तपाईँ कति जना यहोवाका साक्षीलाई चिन्‍नुहुन्छ? हामीमध्ये कोही तपाईँको छिमेकी, सहकर्मी वा सहपाठी हौँला। हामीले तपाईँसित बाइबलबारे छलफल पनि गरेका छौँ होला। हामी वास्तवमा को हौँ अनि हामी किन आफ्नो विश्‍वासबारे अरू मानिसलाई बताउँछौँ?

हामी साधारण मानिसहरू हौँ। हाम्रो सामाजिक अवस्था र पृष्ठभूमि भिन्‍नाभिन्‍नै छ। हामीमध्ये कोही-कोही पहिले अर्कै धर्म मान्थ्यौँ भने कोहीचाहिँ ईश्‍वरमा विश्‍वासै गर्दैनथ्यौँ। तर यहोवाको साक्षी हुनुअघि हामीले बाइबलको शिक्षा होसियारीसाथ जाँच्न समय निकाल्यौँ। (प्रेषित १७:११) आफूले सिकेको कुरा साँचो रहेछ भनेर हामीले बुझ्यौँ। त्यसपछि अरू कसैको करकापले होइन तर आफै उत्प्रेरित भएर यहोवाको उपासना गर्ने निर्णय गऱ्‍यौँ।

हामी बाइबल अध्ययनबाट लाभ उठाउँछौँ। अरू सबैको जस्तै हाम्रो पनि आ-आफ्नै समस्या र कमीकमजोरी छन्‌। तर बाइबलमा दिइएका सिद्धान्तहरू दिनहुँ लागू गर्ने कोसिस गर्दा आफ्नो जीवनमा राम्रा परिवर्तनहरू आएको हामीले अनुभव गरेका छौँ। (भजन १२८:१, २) हामीले बाइबलबाट सिकेका राम्रा कुराहरू अरूलाई बताउनुको एउटा कारण यही हो।

हामी परमेश्‍वरले तोक्नुभएको स्तरअनुरूप जीवन बिताउँछौँ। बाइबलमा दिइएको स्तरअनुरूप जीवन बिताउँदा हाम्रो हित हुन्छ। यसले अरूको आदर गर्न अनि इमानदार र दयालु हुन पनि सिकाउँछ। यसले मानिसहरूलाई शारीरिक र मानसिक तवरमा स्वस्थ रहन मदत गर्छ। साथै समाजमा योगदान पुऱ्‍याउन र परिवारमा एकता कायम गर्न पनि मदत गर्छ। यसले नैतिक स्वच्छता विकास गर्न पनि मदत दिन्छ। “परमेश्‍वर पक्षपाती हुनुहुन्‍न” भनेर विश्‍वस्त भएकोले हामी जातीय अनि राजनैतिक भेदभाव नभएको अन्तरराष्ट्रिय परिवारका सदस्य हौँ। हुनत हामी साधारण मानिस हौँ तर समूहको रूपमा भने हाम्रो विशेष चिनारी छ।—प्रेषित ४:१३; १०:३४, ३५.

• यहोवाका साक्षीहरू र अरू मानिसबीच के समानता छ?

• यहोवाका साक्षीहरूले बाइबल अध्ययन गरेर कस्ता राम्रा कुराहरू सिकेका छन्‌?

थुप्रैले यहोवाका साक्षीहरू भनेको एउटा नयाँ धर्म हो भन्ठान्छन्‌। तर २ हजार ७ सय वर्षभन्दा अघि नै एक मात्र साँचो परमेश्‍वरले आफ्ना सेवकहरूलाई “मेरा साक्षी” भन्‍नुभयो। (यसैया ४३:१०-१२) इस्वी संवत्‌ १९३१ सम्म हामी बाइबल विद्यार्थी भनेर चिनिन्थ्यौँ। त्यसोभए हामीले किन यहोवाका साक्षीहरू भन्‍ने नाम अपनायौँ?

यस नामले परमेश्‍वरको चिनारी दिन्छ। पुराना पाण्डुलिपिहरूअनुसार बाइबलमा परमेश्‍वरको नाम ‘यहोवा’ हजारौँ पटक उल्लेख गरिएको छ। तर थुप्रै अनुवादमा परमेश्‍वरको नामको सट्टा परमप्रभु वा परमेश्‍वरजस्ता पदवीहरू प्रयोग गरिएका छन्‌। तर मोसालाई साँचो परमेश्‍वरले आफ्नो व्यक्‍तिगत नामद्वारा नै चिनाउनुभयो र उहाँले यसो भन्‍नुभयो: “मेरो नाम सधैँका लागि यही रहनेछ।” (प्रस्थान ३:१५) यसरी उहाँले आफू अरू सबै झूटा देवभन्दा छुट्टै भएको देखाउनुभयो। त्यसैले यो पवित्र नाम वहन गर्न पाउनु हाम्रो लागि ठूलो सम्मानको कुरा हो।

यस नामले हाम्रो कामबारे बताउँछ। पुरातन समयका थुप्रै असल मानिसले यहोवामाथिको आफ्नो विश्‍वासबारे साक्षी दिए। तीमध्ये पहिलो व्यक्‍ति हाबिल थिए। शताब्दियौँको दौडान नुह, अब्राहाम, सारा, मोसा, दाउद अनि अरू थुप्रै व्यक्‍ति बाइबलमा उल्लेख गरिएका साक्षीहरूको “बाक्लो बादल”-मा सामेल भए। (हिब्रू ११:४–१२:१) एक जना निर्दोष व्यक्‍तिको पक्षमा कसैले अदालतमा साक्षी दिएजस्तै हामी पनि अरूलाई परमेश्‍वरबारे सत्य कुरा बताउन कटिबद्ध छौँ।

यो नाम वहन गर्दा हामी येसुको अनुकरण गरिरहेका हुन्छौँ। बाइबलमा येसुलाई “विश्‍वासयोग्य अनि साँचो साक्षी” भनिएको छ। (प्रकाश ३:१४) ‘मैले परमेश्‍वरको नाम प्रकट गरेको छु’ भनेर येसु आफैले भन्‍नुभयो र परमेश्‍वरबारे “सत्यको साक्षी” पनि दिनुभयो। (युहन्‍ना १७:२६; १८:३७) त्यसकारण ख्रिष्टका साँचो अनुयायीहरूले यहोवाको नाम वहन गर्नुपर्छ र यसबारे अरूलाई बताउनुपर्छ। यहोवाका साक्षीहरू आज यसै गर्न प्रयास गरिरहेका छन्‌।

• बाइबल विद्यार्थीले किन यहोवाका साक्षीहरू भन्‍ने नाम वहन गरे?

• यहोवाबारे साक्षी दिने व्यक्‍तिहरू पृथ्वीमा कहिलेदेखि थिए?

• यहोवाको महान्‌ साक्षी को हो?