फलदायी सेवकाईको लागि प्रेम नभई हुँदैन
१ “मकहाँ आओ, म तिमीहरूलाई विश्राम दिनेछु।” (मत्ती ११:२८) यी मनमोहक शब्दहरूमा मानिसहरूप्रति येशूको गहिरो प्रेम झल्कन्छ। निर्दयी संसारको बोझले गर्दा मानिसहरू दबिएका छन्। त्यसकारण हामी मसीही सेवकहरू येशूको अनुकरण गर्दै तिनीहरूप्रति प्रेम देखाउन चाहन्छौं। मानिसहरूलाई सुसमाचार सुनाउँदा हामी यस्तो प्रेम कसरी देखाउन सक्छौं?
२ बोलीद्वारा: मानिसहरूप्रतिको प्रेमले गर्दा येशूले मौका पाउनेबित्तिकै सुसमाचार सुनाउनुहुन्थ्यो। (यूह. ४:७-१४) यस्तो प्रेम छ भने हामी अनौपचारिक साक्षी दिन हिचकिचाउनेछैनौं। डाक्टरलाई जँचाउन जाँदा, आफ्नो पालो पर्खिरहेकी एउटी आइमाईलाई छ वर्षीया केटीले राम्रो साक्षी दिइन्। उनले किन यसो गरिन्? उनले यसो भनिन्: “किन हो किन, त्यो आइमाईले पनि यहोवाबारे थाह पाउनुपर्छ जस्तो लाग्यो।”
३ निष्कपट र न्यानो मुस्कान अनि मित्रैलो बोलीद्वारा हाम्रो चासो देखाउन सक्छौं। अरूको कुरा ध्यान दिई सुनेर, उनीहरूको चिन्ता बुझिदिएर, व्यक्तिविशेषप्रति साँचो चासो देखाएर यस्तै प्रेम देखाइरहेका हुन्छौं। (हितो. १५:२३) येशूको अनुकरण गर्दै परमेश्वरको राज्यबारे प्रोत्साहनदायी सन्देश सुनाउनुका साथै मानिसहरूप्रति यहोवाको दयालाई जोड दिनुपर्छ।—मत्ती २४:१४; लूका ४:१८.
४ कामद्वारा: येशूले अरूको आवश्यकता बुझ्नुहुन्थ्यो अनि व्यावहारिक तथा भौतिक तवरमा मदत गर्नुहुन्थ्यो। (मत्ती १५:३२) प्रचारकार्यमा भाग लिंदा हामीले पनि अरूलाई दया देखाउने मौका पाउन सक्छौं। टेलिफोन गरिरहकी एउटी आइमाईलाई अर्को व्यक्तिले फोनमा बताइरहेको महत्त्वपूर्ण सन्देश बुझ्न निकै गाह्रो भइरहेको एउटी साक्षी बहिनीले देखिन्। टेलिफोनमा भन्न खोजिएको कुरा बुझाइदिएर यस बहिनीले मदत गरिन्। यसरी दया देखाउँदा बाइबलसम्बन्धी छलफल गर्ने बाटो खुल्यो र त्यस आइमाई बाइबल अध्ययन गर्न राजी भइन्। त्यसै गरी, पुनःभेट गर्न जाँदा साक्षी भाइले घरधनी ढोकाबाट ठूलो सोफा छिराउन नसकेर हैरान भएको देखे। सोफा सार्न मदत गरेपछि ती घरधनीले धन्यवाद दिए र दुवै जना मजाले सोफामा बसेर बाइबल अध्ययन गर्न थाले।
५ प्रचारकार्यमा भाग लिंदा परमेश्वर र छिमेकीप्रति हाम्रो प्रेम देखाइरहेका हुन्छौं। (मत्ती २२:३६-४०) यसरी बोली र कामद्वारा सोझा मानिसहरूलाई मदत गर्दा तिनीहरूले हामीसित साँच्चै सत्य रहेछ भनेर बुझ्नेछन्।