स्वर्गको राजाको रूपमा आफ्नो “उपस्थिति” हुँदा येशूले भविष्यवाणी गर्नुभएझैं संसारमा युद्ध, अनिकाल, भूकम्प र महामारी हुनु उल्लेखनीय छ। (मत्ती २४:३-८; लूका २१:११) यी घटनाहरूले सन्‌ १९१४ मा स्वर्गमा परमेश्‍वरको राज्य स्थापना भयो र यस दुष्ट युगको “अन्तको दिन” सुरु भयो भनेर ठोस प्रमाण दिन्छ।—२ तिमोथी ३:१-५.

माइकल नाम गरेका स्वर्गदूतबारे बाइबलमा धेरै चोटि उल्लेख गरिएको पाइँदैन। तर तिनीबारे उल्लेख गरिंदा तिनी कुनै न कुनै काममा सक्रिय भई लागिरहेका हुन्छन्‌। दानियलको किताबमा माइकल दुष्ट स्वर्गदूतहरूसित लड्‌दै गरेको विवरण पाइन्छ। यहूदाको पत्रमा तिनी सैतानसँग विवाद गर्दै गरेको अनि प्रकाशको किताबमा सैतान र त्यसका दुष्ट स्वर्गदूतहरूसित लडाइँ गर्दै गरेको विवरण पाइन्छ। यहोवाको शासनको पक्षमा खडा हुँदै र उहाँका शत्रुहरूसित लड्‌दै माइकल आफ्नो नामअनुसारकै काम गर्छन्‌। तिनको नामको अर्थ हो, “परमेश्‍वरजस्तो को छ?” तर को हुन्‌ माइकल?

कोही-कोही व्यक्‍ति धेरै नामले चिनिन्छन्‌। उदाहरणका लागि, कुलपिता याकूबलाई इस्राएल अनि प्रेषित पत्रुसलाई सिमोन पनि भनिन्थ्यो। (उत्पत्ति ४९:१, २; मत्ती १०:२) त्यसैगरि येशू ख्रीष्ट पृथ्वीमा आउनुअघि र स्वर्ग फर्केपछिको नाम माइकल हो भनी बाइबलले सङ्‌केत गर्छ। हामी यस्तो निष्कर्षमा किन पुग्न सक्छौं, बाइबलबाट केही प्रमाण जाँचेर हेरौं।

प्रधान दूत: परमेश्‍वरको वचनमा माइकललाई “प्रधान दूत” भनिएको छ। (यहूदा ९) याद गर्नुहोस्‌, बाइबलमा “प्रधान दूत” भन्‍ने शब्द बहुवचनमा नभई सधैं एकवचनमा मात्र प्रयोग गरिएको छ। यसबाट प्रधान दूत एक जना मात्र छ भनी स्पष्ट हुन्छ। साथै बाइबलमा येशू र प्रधान दूत एउटै हुनुहुन्छ भन्‍ने सङ्‌केत पाइन्छ। पुनर्जीवित भएका प्रभु येशू ख्रीष्टबारे १ थिस्सलोनिकी ४:१६ यसो भन्छ: “प्रभु स्वयम्‌ ठूलो सोर, प्रधान दूतको आवाज अनि परमेश्‍वरको बिगुलको आवाजसहित स्वर्गबाट ओर्लनुहुनेछ।” यहाँ येशूको सोरलाई प्रधान दूतको आवाज भनिएको छ। त्यसकारण यस शास्त्रपदबाट येशू नै प्रधान दूत माइकल हुनुहुन्छ भनेर स्पष्ट हुन्छ।

सेनापति: ‘माइकल र उनका स्वर्गदूतहरूले त्यस अजिङ्‌गरसित अनि त्यसका स्वर्गदूतहरूसित युद्ध गरे’ भनी बाइबल बताउँछ। (प्रकाश १२:७) अतः माइकल वफादार स्वर्गदूतहरूका सेनापति हुनुहुन्छ। येशू वफादार स्वर्गदूतहरूको सेनाका नेता हुनुहुन्छ भनेर पनि प्रकाशको किताबमा वर्णन गरिएको छ। (प्रकाश १९:१४-१६) अनि प्रेषित पावलले “प्रभु येशू” र ‘उहाँका शक्‍तिशाली स्वर्गदूतहरू’ भनेर तोकेरै उल्लेख गरेका छन्‌। (२ थिस्सलोनिकी १:७) त्यसैले बाइबलमा माइकल र ‘तिनका स्वर्गदूतहरू’ अनि येशू र ‘उहाँका स्वर्गदूतहरू’ दुवैबारे बताइएको छ। (मत्ती १३:४१; १६:२७; २४:३१; १ पत्रुस ३:२२) माइकलको नेतृत्वमा एउटा सेना अनि येशूको नेतृत्वमा अर्कै सेना छ भनी बाइबलमा कतै पनि उल्लेख गरिएको छैन। त्यसैले माइकल अरू कोही नभई स्वर्गमा विशेष भूमिका निभाइरहेका येशू ख्रीष्ट हुनुहुन्छ भन्‍ने निष्कर्षमा पुग्नु तार्किक छ।

प्रकाशको किताबमा भएका कतिपय अभिव्यक्‍तिहरूको प्रतीकात्मक अर्थ छ। (प्रकाश १:१) उदाहरणको लागि, एउटी स्त्रीको निधारमा “महान्‌ बेबिलोन” लेखिएको छ। त्यो स्त्री ‘भीड र राष्ट्रमाथि’ बसेकी छे। (प्रकाश १७:१, ५, १५) एउटी स्त्री त्यसरी ‘भीड र राष्ट्रमाथि’ बस्न सक्दैन। त्यसैले महान्‌ बेबिलोन प्रतीकात्मक हुनुपर्छ। त्यसोभए त्यो स्त्री अर्थात्‌ वेश्‍याले केलाई चित्रण गर्छ?

प्रकाश १७:१८ मा त्यही प्रतीकात्मक स्त्रीबारे वर्णन गरिएको छ, जो “ठूलो सहर हो, जसले पृथ्वीका राजाहरूमाथि राज गर्छ।” “सहर” शब्दले मानिसहरूको सङ्‌गठित समूहलाई बुझाउँछ। त्यस “ठूलो सहर”-ले