के तपाईं यहोवाको धैर्यको मूल्यांकन गर्नुहुन्छ?
१ यहोवा परमेश्वरले धैर्य नगरीकन १०, २० वा त्योभन्दा पनि धेरै वर्षअगाडि नै साक्षी दिने कार्य रोक्नुभएको भए के तपाईंले सच्चाइ सिक्न पाउनुहुने थियो? उहाँले अझ थुप्रै मानिसहरूलाई ‘पश्चात्ताप गर्ने’ मौका दिनुभएकोमा हामी कत्ति कृतज्ञ छौं। यद्यपि, यहोवाको महान् न्यायको दिन “चोर जस्तैगरी आउनेछ।” (२ पत्रु. ३:९, १०) तैपनि, परमेश्वरको धैर्यलाई, उहाँ यस रीतिरिवाजको अन्त गर्न ढीलो गरिरहनुभएको छ भनेर गलत अनुमान लगाउनु हुँदैन।—हब. २:३.
२ मानिसहरू देखेर टिठाउनुहोस्: यहोवाको धैर्य हाम्रो समझ बाहिरको कुरा हो। हामीले यसको उद्देश्यलाई बेवास्ता गर्नुहुँदैन। (योना ४:१-४, ११) यहोवाले मानिसजातिको दयनीय अवस्था देख्नुहुन्छ र तिनीहरूप्रति अनुकम्पा देखाउनुहुन्छ। येशूले पनि त्यस्तै महसुस गर्नुभयो। उहाँले प्रचार गर्नुभएको भीडप्रति टिठाउँदै धेरैभन्दा धेरैले अनन्त जीवन प्राप्त गर्ने सुअवसर पाऊन् भनेर प्रचारको कामलाई उहाँ फैलाउन चाहनुहुन्थ्यो।—मत्ती ९:३५-३८.
३ दुःख तथा प्रकोपहरूको चपेटामा पर्दा सच्चाइ थाह नपाएका मानिसहरूप्रति हाम्रो हृदय छिया छिया हुँदैन र? आजका मानिसहरू पनि “गोठालो नभएका भेड़ाहरूजस्ता” छन् अनि तिनीहरू विभिन्न कुराहरूको सामना गर्न खोज्छन् र संसार भताभुंग भएको देख्छन्। (मर्कू. ६:३४) जोसिलो भई राज्य सुसमाचार प्रचार गरेर हामी असल हृदय भएकाहरूलाई सान्त्वना दिन्छौं र यहोवाको धैर्यको लागि मूल्यांकन जाहेर गर्छौं।—प्रेरि. १३:४८.
४ हाम्रो काम अत्यन्त जरुरी छ: गत वर्ष ३,२३,४३९ जनाले बप्तिस्मा लिए र १,४०,००,००० भन्दा बढी मानिसहरू स्मरणार्थ उत्सवमा उपस्थित भए। त्यत्ति धेरै मानिसहरू यस दुष्ट रीतिरिवाजको विनाशबाट बच्नसक्छन्! “ठूलो भीड” कत्ति विशाल हुनेछ त्यो हामीलाई थाह छैन। (प्रका. ७:९) हामीले पाएको प्रचार गर्ने आज्ञा कहिलेसम्म चालु रहनेछ, हामीलाई थाह छैन। तर यहोवालाई थाह छ। उहाँ सन्तुष्ट नहोउञ्जेल सुसमाचार प्रचार गरिनेछ, “त्यसपछि अन्त हुनेछ।”—मत्ती २४:१४.
५ बाँकी समय पनि घट्दैछ र परमेश्वरको दिन नजिकिंदैछ। (१ कोरि. ७:२९क; हिब्रू १०:३७) निस्सन्देह, “हामीले विश्वास गरेर ठानेको समयभन्दा अहिले मुक्तिको समय हाम्रो नजीकै छ।” (रोमी १३:११) ईश्वरीय धैर्यको उद्देश्यलाई बुझ्नदेखि हामी नचुकौं। बरु, विलम्ब नगरी प्रचार गरौं र धार्मिकताको चाहना गर्नेहरूले यहोवाको महान् कृपा अनुभव गर्न सकून्।