अनन्त जीवन रोज्नुहोस्
अहिलेजति छनौटहरू पहिला धेरैजसोले कहिल्यै गर्नुपरेको थिएन। उदाहरणका लागि, हाम्रो लुगाफाटा, भोजन, कहाँ काम गर्ने र कहाँ बस्ने इत्यादि अक्सर छनौटको कुरा हो। संसारको थुप्रै भागमा आफ्नो जीवनसाथी रोज्ने चलन पनि सामान्य भइसक्यो। तथापि, एउटा छनौट भने अत्यन्तै विशेष छ र यो सबै मानिसजातिको लागि उपलब्ध छ।
बाइबल यसो भन्छ: “धार्मिकतामा लाग्ने मानिसले जीवन पाउँछ, तर दुष्टताको पछि लाग्ने मानिस मृत्युमा पर्छ।” (हितोपदेश ११:१९) अनि येशू ख्रीष्टले यस्तो घोषणा गर्नुभयो: “अनन्त जीवन यही [हो], कि तिनीहरूले तपाईं, एकमात्र सत्य परमेश्वरलाई, र जसलाई तपाईंले पठाउनुभयो, अर्थात् येशू ख्रीष्टलाई चिनून्।”—यूहन्ना १७:३.
हो, हाम्रो सृष्टिकर्ताले हामीलाई अनन्त जीवनतर्फ डोऱ्याउने मार्ग छान्ने सुअवसर प्रदान गर्नुभएको छ! अनन्त जीवन पाउन हामीले के गर्नुपर्छ?
बाइबलअनुसार “धार्मिकतानै जीवनको बाटो हो।” (हितोपदेश १२:२८) हामी अनन्त जीवनको मार्गमा लागेका धार्मिक मानिसहरूमध्ये हुन सक्छौं। कसरी? आफ्नो जीवन परमेश्वरको इच्छा र आज्ञाअनुसार छ या छैन पक्का गरेर। (मत्ती ७:१३, १४) अतः हामी सही निर्णय गरौं र परमेश्वरबाट अनन्त जीवनको आशिष् पाऔं।—रोमी ६:२३.