युवाहरू सोध्छन्
मलाई अझ धेरै फलोअर र लाइक चाहिन्छ!
इलेन नाम गरेकी किशोरी यसो भन्छिन्: “स्कुलका साथीहरूको सयौँ अनलाइन फलोअर देख्दा उनीहरू त कस्तो फेमस रहेछ जस्तो लाग्यो। साँच्चै भन्नुपर्दा मलाई डाहै लाग्यो।”
के तपाईँले पनि यस्तै महसुस गर्नुभएको छ? गर्नुभएको छ भने यस लेखले तपाईँलाई सामाजिक सञ्जालमा धेरै फलोअर बनाउने र लाइक पाउने चाहनादेखि जोगिन मदत गर्नेछ।
कस्ता खतराहरू छन्?
हितोपदेश २२:१ यसो भन्छ: “प्रशस्त धनसम्पत्तिभन्दा राम्रो नाम कमाउनु बेस हो।” त्यसैले राम्रो नाम कमाउन चाहनु र अरूले मन पराएको चाहनु स्वाभाविक हो।
तर कहिलेकाहीँ अरूले मन पराओस् भन्ने चाहना यत्ति तीव्र हुन सक्छ कि लोकप्रिय नभएसम्म तपाईँ खुसी नै हुन सक्नुहुन्न जस्तो लाग्न सक्छ। यस्तो चाहनाका कस्ता खतराहरू हुन सक्छन्? सोह्र वर्षीया आन्या यसो भन्छिन्:
“लोकप्रिय हुनको लागि भनेर मान्छेहरूले स्कुलको दुई तलामाथिबाट हामफाल्ने जस्तो विचित्रको काम गरेको मैले देखेको छु।”
साथीहरूको ध्यान आफूतर्फ खिच्न केही युवा मूर्खतापूर्ण काम रेकर्ड गरेर अनलाइनमा पोस्ट गर्छन्। उदाहरणको लागि, केही किशोरकिशोरीले त क्यापसुलमा पाइने लुगा धुने सरफ खाएको भिडियो पोस्ट गरेका छन्। यस्तो क्यापसुल विषाक्त हुन्छ।
बाइबल भन्छ: “स्वार्थ वा अहङ्कारमा केही नगर।”—फिलिप्पी २:३, नयाँ संशोधित संस्करण।
यसबारे सोच्नुहोस्:
के तपाईँलाई आफ्नो फलोअर र लाइक धेरै हुनुपर्छ जस्तो लाग्छ?
के तपाईँ साथीहरूको ध्यान आफूतर्फ खिच्न र उनीहरूको प्रिय हुन आफ्नो स्वास्थ्य वा ज्यानै जोखिममा पार्नुहुन्छ?
देखावटी लोकप्रियता
मानिसहरूले लोकप्रिय हुन सधैँ आफ्नो ज्यान जोखिममा पार्छन् भन्ने छैन। केही मानिस अर्को तरिका पनि अपनाउँछन्। यसबारे २२ वर्षीया एरिका यसो भन्छिन्:
“आफ्नो मिल्ने साथीहरू धेरै छन् भनेर देखाउन मानिसहरू एकपछि अर्को फोटो पोस्ट गरिरहन्छन्। यसले तिनीहरू साँच्चै लोकप्रिय छन् भन्ने भान पार्छ।”
केही मानिसले आफू लोकप्रिय भएको देखाउन छलकपटसमेत गर्छन् भनेर १५ वर्षीया कारा भन्छिन्:
“मानिसहरूले आफू घरमै भए पनि पार्टीमा रमाइलो गरिरहेको जस्तो देख्नेगरि फोटो खिचेर पोस्ट गरेको मैले देखेको छु।”
बाइस वर्षीय म्याथ्युले पनि यस्तै काम गरेको स्विकार्छन्:
“मैले एउटा फोटो पोस्ट गरेँ अनि त्यसको लोकेसनमा माउन्ट एभरेस्ट भनेर ट्याग गरेँ। तर खासमा म कहिल्यै एसिया गएकै छैन।”
बाइबल भन्छ: “हामी सबै कुरामा इमानदार भई चल्न चाहन्छौँ।”—हिब्रू १३:१८.
यसबारे सोच्नुहोस्:
के तपाईँले आफू अझ लोकप्रिय हुन अरूलाई झुक्क्याउने खालका फोटोहरू पोस्ट गर्नुभएको छ?
के तपाईँले पोस्ट गर्नुभएको फोटो र कमेन्टले तपाईँको वास्तविक परिचय दिन्छ?
धेरै फलोअर बनाउने र लाइक पाउने चाहना
धेरै मानिसको विचारमा लोकप्रिय हुन नभई नहुने कुरा भनेको ठूलो सङ्ख्यामा फलोअर हुनु र लाइक पाउनु हो। माथि उल्लेख गरिएका म्याथ्युलाई पनि पहिला यस्तै लाग्थ्यो:
“म साथीहरूलाई ‘तिम्रो फलोअर कति छ’ वा ‘तिमीले अहिलेसम्म सबैभन्दा धेरै लाइक पाएको कति हो’ भनेर सोध्थेँ। अरूले मलाई फलो गरोस् भन्ने लोभमा म नचिनेका मान्छेहरूलाई पनि फलो गर्थेँ। पछि ममा लोकप्रिय हुने चाहना झन् बढ्दै गयो अनि सामाजिक सञ्जालले आगोमा घ्यू थप्ने काम गऱ्यो।”
अनलाइन लोकप्रियता जङ्क फुडजस्तै हो; केहीबेर त रमाइलै होला तर यसले साँचो सन्तुष्टि भने दिँदैन
पच्चिस वर्षीया मारियाले केही मानिसले फलोअर र लाइकको आधारमा आफ्नो पहिचान बनाउन खोजेको याद गरिन्:
“कोही-कोही आफूले पोस्ट गरेको सेल्फीमा धेरै लाइक आएन भने ‘म राम्री छैनँ’ भन्ने निष्कर्षमा पुग्छन्। यस्तो सोचाइ गलत भए तापनि धेरैले यस्तै महसुस गर्छन्। एक अर्थमा तिनीहरूले आफैलाई साइबर बुलिङ गरिरहेका हुन्छन्।”
बाइबल भन्छ: “हामी फोस्रो घमन्ड नगरौँ, प्रतिस्पर्धा गर्न एकअर्कालाई नउक्साऔँ अनि एकअर्काको ईर्ष्या नगरौँ।”—गलाती ५:२६.
यसबारे सोच्नुहोस्:
के तपाईँ सामाजिक सञ्जाल चलाउँदा आफूलाई अरूसित तुलना गर्नुहुन्छ?
के तपाईँलाई साँचो साथी बनाउनुभन्दा फलोअर बढाउनु अझ महत्त्वपूर्ण लाग्छ?