नयाँ र अनुभवी दुवै प्रचारकका निम्ति आवश्यकताहरू
१ भजनरचयिता दाऊदले प्रश्न गरे: “हे परमप्रभु, तपाईंको बासस्थानमा कसले बास गर्न पाउनेछ? तपाईंको पवित्र ड़ाँड़ामा को रहनपाउनेछ?” थोरै तर उपयुक्त शब्दहरूमा दाऊदले यसरी उत्तर दिए: “त्यो, जो सोझो मनले हिंड्छ, र धर्म-कर्म गर्छ, र हृदयले सत्य बोल्छ।” (भजन० १५:१, २) ती आवश्यकताहरू परिवर्तन भएका छैनन्। मसीही मण्डलीमा उपासना गर्न आउने सबैले अनैतिक प्रचलनहरू र मतवालापनलाई त्याग्नु पर्छ। यहोवाका जनहरू बीच झगडालु, क्रोधी अथवा दुईजीब्रेहरूका लागि कुनै ठाउँ छैन। नयाँ अथवा अनुभवी प्रचारकहरू जेसुकै भए तापनि परमेश्वरको वचनमा उल्लिखित उच्च स्तर कायम गर्न हामी लगनशील हुनुपर्छ।—गला० ५:१९-२१.
२ धेरै नयाँ व्यक्तिहरू यहोवाको सङ्गठनसित सङ्गत गर्दैछन्। आफ्नो जीवन परमेश्वरका आवश्यकताहरू मुताबिक चलाउन जवान र बुढा दुवैले नै आफ्नो सोचाइमा परिवर्तन गरेका छन्। दक्षिण अमेरिकामा एक जना केटो आमाबाबुको कुनै डोऱ्याई बिना हुर्के र अरू व्यक्तिहरूसित व्यवहार गर्दा गम्भीर समस्याहरू सामना गर्न थाले। ऊ १८ वर्षको उमेर पुगुन्जेल सम्ममा त लागू पदार्थको व्यसनी भइसकेको र आफ्नो दुर्व्यसनलाई चलाउन चोरीको अभियोगमा थुनामा समेत परिसकेको थियो। बाइबल अध्ययनद्वारा तिनले आफ्ना पुराना साथीहरूको सङ्गत छाडे र यहोवाका साक्षीहरूको माझमा नयाँ साथीहरू भेट्टाए। अन्ततोगत्वा तिनले आफ्नो जीवन परमेश्वरलाई समर्पण गरे।
३ त्यस्तै गरी, “धार्मिकता र सत्यताको पवित्रतामा” हाम्रो आचरणद्वारा परमेश्वरलाई खुशी तुल्याउन हामी कटिबद्ध हुनुपर्छ। (एफि० ४:२४) परमेश्वरको पहाडसरी सङ्गठनमा रहिरहने हो भने “पुरानो मनुष्यत्वलाई . . . त्यसका कामहरूसमेत” त्याग्नु र “[हामीहरूले] नयाँ चोला धारण गरेर, . . . पूरा ज्ञानमा परिवर्तन” हुनु हाम्रो जिम्मेवारी हो।—कल० ३:९, १०.
४ परमेश्वरको वचन, एउटा शक्तिशाली प्रभाव: बाइबलद्वारा प्रकट भएको परमेश्वरको व्यक्तित्वले एकदम जोडदार रीतिमा हाम्रो सोचाई र कार्यहरूलाई सकारात्मक ढङ्गमा असर गर्न सक्छ। (रो० १२:२) उहाँको वचनमा मन परिवर्तन गराउने र हृदय जाँच गर्ने शक्ति छ। (हिब्रू ४:१२) हामीले शुद्ध नैतिक जीवन बिताउन सकौं, जन सेवकाईमा पूर्णतया भाग लिन सकौं र मसीही सभाहरूलाई बेवास्ता नगरौं भन्ने परमेश्वरको इच्छा छ भनेर प्रेरित शास्त्रवचनले सिकाउँछ।
५ अहिलेको कठिन समयमा परमेश्वरका नियमहरू भङ्ग गर्न एक जना मसीहीमाथि ज्यादै दवाबहरू थुप्रिन सक्छ। व्यक्तिगत अध्ययन, पारिवारिक अध्ययन, मण्डलीका सभाहरू अथवा सेवकाईलाई बेवास्ता गरेमा पहिला एकदमै बलियो मसीही पनि विश्वासबाट तर्किएर सम्भवतः खराब आचरणमा फस्न सक्छ। त्यसैकारण त पावलले तिमोथीलाई यसो भनेर लेखे: “आफ्नो विषयमा र आफ्नो शिक्षाको विषयमा होशियार रह।” र “यी कुरामा लागिबस।”—१ तिमो० ४:१६; २ तिमो० २:७.
६ हामी चाहे नयाँ होऔं अथवा वर्षौंको अनुभवबाट परिपक्व भएकाहरू होऔं, हाम्रो जीवन बचाउने हो भने परमेश्वरका आवश्यकताहरूलाई ध्यानमा स्पष्ट राख्नुपर्छ, सेवकाईमा पूर्णतया सन्तुलित र विश्वासलाई बलियो राखिराख्नु पर्छ। (१ पत्रु० १:१३-१६) दिनहुँ परमेश्वरका आवश्यकताहरू पालन गर्नु निता न्त आवश्यक छ।
७ यस सेवा साल १९९३-को अन्तिम महिनामा क्षेत्र सेवकाईमा भाग लिने आफ्नो लक्ष्य बनाउनुहोस्। विश्वासमा बढ्न अरूहरूलाई मदत गर्न र क्षेत्र सेवकाईलाई अझ फलदायी बनाउन कटिबद्ध हुनुहोस्। (रो० १:१२) नियमित रुपमा व्यक्तिगत अध्ययन र पारिवारिक अध्ययन गर्नुका साथै सभाहरूमा लगातार उपस्थित भएर आफ्ना विचारहरूलाई सही कुराहरूमाथि केन्द्रित गर्नुहोस्। (फिलि० ४:८) परमेश्वरका धार्मिक आवश्यकताहरू अनुसार जीवन बिताएर उहाँलाई खुशी तुल्याउने तपाईंको प्रयास बेकारमा जाने छैन।—कल० ३:२३, २४.