आजकलका किताब, चलचित्र र भिडियो गेमहरू जवान तथा वृद्ध जादुगर, किचकन्‍नी र आकर्षक भ्याम्पायरजस्ता अलौकिक पात्रहरूको कथाले भरिएको पाइन्छ। यसको उद्देश्‍य?a

समाजशास्त्रका प्राध्यापक क्लड फिसर यस्तो लेख्छन्‌, “हालैका दशकहरूमा भूतप्रेतप्रतिको विश्‍वास ह्वात्तै बढेको छ। पहिला-पहिला दस जना अमेरिकीमा एक जनाले विश्‍वास गर्थे भने अहिले तीन जनामा एक जनाले विश्‍वास गर्छन्‌। अलौकिक शक्‍ति भएका व्यक्‍तिहरूसित सरसल्लाह लिने र भूत तथा भूतबङ्‌गलामा विश्‍वास गर्ने पाका अमेरिकीभन्दा युवा अमेरिकीहरू झन्डै दोबर छन्‌।”

त्यसैले भूतप्रेतसम्बन्धी कथाले मानव समाजमा पुनः विकराल रूप लिनु कुनै अचम्मको कुरा होइन। द वल स्ट्रीट जर्नल-मा माइकल केलिया लेख्छन्‌, “विगत केही वर्षमा सक्रिय भएको पिशाच, भ्याम्पायर र बोक्सीविद्याले गर्दा विभिन्‍न संस्कृतिमा भूतप्रेतसम्बन्धी गतिविधि फेरि देखा परेको छ।”

एउटा रिपोर्टअनुसार “विश्‍वको जुनसुकै ठाउँमा २५ देखि ५० प्रतिशत मानिसहरू भूतप्रेतमा विश्‍वास गर्छन्‌ अनि प्रायजसो संस्कृतिका साहित्यहरूमा भूतप्रेतलाई एकदमै महत्त्व दिइन्छ।” समाजशास्त्रका प्राध्यापक क्रिस्टोफर बेडर र कार्सन मेङ्‌कनले अमेरिकामा गरेको सर्वेक्षणअनुसार “सत्तरीदेखि असी प्रतिशत अमेरिकीहरू कम्तीमा पनि एउटा किसिमको अलौकिक गतिविधिमा बलियो विश्‍वास राख्छन्‌।”

प्रेतवादमा र अलौकिक गतिविधिमा भाग लिनु भनेको रमाइलो मात्र हो?

थुप्रै मानिसहरू प्रेतवाद र अलौकिक शक्‍तिलाई एउटा भ्रम ठान्छन्‌ वा चलचित्र उद्योगका स्क्रिप्ट लेखकहरूको कल्पनाको उपज ठान्छन्‌। तर यससम्बन्धी बाइबलको दृष्टिकोण भने फरक छ। बाइबलले प्रेतवादसम्बन्धी स्पष्ट चेतावनी दिएको छ। जस्तै, व्यवस्था १८:१०-१३ मा यसो भनिएको छ: “भावी बताउने, जोखना हेर्ने, जादुगरी गर्ने, टुना-मुना गर्ने, मसान जगाउने अथवा बिजुवा झाँक्री तिमीहरूका बीचमा कोही नहोस्‌।” बाइबलमा किन यस्तो चेतावनी दिइएको छ? त्यहाँ थप यसो पनि भनिएको छ: “यस्तो काम गर्ने व्यक्‍ति परमप्रभुको अगि घृणित हो . . . परमप्रभु तिमीहरूका परमेश्‍वरको सामने तिमीहरू सिद्ध हुनू।”

बाइबलले हर प्रकारका प्रेतवादलाई किन यसरी कडा शब्दमा निन्दा गर्छ?

नराम्रो सुरुवात

बाइबलले बताएअनुसार ईश्‍वरले पृथ्वी सृष्टि गर्नुभन्दा युगौंयुग अगाडि लाखौं-करोडौं अदृश्‍य जीवहरू अर्थात्‌ स्वर्गदूतहरू सृष्टि गर्नुभयो। (अय्यूब ३८:४, ७; प्रकाश ५:११) प्रत्येक स्वर्गदूतलाई स्वतन्त्र इच्छा अर्थात्‌ सही र गलत छुट्ट्याएर आफैले निर्णय गर्न सक्ने क्षमता दिइएको थियो। तिनीहरूमध्ये केहीले ईश्‍वरको विद्रोह गर्ने छनौट गरे। तिनीहरू स्वर्गको आफ्नो बासस्थान त्यागेर पृथ्वीमा आए। नतिजास्वरूप पूरै पृथ्वी ‘उपद्रवले भरियो।’—उत्पत्ति ६:२-५, ११; यहूदा ६.

ती दुष्ट स्वर्गदूतहरूले लाखौं मानिसहरूलाई बहकाइरहेका छन्‌ भनी बाइबल बताउँछ। (प्रकाश १२:९) भविष्यबारे थाह पाउने मानिसको स्वाभाविक इच्छाको तिनीहरूले फाइदा उठाइरहेका छन्‌।—१ शमूएल २८:५, ७; १ तिमोथी ४:१.

हो, कुनै-कुनै अलौकिक शक्‍तिले मानिसहरूलाई मदत गरेको जस्तो देखिएला। (२ कोरिन्थी ११:१४) तर वास्तविकता के हो भने ती दुष्ट स्वर्गदूतहरूले ईश्‍वरबारे सत्य कुरा बुझ्नदेखि रोक्न मानिसहरूको दिमागलाई अन्धो तुल्याउने प्रयास गरिरहेका छन्‌।—२ कोरिन्थी ४:४.

