-
परमेश्वरको राज्य प्रचारकार्य —एउटा अनमोल सुअवसरराज्य सेवकाई—२००५ | अगस्त
-
-
परमेश्वरको राज्य प्रचारकार्य —एउटा अनमोल सुअवसर
१ दिनहुँ, पृथ्वीका अरबौं बासिन्दाहरूले जीवनको लागि परमेश्वरले दिनुहुने प्रचुर प्रबन्धहरूबाट लाभ उठाउँछन्। (मत्ती ५:४५) तथापि, कमैले मात्र परमेश्वरको राज्यको सुसमाचार प्रचार गरेर आफ्नो सृष्टिकर्ताप्रति मूल्याङ्कन देखाउने अनमोल सुअवसर पाउँछन्। (मत्ती २४:१४) यस अनमोल सुअवसरको तपाईं कत्तिको मोल गर्नुहुन्छ?
२ परमेश्वरको राज्य प्रचारकार्यले उहाँको आदर गर्नुका साथै वर्तमान भद्रगोल समयको कारण निराशित मानिसहरूलाई आशा र शान्ति प्रदान गर्छ। (हिब्रू १३:१५) यस सन्देश स्वीकार्नेहरूले अनन्त जीवन पाउँछन्। (यूह. १७:३) कुन सांसारिक पेसाले यस्ता लाभहरू दिन्छ? प्रेरित पावलले आफ्नो सेवकाईप्रति देखाएको मूल्याङ्कन उनको सेवकाईमा प्रस्टै झल्किन्थ्यो। उनले सेवकाईलाई अमूल्य धन ठान्थे।—प्रेरि. २०:२०, २१, २४; २ कोरि. ४:१, ७.
३ हाम्रो अनमोल सुअवसरप्रति कृतज्ञता देखाउने: प्रचार गर्ने यस सुअवसरप्रति कृतज्ञता देखाउने एउटा तरिका आफ्नो सेवकाईको गुणस्तरमा ध्यान दिनु हो। के हामी हाम्रो कुरा सुन्नेहरूको हृदय छुने प्रस्तुतिहरू तयार पार्न समय निकाल्छौं? के हामी धर्मशास्त्र चलाउने र मानिसहरूसित तर्क गर्ने आफ्नो सीपलाई तिखार्न सक्छौं? के हामी आफूलाई खटाइएको इलाका पूरै ढाक्छौं? के हामी बाइबल अध्ययन सुरु गर्न र सञ्चालन गर्न सक्छौं? विगत र वर्तमानका विश्वासी मसीहीहरू जस्तै हामी पनि यस क्रियाकलापलाई उचित दृष्टिकोणले हेर्छौं र यस सुअवसरको कदर गर्छौं।—मत्ती २५:१४-२३.
४ बुढेसकाल, बिमारी वा अन्य कठिन परिस्थितिको बावजुद सेवकाईमा भाग लिन तपाईंले गर्नुभएको अथक प्रयासहरूलाई मूल्याङ्कन गरिन्छ भनी थाह पाउँदा पक्कै पनि आश्वासनदायी हुन्छ। यहोवाको सेवा गर्न गरिएका यस्ता प्रयासहरूको उहाँ मोल गर्नुहुन्छ भनी परमेश्वरको वचनले हामीलाई आश्वासन दिन्छ साथै अरूको दृष्टिकोणमा सामान्यजस्तो देखिने प्रयासलाई समेत परमेश्वर मूल्यवान् ठान्नुहुन्छ।—लूका २१:१-४.
५ परमेश्वरको राज्यको प्रचार गर्नु ठूलो सन्तुष्टिको स्रोत हो। एक जना ९२ वर्षीया बहिनीले यसो भनिन्: “आफू परमेश्वरको सेवामा समर्पित भएर बिताएको ८० वर्षलाई फर्केर हेर्न पाउनु कत्रो ठूलो सुअवसर हो अनि मलाई कुनै पछुतो पनि छैन! म फेरि बाँच्न पाएँ भने आफ्नो जीवन यसरी नै बिताउने छु। किनभने, ‘परमेश्वरको करुणा जीवनभन्दा उत्तम छ।’ ” (भज. ६३:३) परमेश्वरबाट पाएको यस अनमोल सुअवसर अर्थात् परमेश्वरको राज्य प्रचारकार्यलाई हामी पनि अमूल्य धन ठानौं।
-
-
प्रगतिशील बाइबल अध्ययन सञ्चालन गर्नेराज्य सेवकाई—२००५ | अगस्त
-
-
प्रगतिशील बाइबल अध्ययन सञ्चालन गर्ने
भाग १२: विद्यार्थीहरूलाई बाइबल अध्ययन सुरु र सञ्चालन गर्न मदत दिने
१ बाइबल विद्यार्थीहरू क्षेत्र सेवकाईमा भाग लिन थालेपछि आफ्नै बाइबल अध्ययन सुरु र सञ्चालन गर्ने कुरा सोच्दा मात्रै पनि उनीहरूको मुटु ढुकढुक हुन थाल्न सक्छ। हामी कसरी उनीहरूलाई आफ्नो सेवकाईको यस महत्त्वपूर्ण पक्षमा निर्धक्क बनाउन सक्छौं?—मत्ती २४:१४; २८:१९, २०.
