युवाहरूमा सामाजिक सञ्जालको नकारात्मक असरबारे उच्च स्वास्थ्य अधिकारीको चेतावनी—यसबारे बाइबल के भन्छ?

सन्‌ २०२३, मे २३ मा अमेरिकाका एक उच्च स्वास्थ्य अधिकारीले सामाजिक सञ्जालले थुप्रै युवामा नकारात्मक असर पारिरहेको छ भनेर बताए।

• “हुनत केही केटाकेटी र किशोरकिशोरीले सामाजिक सञ्जालबाट लाभ उठाइरहेका छन्‌ तर प्रमाणहरूले देखाएअनुसार यसले तिनीहरूको मानसिक र शारीरिक स्वास्थ्यमा धेरै हानि पुऱ्‍याइरहेको छ।”—सामाजिक सञ्जाल र युवाहरूको मानसिक स्वास्थ्य: अमेरिकाको सर्जन जेनेरलद्वारा जारी सूचना, २०२३।

यो विषय गम्भीर हुनुका केही कारणबारे त्यस सूचनामा बताइएको छ।

• “दिनमा ३ घण्टाभन्दा धेरै सामाजिक सञ्जाल चलाउने” १२ देखि १५ वर्षका केटाकेटीमा “मानसिक स्वास्थ्य समस्या हुने खतरा दुई गुणा धेरै देखिएको छ। यस्ता केटाकेटीमा डिप्रेसन र एङ्‌जाइटिका (आत्तिने वा डराउने रोग) लक्षणहरू पनि देखिएका छन्‌।”

• “सामाजिक सञ्जाल धेरै चलाउने” १४ वर्षका केटाकेटीमा “निद्राको समस्या, अनलाइन दुर्व्यवहार, आफ्नो रूपरङ चित्त नबुझ्ने, अयोग्य महसुस गर्ने र डिप्रेसनका समस्याहरू धेरै देखिएको छ। यस्ता समस्याहरू केटाहरूमा भन्दा केटीहरूमा धेरै देखिएको छ।”

आमाबुबाले आफ्ना छोराछोरीलाई यस्ता खतराहरूबाट कसरी जोगाउन सक्छन्‌? बाइबलमा यससम्बन्धी व्यावहारिक सल्लाह-सुझाव पाइन्छ।

आमाबुबाले के गर्न सक्छन्‌?

चासो लिनुहोस्‌। आमाबुबा हो, सामाजिक सञ्जाल चलाउँदा कस्ता खतराहरू आइपर्न सक्छन्‌ भनेर विचार गर्नुहोस्‌ र छोराछोरीलाई त्यो चलाउन दिने कि नदिने भनेर निर्णय गर्नुहोस्‌।

• बाइबलको सिद्धान्त: “बालकलाई सही बाटोमा लगाऊ।”—हितोपदेश २२:६.

• अझ धेरै बुझ्न “के छोराछोरीलाई सामाजिक सञ्जाल चलाउन दिनु राम्रो हो?” भन्‍ने लेख पढ्‌नुहोस्‌।

छोराछोरीलाई सामाजिक सञ्जाल चलाउन दिँदै हुनुहुन्छ भने यसका सम्भाव्य खतराहरूबारे बुझिराख्नुहोस्‌ र तिनीहरूले इन्टरनेटमा के-कस्ता कुराहरू हेर्दै छन्‌ भन्‍ने कुरामा चासो लिनुहोस्‌। तपाईँ कसरी त्यसो गर्न सक्नुहुन्छ?

छोराछोरीलाई खतराहरूदेखि जोगाउनुहोस्‌। छोराछोरीलाई कस्ता कुराहरू हानिकारक हुन्छन्‌ र त्यस्ता कुराहरू हेर्नदेखि जोगिन के-कस्ता कदमहरू चाल्न सकिन्छ भनेर सिकाउनुहोस्‌।

• बाइबलको सिद्धान्त: “तिमीहरूमाझ अवैध यौनसम्बन्ध अनि हरकिसिमका अशुद्धपन वा लोभको नामसमेत नलिइओस्‌; लाजमर्दो आचरण, मूर्खताले भरिएको कुराकानी, अश्‍लील ठट्टा पनि तिमीहरूमाझ नहोस्‌।”—एफिसी ५:३, ४.

• व्यावहारिक सल्लाह-सुझावको लागि “सुरक्षित भई सामाजिक सञ्जाल चलाउन सिकाउनुहोस्‌” भन्‍ने लेख पढ्‌नुहोस्‌।

सीमा तोक्नुहोस्‌। जस्तै, छोराछोरीलाई कहिले र कति समय सामाजिक सञ्जाल चलाउन दिने भनेर सीमा तोक्नुहोस्‌।

• बाइबलको सिद्धान्त: “कसरी हिँडिरहेका छौ, होसियार भई ध्यान देओ, ... बुद्धिमान्‌ मानिस जस्तोगरि हिँड, समयको पूर्ण सदुपयोग गर।”—एफिसी ५:१५, १६.

• सीमा तोक्नु किन आवश्‍यक छ भनेर बुझाउन छोराछोरीलाई सामाजिक सञ्जालको खतराबाट जोगिनुहोस्‌ भन्‍ने ह्वाइटबोर्ड एनिमेसन देखाउनुहोस्‌।