१ | प्रार्थना “आफ्नो सारा फिक्री उहाँमाथि बिसाओ”
बाइबल भन्छ: “आफ्नो सारा फिक्री [ईश्वरमाथि] बिसाओ किनकि उहाँले तिमीहरूको ख्याल राख्नुहुन्छ।”—१ पत्रुस ५:७.
यसको अर्थ के हो?
हाम्रो दिमाग र मनलाई अशान्त बनाउने जस्तोसुकै भारी यहोवामा बिसाउन उहाँ हामीलाई आग्रह गर्नुहुन्छ। (भजन ५५:२२) समस्या चाहे ठूलो होस् या सानो, हामी त्यसबारे प्रार्थना गर्न सक्छौँ। यदि कुनै समस्याले गर्दा हामी विचलित छौँ भने त्यो देख्दा यहोवालाई पनि दुःख लाग्छ। मनोशान्ति पाउन उहाँलाई प्रार्थना गर्नै पर्छ।—फिलिप्पी ४:६, ७.
यसले हामीलाई कसरी मदत गर्छ?
मानसिक स्वास्थ्य समस्या झेल्नुपर्दा आफू एक्लो छु जस्तो लाग्न सक्छ। हामी कस्तो परिस्थितिबाट गुज्रिरहेका छौँ भनेर अरू मानिसले राम्ररी बुझ्न नसक्लान् तर हाम्रो ईश्वर यहोवाले भने बुझ्नुहुन्छ। (हितोपदेश १४:१०) हामीले उहाँलाई आफ्नो मनको कुरा पोख्यौँ भने उहाँ हाम्रो कुरा ध्यान दिएर सुन्नुहुन्छ। उहाँ हाम्रो पीडा महसुस गर्न सक्नुहुन्छ, हाम्रो सङ्घर्ष देख्नुहुन्छ र हामीलाई चिन्ता लागेको जुनसुकै विषयबारे प्रार्थना गरेको चाहनुहुन्छ।—२ इतिहास ६:२९, ३०.
प्रार्थना गर्ने गऱ्यौँ भने यहोवा हामीलाई धेरै माया गर्नुहुन्छ भन्ने कुरामा हाम्रो विश्वास बढ्दै जान्छ। हामी भजनरचयिताले जस्तै महसुस गर्न सक्छौँ, जसले यसरी प्रार्थना गरे: “तपाईँले मेरो दुःख देख्नुभएको छ; मेरो वेदना तपाईँलाई थाह छ।” (भजन ३१:७) यहोवा हाम्रो दुःख देख्नुहुन्छ भनेर थाह पाउँदा मात्र पनि हामी समस्यासित जुझ्न निकै बल पाउँछौँ। तर उहाँ हाम्रो दुःख देख्नु मात्र हुन्न। हामीले भोगिरहेको समस्याले गर्दा कस्तो महसुस गरिरहेका छौँ भनेर उहाँ राम्ररी बुझ्नुहुन्छ अनि हामीलाई बाइबलबाट सान्त्वना र प्रोत्साहन दिनुहुन्छ।