहे र बप्तिस्मा लिए। अहिले तिनी नियमित अग्रगामी गर्दैछन्।
लुकोडीकी बहिनी सोना आफ्नो दाइको अडान देखेर असाध्यै प्रभावित भइन् र उनले पनि यहोवाका साक्षीहरूसित बाइबल अध्ययन गर्न थालिन्। अध्ययन गर्नदेखि रोक्न बुबाले सोनालाई कोही पनि साक्षीहरू नभएको अर्को गाउँमा पढ्न पठाए। तैपनि, सोनाले आफूले सिकेका कुराहरू अरूलाई बताउने बानी बसालिन्। परिणामस्वरूप, उनका मामाकी छोरीले पनि चासो देखाउन थालिन्।
सोनाको प्रचार क्रियाकलापबारे नजीकैको गाउँका साक्षीहरूले सुनेपछि उनलाई भेट्न गए र नियमित गृह बाइबल अध्ययनको प्रबन्ध मिलाए। उनले झन् झन् प्रगति गर्न थालिन् र आफ्नो दाइजस्तै यहोवाको समर्पित, बप्तिस्माप्राप्त साक्षी भइन्। साथै, उनको मामाकी छोरी अहिले बप्तिस्मा अप्राप्त प्रकाशक भएकी छिन्। त्यही गाउँमा एउटा पुस्तक अध्ययन पनि सञ्चालन हुन्छ।
स-साना केटाकेटीहरूले पनि यहोवाको नाउँ प्रशंसा गर्नमा साथ दिनु ज्यादै अद्भुत तथा स्फूर्तिदायी कुरा हो!
[फुटनोट]
a वाचटावर बाइबल एण्ड ट्राक्ट सोसाइटीद्वारा प्रकाशित।