के तपाईं साँच्चै परमेश्वरलाई प्रेम गर्न सक्नुहुन्छ?
“मेरो अनुहार हेरर मानिस जीवित रहनसक्तैन” भनेर परमेश्वर भन्नुहुन्छ। (प्रस्थान ३३:२०) यसबाहेक बाइबलीय समयपश्चात् कुनै मानवले उहाँसित प्रत्यक्ष कुराकानी गरेको प्रमाण पाइँदैन। आफ्नै आँखाले नदेखेको वा नसुनेको व्यक्तिसित प्रगाढ स्नेह विकास गर्नु के गाह्रो वा असम्भव देखिंदैन र? यस ब्रह्माण्डको सृष्टिकर्तासित मायालु सम्बन्ध राख्नु के साँच्चै सम्भव छ र?
निस्सन्देह, परमेश्वरसित न्यानो व्यक्तिगत घनिष्ठता बढाउनु सम्भव छ। व्यवस्था ६:५ मा इस्राएल राष्ट्रलाई यस्तो आज्ञा दिइएको हामी पढ्छौं: “तिमीहरूले परमप्रभु आफ्नो परमेश्वरलाई आफ्नो सम्पूर्ण मनले, आफ्नो सम्पूर्ण प्राणले र आफ्नो सम्पूर्ण शक्तिले प्रेम गर।” येशू ख्रीष्टले पछि आफ्ना अनुयायीहरूलाई यस नियमबारे अझ जोड दिंदै यसो भन्नुभयो: “प्रमुख र प्रथम आज्ञा यही हो।” (मत्ती २२:३७, ३८) यस्तो सम्बन्ध असम्भव भएको भए परमेश्वरलाई प्रेम गर्न के बाइबलले हामीलाई आग्रह गर्थ्यो होला त?
तर के उहाँले आज्ञा गर्नुभएकोले मात्र उहाँलाई प्रेम गरेको यहोवाले आशा गर्नुहुन्छ? अहँ, होइन। परमेश्वरले प्रथम मानव दम्पतीलाई उहाँलाई प्रेम गर्नसक्ने क्षमतासहित सृजनुभएको थियो। आदम र हव्वालाई आफ्नो सृष्टिकर्तासित मायालु सम्बन्ध राख्न बलजफ्ती गरिएको थिएन। बरु परमेश्वरले उहाँप्रति प्रगाढ स्नेह विकास गर्न सकून् भनेर तिनीहरूलाई आदर्श वातावरणमा राख्नुभएको थियो। छनौट तिनीहरूकै थियो—परमेश्वरसित घनिष्ठ हुने वा टाढा हुने।
आदम र हव्वाले विद्रोह गर्न रोजे। (उत्पत्ति २:१६, १७; ३:६, ७) तथापि, तिनीहरूका सन्तानहरूले सृष्टिकर्तासँग मायालु सम्बन्ध विकास गर्ने क्षमता पाउनेथिए।
साँचो परमेश्वरको साथै हिंड्ने
उदाहरणका लागि, बाइबलमा अब्राहामलाई परमेश्वरको “मित्र” भनिएको छ। (याकूब २:२३) तैपनि परमेश्वरसित घनिष्ठ सम्बन्धको आनन्द उठाउने व्यक्ति अब्राहाम मात्रै पक्कै थिएनन्। बाइबलले यहोवाप्रति निष्कपट स्नेह देखाउने र “[साँचो, NW] परमेश्वरको साथै हिंड्ने” अन्य थुप्रै असिद्ध मानिसहरूबारे बताउँछ।—उत्पत्ति ५:२४; ६:९; अय्यूब २९:४; भजन २५:१४; हितोपदेश ३;३२.
परमेश्वरका पुरातन सेवकहरू परमेश्वरप्रतिको प्रेम र स्नेह लिएर जन्मेका थिएनन्। तिनीहरूले त्यसको विकास गर्नुपऱ्यो। कसरी? उहाँको व्यक्तिगत नाउँ यहोवाद्वारा चिनेर। (प्रस्थान ३:१३-१५; ६:२, ३) उहाँको अस्तित्व र ईश्वरत्वबारे सजग भएर। (हिब्रू ११:६) उहाँको मायालु कार्यहरूबारे बारम्बार मनन गरेर। (भजन ६२:६) आफ्ना आन्तरिक विचारहरू परमेश्वरलाई प्रार्थनाद्वारा व्यक्त गरेर। (भजन ३९:१२) उहाँको भलाइबारे सिकेर। (जकरिया ९:१७) उहाँलाई प्रसन्न तुल्याउने स्वास्थ्यकर भय विकास गरेर।—हितोपदेश १६:६.
के तपाईं परमेश्वरको साथी भएर उहाँसित हिंड्न सक्नुहुन्छ? हो, तपाईंले परमेश्वरलाई देख्न वा उहाँको स्वर सुन्न सक्नुहुन्न। तैपनि, यहोवाले तपाईंलाई ‘उहाँको बासस्थानमा पाहुना’ अर्थात् उहाँको साथी हुन आमन्त्रित गर्नुहुन्छ। (भजन १५:१-५) अतः तपाईंले परमेश्वरलाई प्रेम गर्नु सम्भव छ। तर तपाईंले उहाँसित घनिष्ठ र स्नेही सम्बन्ध कसरी विकास गर्न सक्नुहुन्छ?