जागिर गुम्दा बाइबलका सिद्धान्तहरूले कसरी मदत गर्छ?
जागिर गुम्दा तपाईँ र तपाईँको परिवारलाई आर्थिक रूपमा मात्र नभई मानसिक र भावनात्मक रूपमा पनि गाह्रो हुन सक्छ। बाइबलका सिद्धान्तहरूमा आधारित निम्न सल्लाहहरूले तपाईँलाई यस्तो अवस्थाको सामना गर्न मदत गर्छ।
आफ्नो भावनाबारे अरूसित कुरा गर्नुहोस्।
बाइबल के भन्छ? “साँचो मित्रले सधैँ माया गर्छ।”—हितोपदेश १७:१७.
जागिर गुम्दा तपाईँलाई रिस उठ्न सक्छ, निराश हुन सक्नुहुन्छ वा के गरूँ कसो गरूँ जस्तो लाग्न सक्छ। आफू कुनै कामको छैन जस्तो पनि लाग्न सक्छ। तर आफ्नो यस्तो भावनाबारे परिवारका सदस्यहरू र नजिकका साथीहरूलाई बताउनुभयो भने तिनीहरूले तपाईँलाई भावनात्मक रूपमा मदत गर्न सक्छन्। साथै अर्को जागिर भेट्टाउन तिनीहरूले तपाईँलाई व्यवहारिक सल्लाह पनि दिन सक्छन्।
अचाक्ली चिन्ता नगर्नुहोस्।
बाइबल के भन्छ? “भोलिको चिन्ता कहिल्यै नगर किनभने भोलिको चिन्ता भोलिले नै गर्नेछ।”—मत्ति ६:३४.
बाइबलमा हामीलाई भविष्यको लागि योजना बनाउन प्रोत्साहन दिइएको छ। (हितोपदेश २१:५) तर भविष्यको अचाक्ली चिन्ता-फिक्री नगर्न पनि सल्लाह दिइएको छ। प्रायजसो हामी कहिल्यै नहुने कुराको लागि चिन्ता गरिरहेका हुन्छौँ। त्यसैले आज गर्नुपर्ने कुराहरूमा मात्र ध्यान दिनु राम्रो हो।
बाइबलले तपाईँलाई तनावको सामना गर्न मदत दिने अरू थुप्रै बुद्धिमानी सल्लाहहरू दिन्छ। थप जानकारीको लागि “तनावको सामना कसरी गर्ने?” भन्ने लेख हेर्नुहोस्।
खर्चमा छाँटकाँट गर्नुहोस्।
बाइबल के भन्छ? “अभावमा कसरी जीवन बिताउने अनि प्रशस्ततामा कसरी जीवन बिताउने, त्यो मलाई थाह छ।”—फिलिप्पी ४:१२.
तपाईँको अहिलेको अवस्थाअनुसार छाँटकाँट गर्नुहोस्। यसमा तपाईँको खर्चमा छाँटकाँट गर्नु पनि समावेश छ। यसो गर्दा तपाईँ आफूसित भएको भन्दा बढ्तै खर्च गर्नदेखि जोगिनुहुनेछ। साथै अनावश्यक ऋण लिनदेखि पनि होसियार हुनुहोस्।—हितोपदेश २२:७.
अहिलेको आर्थिक अवस्थाअनुसार कसरी छाँटकाँट गर्ने भन्नेबारे थप जानकारीको लागि “कम खर्चमा कसरी गुजारा टार्ने” भन्ने लेख हेर्नुहोस्।
बुद्धिमानीपूर्वक समयको सदुपयोग गर्नुहोस्।
बाइबल के भन्छ? “समयको पूर्ण सदुपयोग गर्दै . . . बुद्धिमानीपूर्वक व्यवहार गर।”—कलस्सी ४:५.
कामको लागि निश्चित तालिका नभए पनि आफ्नो समय कसरी प्रयोग गर्ने भन्नेबारे राम्रो तालिका बनाउनुहोस्। यसो गर्नुभयो भने तपाईँ व्यवस्थित हुन सक्नुहुनेछ र आफू केही कामको छैन भन्ने भावनाले सताउनेछैन।
परिस्थितिअनुसार छाँटकाँट गर्नुहोस्।
बाइबल के भन्छ? “मेहनतको फल मीठो हुन्छ।”—हितोपदेश १४:२३.
तपाईँले पहिला गर्नुभएको भन्दा फरक काम गर्न पनि तयार हुनुहोस्। यसको लागि तपाईँले सानातिना कामहरू वा पहिलेको भन्दा कम तलब आउने जागिर खानुपर्ने पनि हुन सक्छ।
हार नमान्नुहोस्।
बाइबल के भन्छ? “बिहान सबेरै बिउ छर्न थाल र साँझसम्मै छरिरह। किनकि तिमीले छरेको कुनचाहिँ बिउ उम्रन्छ . . . तिमी जान्दैनौ।”—उपदेशक ११:६.
काम खोजिरहनुहोस्। आफूले काम खोजिरहेको कुरा अरूलाई पनि बताउनुहोस्। यस विषयमा आफन्तहरू, साथीभाइहरू, पहिलेका सहकर्मीहरू र छिमेकीहरूसित कुरा गर्नुहोस्। जागिर मिलाइदिने कम्पनीहरू, विज्ञापनहरू र विभिन्न कम्पनीहरूको वेबसाइट हेर्नुहोस्। जागिर भेट्टाउन जति सक्दो धेरै ठाउँमा बायोडाटा छोड्नुहोस् र अन्तरवार्ता दिनुहोस्।