हितोपदेशको पुस्तकको उद्देश्‍य यसका सुरुका शब्दहरूमै बताइएको छ: “दाऊदका छोरा इस्राएलका राजा सुलेमानका हितोपदेश जसद्वारा मानिसहरूले बुद्धि र शिक्षा प्राप्त गर्नेछन्‌, औ गहन अर्थ भएका कुराहरू बुझ्नेछन्‌। औ तीद्वारा तिनीहरूले बुद्धिसित जीवन चलाउन सिक्नेछन्‌, र इमान्दारी, धार्मिकता र न्यायपरायणता प्राप्त गर्नेछन्‌। सोझाहरू चतुऱ्‍याइँले औ युवकहरू ज्ञान र विवेकले परिपूर्ण हुनेछन्‌।”—हितोपदेश १:१-४.

चतुर व्यक्‍ति दूरदर्शी हुन्छन्‌, निर्बुद्धि होइन। (हितोपदेश १४:१५) तिनीहरूले आइपर्न लागेको खराब कुरा देख्नसक्छन्‌ र सजग रहन्छन्‌। अनि बुद्धिले हामीलाई जीवनमा उद्देश्‍यपूर्ण मार्ग अपनाउने लाभदायी दृष्टिकोण दिनसक्छ। बाइबलीय हितोपदेश अध्ययन गर्नु निस्सन्देह इनामदायी हो किनभने हामीले बुद्धि र अनुशासन पाओस्‌ भनेर नै ती लिपिबद्ध गरिएका हुन्‌। “निर्बुद्धि मानिसले” पनि हितोपदेशहरूमा ध्यान दिएर चतुर हुनसक्छन्‌ तथा “युवकहरू” ज्ञान र विवेकले परिपूर्ण हुनसक्छन्‌।