राज्य प्रचारकहरूका रिपोर्ट
२५ वर्ष सम्म नन् भएकी एक जनाले अन्तमा गएर सत्य सिक्तछिन्
बाइबलमा भविष्यवाणी गरिएको थियो कि सारा जातिबाट लिइएको “एउटा ठूलो भीड़” यहोवाको आत्मिक मन्दीरमा आएर उपासना गर्नेछ। (प्रकाश ७:९) यो आज भइरहेछ, र परमेश्वरको सत्यको मदतद्वारा, धेरैले यसरी झूटो धर्मको बन्धनलाई तोड़िरहेको देख्न पाउँदा हामीलाई खुशी लाग्दछ। निम्नलिखित अनुभवहरूले यस कुरालाई प्रदर्शित गर्दछ।
▫ ईटलीको रोममा एकजना आइमाई वर्णन गर्छिन्: “केटाकेटी देखिन् एउटा नन् हुने मेरो ठूलो अभिलाषा थियो, किनभने म आफ्नो सारा हृदयले परमेश्वरको सेवा गर्न चाहन्थें। दिसम्बर ८, १९६० मा, ३२ वर्षको उमेरमा, आज्ञाकारिता, गरीबी, र पबित्रताको ब्रत (शपथ) मैले प्रथम पटक लिएर मेरो सो महत्त्वाकाङ्क्षा पूरा गर्न सकें। करीब ३० जना गरीब र परित्यक्त अनाथहरू वा झ्यालयानमा भएकाहरूका छोरा-छोरीहरूको हेरचाह गर्ने मेरो जिम्मावारी थियो। मैले त्यस काममा सन्तोष पाएँ।
“संस्थाभित्र बखेड़ा उठ्न थाले पछि, दस वर्षको सेवा पश्चात मेरो विश्वास धरमरिनु थाल्यो। म सोंच्न थालें, यदि परमेश्वरले हामीलाई निर्देशित गर्दै हुनुहुन्छ भने, उहाँले आफ्नो घरमा यस प्रकारका बखेड़ाहरू र गोलमाल हुने अनुमति किन दिनुभएको।”
ती नन्की एउटी दिदी फ्रांसमा बस्द थिइन् र तिनी यहोवाका एक जना साक्षी थिइन्। तिनले पत्रद्वारा ती नन्लाई साक्षी दिन्थिइन् र न्यु वर्ल्ड ट्रान्सलेशन आफ द होली स्क्रिप्चर्स तिनलाई पठाइन्। ती नन् वर्णन गर्छिन्: “२३ वर्ष पछि, परमेश्वरको वचनसित त्यो मेरो प्रथम सम्पर्क थियो।” त्यस पछि मात्र तिनले यहोवाका साक्षीहरूसँग बाइबल अध्ययन गर्न स्वीकार गरिन्। तिनी भन्छिन्: “अध्ययनमा म जसै प्रगति गर्दै गएं, यहोवा परमेश्वर र उहाँका आवश्यकताहरू र साथै उहाँका अद्भुत गुणहरूलाई जान्न सकें। प्रतिमाहरूको प्रयोग गर्ने कुरामा उहाँको अनुमति छैन भनी सिक्ता मलाई धेरैनै नराम्रो लाग्यो किनभने म बसेको त्यो संस्था हर प्रकार र हर नापका मूर्तिहरूले भरि-भराउ थियो। मैले यहोवालाई खुशी पार्ने हो भने, त्यस ठाउँमा बस्नु हुँदैन भनी मैले बुझें। २५ वर्षसम्म एउटा समर्पित नन् भएर सेवा गरे पछि, मैले अन्तमा गएर सत्य पाएं। त्यसकारण १९८५ को अक्तुबर १ मा मैले, मेरा हाकिमहरूको इच्छा विपरीत, त्यो ठाउँ छाड्ने सूचना (नोटिस) दिएं।
“मेरा मायालु भाइ-बहिनीहरूले आध्यात्मिक र भौतिक दुबै रूपमा मेरो मदत गरे। यहोवा र उहाँको सङ्गठन प्रति कृतज्ञता जाहेर गर्दै, १९८६, अगस्त ३० मा मैले बप्तिस्मा लिएं र अनन्त जीवनको मार्गमा हिंड्न थालें।”
परमेश्वरको सेवा गर्ने एउटी युवतीको इच्छालाई यहोवाले आशिष दिनुहुन्छ
