‘प्रभु, हामीलाई प्रार्थना गर्न सिकाउनुहोस्‌।’ (लूका ११:१) यो बिन्ती येशूको एक जना चेलाले गरेका थिए। यसको जवाफमा येशूले दुइटा कथा सुनाउनुभयो। प्रार्थना कसरी गर्ने र परमेश्‍वर कस्तो प्रार्थना सुन्‍नुहुन्छ भनेर ती कथाले प्रस्ट पार्छ। परमेश्‍वरले प्रार्थना सुन्‍नुहुन्छ कि हुन्‍न जस्तो लाग्छ भने येशूको जवाफ तपाईंलाई रोचक लाग्नेछ।—लूका ११:५-१३ पढ्‌नुहोस्‌।

पहिलो कथामा प्रार्थना गर्ने व्यक्‍तिबारे बताइएको छ। (लूका ११:५-८) त्यस कथामा एक जना मानिसको घरमा राती अबेला पाहुना आउँछ। पाहुनालाई खुवाउन केही खानेकुरा छैन। उसलाई आपत्‌ पर्छ। रात निकै छिप्पिसकेको छ। तैपनि ऊ रोटी पैंचो माग्न साथीको घर जान्छ। सुरुमा त साथी उठ्‌न मान्दैन किनभने सबै सुतिसकेका छन्‌। तर ऊ लाज नमानी मागिरहन्छ। अन्ततः खानेकुरा दिन साथी बाध्य हुन्छ।a

यस कथाले प्रार्थनाबारे कुन कुरा बुझाउन खोज्दै छ? येशूले हामीलाई मागिरहनु, खोजिरहनु अनि ढकढक्याइरहनुको महत्त्वबारे बताउँदै हुनुहुन्थ्यो। (लूका ११:९, १०) किन? के येशूले परमेश्‍वर हाम्रो प्रार्थना सुन्‍न चाहनुहुन्‍न भन्‍न खोज्नुभएको हो? अहँ, त्यसो होइन। परमेश्‍वर मदत गर्न हिचकिचाउने साथीजस्तो हुनुहुन्‍न, उहाँमाथि विश्‍वास राखेर प्रार्थना गर्नेहरूको उचित इच्छा पूरा गर्न उहाँ इच्छुक हुनुहुन्छ। अटुट रूपमा प्रार्थना गरिरहेर हामी यस्तो विश्‍वास देखाउँछौं। एउटै कुरा पटक-पटक मागिरहँदा के प्रस्ट हुन्छ भने हामी आफूले मागेको कुरा साँच्चै चाहन्छौं र परमेश्‍वरले त्यो दिनुहुन्छ भनेर पक्का विश्‍वास गर्छौं। तर हाम्रो माग परमेश्‍वरको इच्छाबमोजिम हुनुपर्छ।—मर्कूस ११:२४; १ यूहन्‍ना ५:१४.

दोस्रो कथाले “प्रार्थना सुन्‍नुहुने” यहोवा परमेश्‍वरबारे बताउँछ। (भजन ६५:२) येशूले यस्तो प्रश्‍न सोध्नुभयो: “तिमीहरूमध्ये कोचाहिं यस्तो बुबा होला, जसले आफ्नो छोराले माछा माग्दा माछाको सट्टा सर्प देला? अथवा उसले अण्डा माग्दा बिच्छी देला?” जवाफ स्पष्ट छ, मायालु बुबाले छोराछोरीलाई कहिल्यै नराम्रो कुरा दिंदैन। येशूले कथाको अर्थ यसरी बुझाउनुहुन्छ: त्रुटिपूर्ण बुबाले त छोराछोरीलाई “राम्रा कुरा” दिन्छ भने “स्वर्गमा बस्नुहुने बुबाले” पृथ्वीमा रहेका छोराछोरीलाई सबैभन्दा राम्रो कुरा अर्थात्‌ ‘पवित्र शक्‍ति झन्‌ कत्ति धेरै दिनुहुनेछ!’b—लूका ११:११-१३; मत्ती ७:११.

यस कथाले “प्रार्थना सुन्‍नुहुने” यहोवाबारे के बताउँछ? यहोवा हाम्रो मायालु बुबा हुनुहुन्छ अनि उहाँ हाम्रो आवश्‍यकता पूरा गरिदिन इच्छुक हुनुहुन्छ भनेर येशूले बताउन खोज्दै हुनुहुन्थ्यो। यसकारण यहोवाका उपासकहरू कुनै सङ्‌कोच नमानी उहाँसामु आफ्नो बिन्ती राख्न सक्छन्‌। उहाँ हाम्रो सर्वोत्तम हित चाहनुहुन्छ। यो कुरा थाह पाउँदा उहाँको जवाफ हामीले सोचेभन्दा फरक किन नहोस्‌, त्यो सजिलै स्वीकार्न सक्नेछौं।c (w13-E 04/01)

