के तपाईं ख्रीष्टको प्रेमप्रति प्रतिक्रिया देखाउँदै हुनुहुन्छ?
१ आफ्नो मालिकले बिताउनु भएको जीवनबारे सोच्दै प्रेरित यूहन्नाले यसरी लेखे: “येशूले . . . संसारमा भएका आफ्ना जतिलाई प्रेम गरेर तिनीहरूलाई अन्त्यसम्मनै प्रेम गर्नुभयो।” (यूह. १३:१) यस स्मरणार्थ उत्सव मौसमको दौडान हामी ख्रीष्टको प्रेमको महान् अनुभूतिमाथि ध्यान दिनेछौं। उहाँको बलिदानमाथि विश्वास प्रकट गरेर, प्रचार कार्यमा जोसिलो भई भाग लिएर अनि उहाँजस्तै “अन्तसम्म” स्थिर भएर हामी येशूले देखाउनु भएको प्रेमप्रति आफ्नो प्रतिक्रिया व्यक्त गर्न सक्छौं।—मत्ती २४:१३; २८:१९, २०; यूह. ३:१६.
२ ख्रीष्टको प्रेमप्रति प्रतिक्रिया देखाउने: येशू आफ्नो पार्थिव जीवनको अन्तिम हप्तातिर निकै व्यस्त हुनुहुन्थ्यो। (मत्ती २१:२३; २३:१; २४:३) ख्रीष्टका अनुयायीहरू भएकाले हामी पनि प्रेमबाट उत्प्रेरित भएर यहोवाको सेवामा ‘प्रयत्न गर्छौं।’ (लूका १३:२४) क्षेत्र सेवकाईमा बिताउनुहुने समयलाई अझ बढाएर अप्रिल महिनाको लागि तयार पारिएको साक्षी दिने थप प्रबन्धबाट के तपाईं थप लाभ उठाउन सक्नुहुन्छ?
३ यस वर्ष प्रभुको साँझको भोज अप्रिल १९ तारिख बुधबार साँझ पर्छ। यस महत्त्वपूर्ण उत्सवमा कति जना भेला होलान्? धेरै हदसम्म त्यो हामीमै निर्भर छ। के तपाईंले निमन्त्रणा दिन चाहनु भएका तपाईंका बाइबल विद्यार्थीहरू अनि अरू चासो दिने मानिसहरू, नातेदारहरू, व्यापारिक चिनजानका व्यक्तिहरू तथा स्कूलका साथीहरूको नामावली तयार पार्नुभएको छ? तिनीहरूसित सम्पर्क राखेर हार्दिक निमन्त्रणा दिनुभएको छ? के तपाईंले तिनीहरूलाई स्मरणार्थको केही दिन अघि पुनः सम्झाउनुहुनेछ? स्मरणार्थ उत्सव हुने स्थानसम्म आइपुग्न तिनीहरूलाई तपाईंको मदत चाहिन्छ कि? प्राचीनहरूले सेवकाईमा निष्क्रिय भइसकेकाहरूलाई पनि निम्तो दिनेछन्। स्मरणार्थ बिदाको दिन नभई हप्ताको बीचतिर परे तापनि यसमा उपस्थित हुनु अत्यन्तै जरुरी छ।
४ तयार भएर आउनुहोस्: स्मरणार्थ उत्सवमा तयार भएर आउनु अनि सही मानसिक मनोवृत्तिका साथ उपस्थित हुनु महत्त्वपूर्ण कुरा हो। पावलले सँगी विश्वासीहरूलाई त्यस उत्सवको गम्भीरता बुझ्न प्रोत्साहन दिए। (१ कोरि. ११:२०-२६) तपाईंले पारिवारिक बाइबल अध्ययनको दौडान सुसमाचारको पुस्तक यूहन्ना अध्याय १३ देखि १७ सम्म पढेर हरेक परिवारका सदस्यहरूलाई येशूको बलिदानले के अर्थ राख्छ भन्न लगाउन सक्नुहुन्छ। स्मरणार्थ हप्ताको दैनिक बाइबल पढाइ गर्न पनि नबिर्सनुहोस्!
५ ख्रीष्टप्रति हाम्रो गहिरो प्रेम छ र यो अप्रिल १९ पछि पनि रहिरहनेछ। हामी सधैंभरि हाम्रो प्रेम प्रकट गरिरहन कटिबद्ध छौं! यस वर्षको स्मरणार्थ उत्सवले हामीलाई त्यो अठोट अझ दृढ पार्न मदत गर्नेछ।