▫ ब्राजिलमा एक जना स्कूल शिक्षिकाले, जो यहोवाका एक जना साक्षी थिइन्, स्कूलका कागतहरूलाई सच्याइ रहेको बेलामा, १४ वर्षीय एकजना केटीले परमेश्वरको विषयमा अझै जान्ने आफ्नो इच्छाबारे लेखेको देखिन्। तिनले सो विद्यार्थीसँग बाइबल अध्ययन शुरू गरिन्, तर जसै ती केटीले प्रगति गरिरहेकी थिइन्, तिनका क्याथोलिक परिवारले तिनको अध्ययनलाई रोकी दिए र तिनको साहित्यलाई नाश पारिदिए। यी युवतीले स्कूलमा फुर्सतको बेलामा बाइबल अध्ययन गर्न शुरू गरिन् तर यो पनि परिवारलाई थाह हुन गयो। त्यसकारण पत्राचार द्वारा अध्ययन चालूरह्यो। तर, चाँड़ैनै, परिवारले तिनका पत्रहरू फेला पारे र ती सबैलाई जलाइदिए। मासमा [क्याथोलिकहरूको गिर्जामा हुने एउटा धार्मिक विधि] जान तिनका पिताले तिनलाई दबाउ दिन थाले। तिनी साथमा गइन् तर मास चलिरहेको बेलामा, गिर्जाको पुस्तिकाका पानाहरूका बीचमा लुकाएर पढ्नका निम्ति आफ्नो साथमा प्रहरीधरहराको एउटा अङ्क लगिन्। यो क्रम छ महिनासम्म चलिरह्यो र एक दिन चुपचाप तिनी घरबाट निस्केर राज्य सभा-गृहमा गइन्। सभा चलिरहेकै बेलामा तिनका पिता ढोकामा देखा परे र छोरी घर फर्किए पछि तिनलाई पिट्ने छन् भनी तिनलाई सुनाइ दिनु भनी तिनले एक जना भाइहरूलाई भने। भाइहरूले तिनलाई सम्झाउने प्रयास गरे तर व्यर्थ भयो।
भोलि पल्ट, तिनी मुस्काउँदै र खुशी हुँदै भाइहरूलाई भेट्न गइन्। तिनलाई बाबुले पिटेर, शरीरमा लागेको चोटका थुप्रा दागहरू तिनले भाइहरूलाई देखाइन्। त्यसो हुँदा पनि, तिनी किन खुशी थिइन्? राज्य सभा-गृहबाट हिंडे पछि, शहरमा कैंयों मानिसहरूलाई, त्यहाँको नगरपालसमेतलाई, छोरी यहोवाको साक्षी भएमा त्यसको लाभ र हानीहरू बारे बाबुले सोधे। यहोवाका साक्षीहरू असल मानिसहरू, र विश्वासयोग्य हुन् भनी नगरपालले भने। तिनले कुरा थप्दै भने कि तिनीहरूको नैतिकता अत्युत्तम श्रेणीको हुन्छ जो साधारणतः जवान मानिसहरूको नैतिक स्तर भन्दा धेरै नै उच्च हुन्छ र त्यस प्रकारको उच्च नैतिक स्तर एउटा बच्चामा हुनु अति नै राम्रो हुनेछ।
यसो हुँदा हुँदै पनि, ती बालिकाले कुटाइ खाइन्। तर बिना अनुमति घर छाड़ेको हुनाले तिनलाई पिटेको हो भनी बाबुले भने। र यदि तिनले फेरि कहिले बाइबल अध्ययन गर्न बन्द गरेमा, वा यहोवाका साक्षीहरूका सभाहरूमा जान छाड़ेमा बाबुले फेरि कुट्नेछन् भनी तिनलाई भनिए! छोरी अब एउटी उत्साही प्रकाशक छिन्, र तिनका परिवारका केही सदस्यहरूले सच्चाइमा चासो देखाइ रहेछन्।
साँच्चैनै, यो अनुभवले देखाउँछ कि यहोवालाई सेवा गर्ने उत्कट इच्छा हुने युवा-युवतीहरूलाई यहोवाले आशिष दिनुहुन्छ।—भजनसंग्रह १४८: १२, १३. (w2/1/91)