सहायताको लागि पुकारिरहेकाहरूको लागि सान्त्वना
बाइबल मानसिक स्वास्थ्यसम्बन्धी पुस्तक होइन। तथापि, यसले हामीलाई सान्त्वना दिनुका साथै समस्याहरू झेल्नुपरे तापनि जीवनको आनन्द उठाउन मदत गर्छ। त्यसैकारण त धर्मशास्त्र यसो भन्छ: “स्त्रीबाट जन्मेको मानिस अल्प–आयुका र अशान्तिले भरिएको हुन्छ।” (अय्यूब १४:१) हामीले भोग्ने कतिपय परीक्षाहरूको कारण हाम्रो आफ्नै असिद्धता हो। तर मानव दुःखकष्टको लागि मुख्यतया को दोषी छ?
बाइबलले त्यसलाई दियाबल र शैतान भन्ने दुष्ट आत्माको रूपमा चिनाउँछ। त्यसले “सारा संसारलाई ठगिरहेको” छ र मानिसजातिलाई हैरान पार्ने तीन थुप्रो समस्याहरू खडा गरिरहेको छ। यद्यपि, त्यसको समय समाप्त हुँदैछ भनेर पनि बाइबलले बताउँछ। (प्रकाश १२:९, १२) पृथ्वीका बासिन्दाहरूमाथि शैतानले ल्याएका सबै आपत्विपत्हरू चाँडै ईश्वरीय हस्तक्षेपद्वारा अन्त गरिनेछ। बाइबलअनुसार, परमेश्वरले प्रतिज्ञा गर्नुभएको धार्मिकताले बास गर्ने नयाँ संसारले आशाहीनता तथा निराशाको अन्त गर्नेछ।—२ पत्रुस ३:१३.
मानव दुःखकष्ट क्षणिक हो भनेर थाह पाउनु कत्ति सान्त्वनादायी छ! येशू ख्रीष्टको नेतृत्वमा चल्ने परमेश्वरको स्वर्गीय राज्यअन्तर्गत अन्याय र दुःखकष्टको अन्त हुनेछ। परमेश्वरको नियुक्त राजाबारे धर्मशास्त्र यसो भन्छ: “दरिद्रहरूको पुकारा सुनेर उसले छुटकारा दिनेछ। र सहायता नभएका दुःखीहरूलाई उसले छुटकारा दिनेछ। कमजोर र दरिद्रलाई उसले टिठाउनेछ, र दरिद्रहरूको प्राण उसले बचाउनेछ। अत्याचार र थिचोमिचोबाट उसले तिनीहरूको प्राण मोल तिरेर छुटाउनेछ। र उसको दृष्टिमा तिनीहरूको रगत बहुमूल्य हुनेछ।”—भजन ७२:१२-१४.
यी भविष्यसूचक शब्दहरू पूरा हुने समय नजिकै छ। अद्भुत परिस्थितिमाझ पार्थिव प्रमोदवनमा हामी अनन्त जीवनको आनन्द उठाउन सक्छौं। (लूका २३:४३; यूहन्ना १७:३) यी सान्त्वनादायी धर्मशास्त्रीय प्रतिज्ञाहरूको ज्ञानले सहयोगको लागि पुकारा गरिरहेकाहरूलाई आशा तथा सान्त्वना प्रदान गर्छ।
[पृष्ठ ३२-मा भएको चित्रको स्रोत]
Depressed girl: Photo ILO/J. Maillard