हाम्रो विश्वासले हामीलाई सुकर्म गर्न उत्प्रेरित गर्छ
१ विश्वासको कारण नूह, मोशा अनि राहाब ठोस कदम चाल्न उत्प्रेरित भए। नूहले जहाज बनाए। मोशाले फिरऊनको दरबारमा उपभोग गर्न पाएका अस्थायी सुखसुविधालाई त्यागे। राहाबले जासुसहरूलाई लुकाए अनि तिनीहरूले दिएका निर्देशनहरू पालन गरेर आफ्नो परिवारलाई बचाए। (हिब्रू ११:७, २४-२६, ३१) आज हाम्रो विश्वासले हामीलाई कस्ता सुकर्म गर्न उत्प्रेरित गर्छ?
२ साक्षी दिन: विश्वासले हामीलाई हाम्रो अद्भुत परमेश्वर र चिरकालीन आनन्दका लागि उहाँले प्रबन्ध गर्नुभएका कुराहरूबारे बोल्न उत्प्रेरित गर्छ। (२ कोरि. ४:१३) कहिलेकाहीं हामी साक्षी दिन हिचकिचाउन सक्छौं। तर ‘यहोवालाई सधैं हाम्रो सामने राखेको’ खण्डमा हामी बलियो हुन्छौं र डर कम हुन्छ। (भज. १६:८) त्यसपछि हाम्रो विश्वासले हामीलाई नातेदार, छिमेकी, सहकर्मी, सहपाठीहरू लगायत अन्य व्यक्तिहरूलाई मौका पाउने बित्तिकै सुसमाचार सुनाउन उत्प्रेरित गर्छ।—रोमी १:१४-१६.
३ सभाहरूमा सँगै उपस्थित हुन: सभामा नियमित तवरमा उपस्थित हुनु पनि विश्वासले उत्प्रेरित गर्ने अर्को सुकर्म हो। कसरी? यसले हामी मसीही सभाहरूमा भेला हुँदा परमेश्वरको पवित्र आत्मद्वारा येशू हामीसित हुनुहुन्छ भन्ने हाम्रो बलियो विश्वास प्रदर्शित गर्छ। (मत्ती १८:२०) यसले ‘आत्माले मण्डलीहरूलाई के भन्नुहुन्छ सो सुन्न’ हामी इच्छुक छौं भन्ने कुरा प्रकट गर्छ। (प्रका. ३:६) आफूले प्राप्त गर्ने निर्देशनलाई हामी गम्भीरतासाथ लिन्छौं किनभने हामीलाई सिकाउनुहुने हाम्रो महान् शिक्षक, यहोवा हुनुहुन्छ भनेर हामी हाम्रो विश्वासद्वारा बुझ्छौं।—यशै. ३०:२०.
४ हामीले गर्ने छनौटहरू: नदेखेका कुराप्रतिको बलियो विश्वासले हामीलाई आफ्नो जीवनमा आध्यात्मिक कुरालाई प्राथमिकता दिन उत्प्रेरित गर्छ। (हिब्रू ११:१) यसमा भौतिक सुखसुविधाहरू त्याग्नु पनि समावेश छ। उदाहरणका लागि, एक जना प्राचीनले एकदमै राम्रो सांसारिक जागिर खान अस्वीकार गरे किनभने त्यो जागिर खाएको खण्डमा सभाहरू छुट्ने, परिवारदेखि टाढा हुनुपर्ने र आफ्नो अग्रगामी सेवकाईको काम छोड्नुपर्ने थियो। यहोवाले ‘पहिले उहाँको राज्य र उहाँको धार्मिकता खोजी गर्नेहरूका’ लागि प्रबन्ध मिलाउनुहुनेछ भन्ने बाइबलको आश्वासनमा हामी पनि त्यस्तै पूर्ण भरोसा राख्न सकौं।—मत्ती ६:३३.
५ विश्वासले हाम्रो जीवनमा पार्न सक्ने शक्तिशाली प्रभाव अरूको नजरमा लुक्न सक्दैन। साँच्चै, हाम्रो विश्वास विश्व प्रख्यात छ। (रोमी १:८) त्यसैले आउनुहोस्, हामी सबै आफ्नो सुकर्मद्वारा हाम्रो विश्वास जीवित छ भनेर प्रदर्शित गरौं।—याकू. २:२६.