२ बप्तिस्मा अप्राप्त प्रकाशक हुँदासम्ममा बाइबल विद्यार्थीले ईश्वरतान्त्रिक सेवकाई स्कूलबाट सम्भवतः पूरापूर लाभ उठाइसकेका हुन सक्छन्। असाइनमेन्ट तयारी र प्रस्तुत गर्ने प्रशिक्षण पाएर उनी “सत्यको वचनलाई ठीकसँग प्रयोग गरेर शर्माउन नपर्ने खेताला” हुन चाहिने शिक्षण कलामा खारिंदै जान्छन्।—२ तिमो. २:१५.
३ उदाहरणद्वारा सिकाउनुहोस्: येशूले चेलाहरूलाई स्पष्ट निर्देशन दिनुभएर अनि आफैले असल उदाहरण बसाल्नुभएर प्रशिक्षण दिनुहुन्थ्यो। उहाँले भन्नुभयो: “हरेक निपुण भएपछि आफ्ना गुरु जत्तिकै हुनेछ।” (लूका ६:४०) तपाईंले पनि येशूले जस्तै सेवकाईमा असल उदाहरण बसाल्नुपर्छ। विद्यार्थीले सेवकाईमा तपाईंको उदाहरण देखेपछि बाइबल अध्ययन सुरु गर्ने मनसाय राखेर पुनःभेट गर्नुपर्ने रहेछ भनेर बुझ्नेछन्।
४ बाइबल अध्ययनको प्रस्ताव राख्दा, यस अध्ययनको प्रबन्धबारे घरधनीलाई सबै कुरा बताइरहनु पर्दैन भनेर आफ्नो विद्यार्थीलाई बुझाउनुहोस्। प्राय अध्ययन गरिने प्रकाशनको एक वा दुई अनुच्छेद मात्र चलाएर बाइबल अध्ययन कसरी गरिन्छ भनी घरधनीलाई देखाउनु राम्रो हुन्छ। यस विषयमा मदतकारी सुझावहरू हाम्रो राज्य सेवकाई-को यसै अंकको पृष्ठ ८ र जनवरी २००२, पृष्ठ ६ मा पाउन सकिन्छ।
५ मिल्छ भने, विद्यार्थीलाई आफूसित वा अर्को अनुभवी प्रकाशकसित बाइबल अध्ययनहरूमा जान निम्त्याउनुहोस्। उनलाई कुनै अनुच्छेदमा वा मुख्य शास्त्रपदबाट टिप्पणी गर्न लगाउन सक्नुहुन्छ। यसो गर्दा, प्रगतिशील बाइबल अध्ययन सञ्चालन कसरी गर्न सकिने रहेछ भनी विद्यार्थी आफैले हेरेर धेरै कुरा सिक्नेछन्। (हितो. २७:१७; २ तिमो. २:२) उनको प्रशंसा गर्नुहोस् र उनले कसरी उन्नति गर्न सक्छन् बताउनुहोस्।
६ बप्तिस्मा अप्राप्त नयाँ प्रकाशकहरूलाई परमेश्वरको वचनको शिक्षक हुन प्रशिक्षण दिंदा उनीहरू बाइबल अध्ययन सुरु र सञ्चालन गर्ने “सुकर्म[को]” लागि सुसज्जित हुनेछन्। (२ तिमो. ३:१७) “जसले मन गर्छ, त्यसले जीवनको पानी सित्तैंमा लेओस्” भन्ने यो मायालु निमन्त्रणा दिने काममा उनीहरूसित हातेमालो गर्न पाउँदा कत्ति ठूलो सन्तुष्टि पाइन्छ।—प्रका. २२:१७.
-