बाबेल सहरनजिकै उर भन्‍ने सहर थियो। त्यहाँका मानिसहरू यहोवालाई नभई अन्य थुप्रै देवीदेवतालाई पुज्थे। तर एक जना मानिस भने यहोवाको उपासना गर्थे। तिनको नाम अब्राहाम थियो।

यहोवा परमेश्‍वरले अब्राहामलाई यसो भन्‍नुभयो: ‘आफ्नो घर र नातेदार छोडेर जाऊ। तिमी जानुपर्ने ठाउँ म तिमीलाई देखाउनेछु।’ त्यसपछि परमेश्‍वरले यस्तो प्रतिज्ञा गर्नुभयो: ‘म तिमीबाट एउटा ठूलो जाति बनाउनेछु। तिमी नै सबै मानिसहरूका लागि आशिष्‌ साबित हुनेछौ।’

अब्राहामलाई आफू कहाँ जानुपर्ने हो थाह थिएन तर तिनले यहोवा परमेश्‍वरमाथि भरोसा राखे। त्यसैले अब्राहाम आज्ञाकारी हुँदै आफ्नी पत्नी सारा, बुबा तेरह, भतिजा लुत र आफ्नो सबै सामान लिएर लामो यात्राको लागि निस्के।

अब्राहाम र तिनको परिवार यहोवाले भन्‍नुभएको ठाउँमा पुग्दा तिनी ७५ वर्षका थिए। त्यस ठाउँको नाम कनान थियो। त्यहाँ यहोवा परमेश्‍वरले अब्राहामसित यस्तो प्रतिज्ञा गर्नुभयो: ‘तिमीले देखिरहेको यो ठाउँ म तिम्रो सन्तानलाई दिनेछु।’ तर अब्राहाम र सारा बूढाबूढी भइसकेका थिए र तिनीहरूको छोराछोरी थिएन। त्यसोभए यहोवा परमेश्‍वरले आफ्नो प्रतिज्ञा कसरी पूरा गर्नुहुने थियो?

अब्राहाम र साराको विवाह भएको धेरै वर्ष भइसकेको थियो। तिनीहरूले उरको आफ्नो आरामदायी घर छोडेर पालमा जीवन बिताइरहेका थिए। तर साराले गनगन गरिनन्‌ किनभने उनी यहोवामा भरोसा राख्थिन्‌।

सारालाई एउटा बच्चाको एकदमै चाहना थियो। त्यसैले उनले अब्राहामलाई यसो भनिन्‌: ‘यदि तपाईँबाट मेरी दासी हागारको सन्तान भएमा त्यो मेरै बच्चासरह हुनेछ।’ हागारले एउटा छोरा जन्माइन्‌। तिनको नाम इस्माएल राखियो।

धेरै वर्षपछिको कुरा हो, अब्राहाम ९९ र सारा ८९ वर्षकी हुँदा तिनीहरूकहाँ तीन जना पाहुना आए। अब्राहामले उनीहरूलाई रूखमुनि आराम गर्न अनि सँगै खाना खान भने। ती पाहुनाहरू को थिए, के तिमीलाई थाह छ? उनीहरू स्वर्गदूत थिए! उनीहरूले अब्राहामलाई यसो भने: ‘अर्को वर्ष यसै बेला तिम्री पत्नी साराले एउटा छोरा जन्माइसकेकी हुनेछिन्‌।’ साराले पालबाट यो कुरा सुनिरहेकी थिइन्‌। तिनले मनमनै हाँस्दै सोचिन्‌: ‘म बूढी भइसकेँ, के मैले साँच्चै सन्तानको सुख पाउन सकूँला र?’

यहोवा परमेश्‍वरले पठाउनुभएको स्वर्गदूतले प्रतिज्ञा गरेजस्तै अर्को वर्ष साराले एउटा छोरा जन्माइन्‌। अब्राहामले तिनको नाम इसहाक राखे, जसको अर्थ हो, “हाँसो।”

इसहाक पाँच वर्षजतिको हुँदा इस्माएलले इसहाकको खिसी गरेको साराले याद गरिन्‌। उनी आफ्नो छोराको रक्षा गर्न चाहन्थिन्‌। त्यसैले उनी अब्राहामकहाँ गइन्‌ अनि हागार र इस्माएललाई घरबाट निकालिदिन भनिन्‌। सुरुमा त अब्राहामले साराले भनेअनुसार गर्न मानेनन्‌। तर यहोवाले अब्राहामलाई यसो भन्‍नुभयो: ‘साराको कुरा सुन किनकि तिमीलाई प्रतिज्ञा गरिएको सन्तान इसहाकबाटै आउनेछ। तर म इस्माएलको पनि ख्याल राख्नेछु।’