त्यसैले बाइबलअनुसार दुष्ट स्वर्गदूतहरूसित सम्पर्क गर्नु रमाइलोको कुरा नभई हामीलाई हानि गर्ने कुरा हो। येशूका सम्भाव्य चेलाहरूले पनि यस्ता गतिविधिबारे सत्य कुरा थाह पाएपछि प्रेतवादसित सम्बन्धित “आफ्ना पुस्तकहरू ल्याए अनि सबैसामु ती जलाए।” तिनीहरूले ठूलो मोल बराबरको पुस्तकहरू नष्ट गरे।—प्रेषित १९:१९.

आज पनि धेरैले प्रेतवादसित सम्बन्धित गतिविधि या मनोरञ्जनमा कुनै भाग नलिने निर्णय गरेका छन्‌। उदाहरणको लागि, रेखाa १२ वर्षकी हुँदा तिनलाई आफूले भविष्य बताउन सक्छु वा आइपर्न लागेको खतराबारे जानकारी दिन सक्छु जस्तो लाग्थ्यो। तासको पत्ता हेरेर तिनले स्कुलका साथीहरूको भविष्य बताउन थालिन्‌। तिनको अनुमान सही साबित हुँदै जाँदा तिनलाई तन्त्रमन्त्र रमाइलो लाग्न थाल्यो।

रेखालाई आफूले ईश्‍वरको वरदान पाएकोले मानिसहरूको भविष्य बताउन सकेको जस्तो लाग्थ्यो। तिनी यसो भन्छिन्‌, “म तासको पत्ता हेरेर अरूको भविष्य बताउन सक्थें। म आफ्नो भविष्य पनि थाह पाउन चाहन्थें तर सक्दिनथें। यसले गर्दा मनमा अशान्ति छायो।”

मनमा थुप्रै प्रश्‍न आएकोले रेखाले ईश्‍वरलाई प्रार्थना गरिन्‌। पछि यहोवाका साक्षीहरूसित तिनको भेट भयो र तिनले बाइबल अध्ययन गर्न थालिन्‌। भविष्य बताउन सक्ने आफूसित भएको क्षमता ईश्‍वरबाट आएको होइन रहेछ भनेर तिनले बाइबलबाट सिकिन्‌। ईश्‍वरसित मित्रता गाँस्न चाहनेहरू प्रेतवादसित सम्बन्धित सबै कुराबाट अलग्गै बस्नुपर्छ भनेर पनि तिनले सिकिन्‌। (१ कोरिन्थी १०:२१) नतिजा कस्तो भयो? रेखाले तन्त्रमन्त्रसित सम्बन्धित सामग्री र किताबहरू फ्याँकिन्‌। अहिले तिनी बाइबलबाट सिकेको सत्य कुरा अरूलाई बाँड्‌ने काममा भाग लिन्छिन्‌।

रोहितलाई किशोर छँदा अलौकिक पात्रहरूबारे लेखिएको उपन्यास पढ्‌न खुब रमाइलो लाग्थ्यो। तिनी भन्छन्‌, “मेरै उमेरका ती काल्पनिक दुनियाँका पात्रहरूको ठाउँमा आफूलाई राखेर हेर्न एकदमै रमाइलो लाग्थ्यो।” रोहितलाई जादुगरी र तन्त्रमन्त्रसित सम्बन्धित किताबहरू पढ्‌ने बानी बस्दै गयो। तिनी भन्छन्‌, “जिज्ञासाको कारण त्यस्ता किताबहरू पढ्‌ने वा त्यस्ता फिल्महरू हेर्ने इच्छा पलायो।”

बाइबल अध्ययन गरेर रोहितले आफूले पढ्‌ने कुरा होसियार भई जाँच्नुपर्ने आवश्‍यकता बुझे। तिनी भन्छन्‌, “मैले प्रेतवादसित सम्बन्धित सबै कुराको सूचि बनाएँ र ती कुराबाट टाढै बसें। मैले एउटा महत्त्वपूर्ण पाठ सिकें। बाइबलको १ कोरिन्थी १०:३१ मा यसो भनिएको छ, ‘सबै थोक परमेश्‍वरकै महिमाको निम्ति गर।’ अहिले म आफैलाई यस्तो प्रश्‍न सोध्छु, ‘कतै मैले पढ्‌ने यो सामग्रीले गर्दा परमेश्‍वरको महिमा नहुने पो हो कि?’ त्यस्तो अवस्थामा म त्यो सामग्री पढ्‌दिनँ।”

बाइबललाई बत्ती भनेर वर्णन गरिएको छ। यसले प्रेतवाद वास्तवमा के हो भनेर छर्लङ्‌ग पार्छ। (भजन ११९:१०५) यतिमात्र नभई यसले भूतप्रेतको कुनै प्रभाव नहुने संसारबारे प्रतिज्ञा गर्छ। यसले सबै मानवजातिलाई फाइदा पुऱ्‍याउनेछ। भजन ३७:१०, ११ मा यसो भनिएको छ, “थोरै बेरपछि दुष्ट रहनेछैन। तैंले त्यसको ठाउँ राम्ररी हेरे तापनि त्यो पटक्कै रहनेछैन। तर नम्रहरूले देश अधिकार गर्नेछन्‌। र प्रशस्त शान्तिमा आफै खुसी मनाउनेछन्‌।”