घरको ढोकामै र टेलिफोनबाट प्रगतिशील बाइबल अध्ययन सञ्चालन गर्नुहोस्
१. बाइबल अध्ययन गर्नुको उद्देश्य के हो?
१ बाइबल अध्ययन सुरु गर्न पाउनु कस्तो आनन्द! तर बाइबल अध्ययन गर्ने इच्छुक मानिस भेट्टाउनु त सुरुवात मात्र हो। बाइबल अध्ययन गर्नुको उद्देश्य त विद्यार्थीलाई ख्रीष्टको साँचो चेला बन्न मदत गर्नु हो। (मत्ती २८:१९, २०) तर कसरी त्यो उद्देश्य पूरा गर्न सक्छौं?
२. घरको ढोकामै र टेलिफोनबाट बाइबल अध्ययन गर्नु किन प्रभावकारी हुन्छ?
२ व्यस्त मानिसहरू: आजभोलि मानिसहरू झन्-झनै व्यस्त हुँदैछन्। कतिपय ठाउँमा मानिसहरू बाइबल अध्ययनको लागि पूरै एक घण्टा दिन सुरु-सुरुमा तयार हुँदैनन्। यसैकारण, त्यस्ता मानिसहरूलाई मदत दिन घरको ढोकामै वा टेलिफोनमा बाइबल अध्ययन सञ्चालन गर्न हामीलाई प्रोत्साहन दिइएको छ। सुरु-सुरुमा यसरी गरिने अध्ययन छोटो हुन्छ र बाइबलले सिकाउँछ जस्ता पुस्तकबाट एक/दुइटा अनुच्छेद पढेर केही बाइबल पदहरू छलफल गरिन्छ। थुप्रै प्रकाशकले यसरी घरको ढोकामै र टेलिफोनबाट बाइबल अध्ययन सञ्चालन गरिरहेका छन्। कत्ति राम्रो कुरा!
३. घरको ढोकामै गरिने बाइबल अध्ययनको समय बढाउने प्रयास किन गर्नुपर्छ?
३ तर के घरको ढोकामै मात्र बाइबल अध्ययन गरिरहनु ठीक होला त? अहँ। नयाँ अध्ययनको सुरु-सुरुतिर आफूले तोकेको भन्दा लामो समयसम्म छलफल गरिरहनु राम्रो कुरा होइन। तर मे १९९० को हाम्रो राज्य सेवकाई, पृष्ठ ४ मा यस्तो भनिएको छ: “अध्ययन राम्रैसित सञ्चालन भइरहेको छ र घरधनीको चासो पनि बढ्दैछ भने समय अलि बढाउन सकिन्छ।” यसो गर्नै पर्छ, नगरी हुँदैन। उदाहरणका लागि: खानै नपाएर सुकिसकेको बच्चालाई ऊ राम्रोसँग खान सक्ने नभइन्जेल सुरु-सुरुमा त अलि-अलि गरेर मात्र खुवाइन्छ। तर ऊ पुनः तन्दुरुस्त भएर हलक्क बढ्नको लागि भने पछि-पछिसम्म पनि थोरै मात्र खाना दिइरहेर पटक्कै पुग्दैन। त्यसै गरी, बाइबल विद्यार्थी पनि परमेश्वरको सेवामा पूरा बढेको मानिस हुन तिनलाई थप औपचारिक र नियमित अध्ययनको खाँचो पर्छ।—हिब्रू ५:१३, १४.
४. घरभित्र बाइबल अध्ययन सञ्चालन गर्दा के-कस्ता फाइदा हुन्छ?
४ घरभित्र इबल अध्ययन: बाइबल अध्ययन घर वा अन्य त्यस्तै ध्यान भंग नहुने उपयुक्त ठाउँमा सञ्चालन गर्नु बेस हुन्छ। यस्तो परिस्थितिमा सिक्न सजिलो हुनुका साथै परमेश्वरको वचनको भाव बुझ्न मदत मिल्छ। (मत्ती १३:२३) अनि शिक्षकले पनि विद्यार्थीको आवश्यकताअनुसार अध्ययनको विषयवस्तुलाई ढाल्न सक्छ। यसबाहेक, अध्ययनको समय बढाउँदा विश्वास दह्रो हुने गरी परमेश्वरको वचनको अझ विस्तृत अध्ययन गर्न सकिन्छ।—रोमी १०:१७.
५. ढोकाबाट घरभित्र अध्ययन सार्न हामी के गर्न सक्छौं?
५ ढोकामा गर्दै गरेको अध्ययनलाई तपाईं कसरी घरभित्र सार्न सक्नुहुन्छ? एकछिन-एकछिन गरी दुई/चार पटक बाइबल अध्ययन गरिसकेपछि कुनै निश्चित समयमा अलि लामो समय अध्ययन गर्ने प्रस्ताव राखे कसो होला? अथवा सीधै नभनी यसो पनि भन्न सक्नुहुन्छ, “तपाईंसित आज बसेरै अध्ययन गर्न मिल्छ होला?” वा “आज तपाईं कति समय अध्ययन गर्न सक्नुहुन्छ?” तर सकारात्मक जवाफ नआएमा ढोकामै अध्ययन जारी राखि राख्नुपर्छ। अनि पछि फेरि उपयुक्त समयमा घरभित्र बाइबल अध्ययन गर्ने कुरा बताउन सक्नुहुन्छ।
६. कुन उद्देश्यसहित हामीले आफ्नो सेवकाई पूरा गर्नुपर्छ र यस लेखमा दिइएका सल्लाहहरूले यो उद्देश्य पूरा गर्न कसरी मदत पुऱ्याउँछ?
६ योग्य व्यक्तिहरूलाई खोज्दा बाइबल अध्ययन सुरु गर्नु र सञ्चालन गर्नुको उद्देश्यलाई हामी नबिर्सौं। हाम्रो लक्ष्य भनेको स्वच्छ हृदय भएका व्यक्तिलाई यहोवाप्रति आफ्नो जीवन समर्पण गर्न र बप्तिस्मा लिन मदत दिनु हो। यस उद्देश्यसहित सेवाको काम पूरा गर्ने हाम्रो प्रयासमा यहोवाले आशिष् देऊन्!—२ तिमो. ४:५.