एक जना महिलाले भनिन्‌, “म आफूलाई असाध्यै अयोग्य महसुस गर्छु। त्यसैले म यहोवा परमेश्‍वरसित नजिक हुन सकेकी छैन।” तिनलाई आफूसित यहोवाको चासो पाउन लायक कुनै कुरा छैन जस्तो लाग्छ। के तपाईंलाई पनि त्यस्तै लाग्छ? लाग्छ भने तपाईंको मनमा यस्तो प्रश्‍न आउँछ होला, ‘के यहोवाले आफ्ना एक-एक जना उपासकको चासो राख्नुहुन्छ?’ पक्कै राख्नुहुन्छ! उहाँले प्रत्येक उपासकको चासो राख्नुभएको कुरा येशूका शब्दहरूबाट थाह पाउँछौं।—यूहन्‍ना ६:४४ पढ्‌नुहोस्‌।

यहोवाको व्यक्‍तित्व र उहाँको इच्छाबारे येशूलाई जत्तिको राम्ररी अरू कसैलाई थाह छैन। (लूका १०:२२) यहोवालाई यत्तिको राम्ररी चिन्‍ने येशूले भन्‍नुभयो: “मलाई पठाउनुहुने बुबाले नखिचेसम्म कुनै मानिस मकहाँ आउन सक्दैन।” त्यसकारण यहोवाले हामीलाई नखिच्नुभएसम्म न येशूको चेला बन्‍न सक्छौं न त यहोवाको उपासक। (२ थिस्सलोनिकी २:१३) येशूको भनाइको अर्थ बुझ्यौं भने परमेश्‍वरले हामी प्रत्येकलाई कति चासो राख्नुहुन्छ भनेर थाह पाउनेछौं।

यहोवाले हामीलाई खिच्नुको अर्थ के हो? ‘खिच्नु’ भनेर अनुवाद गरिएको ग्रीक क्रिया माछाको जाल तान्‍ने अर्थ बुझाउन पनि प्रयोग गरिन्छ। (यूहन्‍ना २१:६, ११) के यहोवाले हामीलाई जबरजस्ती तानेर उहाँको सेवा गर्न लगाउनुहुन्छ? अहँ लगाउनुहुन्‍न। यहोवाले हामीलाई स्वतन्त्र इच्छा दिनुभएको छ। त्यसैले उहाँ कसैलाई पनि जबरजस्ती गर्नुहुन्‍न। (व्यवस्था ३०:१९, २०) यहोवा सबैको मन जाँच्नुहुन्छ र आफूसित नजिक हुन चाहने मानिस खोज्नुहुन्छ। (१ इतिहास २८:९) त्यस्तो मानिस भेट्टाएपछि उहाँले मायालु ढङ्‌गमा कदम चाल्नुहुन्छ। कसरी?

यहोवाले “उचित मनसाय” भएको व्यक्‍तिलाई बिस्तारै आफूतर्फ खिच्नुहुन्छ। (प्रेषित १३:४८) यहोवाले हामीलाई दुई तरिकामा खिच्नुहुन्छ। एउटा हो, उहाँले “उचित मनसाय” भएको व्यक्‍तिसम्म बाइबलको सन्देश पुऱ्‍याउनुहुन्छ। अर्को, पवित्र शक्‍तिद्वारा मदत गर्नुहुन्छ। यहोवाले पवित्र शक्‍तिद्वारा बाइबलको सत्य कुरा बुझ्न र त्यसलाई जीवनमा लागू गर्न मदत गर्नुहुन्छ। (१ कोरिन्थी २:११, १२) परमेश्‍वरको मदतविना न हामी येशूको साँचो चेला बन्‍न सक्छौं न त यहोवाको समर्पित उपासक।

त्यसोभए यहोवा परमेश्‍वरबारे यूहन्‍ना ६:४४ मा येशूका शब्दहरूबाट के सिक्न सक्छौं? यहोवा मानिसहरूमा असल कुरा देख्नुहुन्छ र तिनीहरू प्रत्येकको चासो राख्नुहुन्छ। त्यसैले तिनीहरूलाई खिच्नुहुन्छ। यो कुरा बुझेपछि यस लेखको सुरुमा उल्लिखित महिलाले ठूलो सान्त्वना पाइन्‌। तिनी भन्छिन्‌: “यहोवाको सेवक हुन पाउनु सबैभन्दा ठूलो सुअवसर हो। यहोवाले मलाई आफ्नो सेवकको रूपमा रोज्नुभयो। म पक्कै उहाँको लागि अनमोल हुनुपर्छ।” के तपाईंलाई पनि उहाँले अनमोल ठान्‍नुहुन्छ? यहोवा प्रत्येक उपासकको चासो राख्नुहुन्छ भनेर थाह पाएपछि के तपाईं उहाँसित नजिक हुन चाहनुहुन्‍न र? (w13-E 05/01)