परिवारका लागि | छोराछोरी हुर्काउने

नराम्रो समाचार सुनेर डराएका छोराछोरीलाई मदत गर्नुहोस्‌

मनलाई अशान्त पार्ने समाचार र अक्सर त्यससँगसँगै देखाइने भिडियोहरू टिभी, फोन, ट्याबलेट र कम्प्युटरमा २४ सै घण्टा आइरहन्छ।

यस्तो समाचार केटाकेटीले पनि हेरिरहेका हुन्छन्‌।

डरलाग्दो समाचार देख्दा वा सुन्दा अत्यन्तै विचलित नहुन तपाईँ छोराछोरीलाई कसरी मदत गर्न सक्नुहुन्छ?

नराम्रो समाचारले केटाकेटीमा कस्तो असर पुऱ्‍याउँछ?

नराम्रो समाचार हेर्दा थुप्रै केटाकेटीको मन अशान्त हुन्छ। कोही-कोही केटाकेटीले आफूलाई कस्तो लागिरहेको छ भनेर खुलेर नबताउलान्‌ तर त्यो नराम्रो समाचारले तिनीहरूलाई असाध्यै विचलित बनाउन सक्छ।a आफ्ना आमाबुबा ज्यादै चिन्तित भएको देख्दा तिनीहरूको चिन्ता झनै बढ्‌न सक्छ।
केटाकेटीले समाचारमा देखेको कुरालाई गलत तरिकामा बुझिरहेका हुन सक्छन्‌। उदाहरणको लागि, केही केटाकेटीले समाचारमा देखेको नराम्रो कुरा आफ्नो परिवारले पनि भोग्नुपर्नेछ भन्ठान्छन्‌। साना केटाकेटीले त्यस्तो नराम्रो घटनाको भिडियो धेरै चोटि हेर्दा त्यो घटना पटक-पटक भइरहेको छ भन्ठान्छन्‌।
केटाकेटीलाई समाचारमा देखाइने घटनाको वास्तविकता थाह नहुन सक्छ। समाचार च्यानलहरूले धेरै दर्शक बटुलेर नाफा कमाउन नराम्रो घटनाको दृश्‍य देखाइरहन्छन्‌ भनेर केटाकेटीले बुझ्दैनन्‌। त्यसैले समाचार च्यानलहरूले दर्शकहरूको ध्यान खिचिरहन त्यसलाई सनसनीपूर्ण बनाउँछन्‌।

नराम्रो समाचार सुनेर चिन्तित भएका छोराछोरीलाई तपाईँ कसरी मदत गर्न सक्नुहुन्छ?

छोराछोरीलाई त्यस्तो नराम्रो समाचार घरीघरी हेर्न नदिनुहोस्‌। यसको मतलब, तपाईँका छोराछोरीले संसारमा के-कस्ता घटना भइरहेका छन्‌ भनेर थाह पाउनु आवश्‍यक छैन भन्‍ने होइन। तर तिनीहरूले कुनै नराम्रो समाचार पटक-पटक हेर्ने वा सुन्‍ने गऱ्‍यो भने त्यसले तिनीहरूलाई हानि पुऱ्‍याउँछ।

“कहिलेकाहीँ समाचारमा देखाइएको कुनै नराम्रो घटनाबारे लम्बेतान कुरा गर्दा त्यसले छोराछोरीमा कत्ति नराम्रो असर पारिरहेको हुन्छ भनेर यादै गर्दैनौँ।”—मारिया।

बाइबल सिद्धान्त: “चिन्ताले मन भारी बनाउँछ।”—हितोपदेश १२:२५.
ध्यान दिएर तिनीहरूको कुरा सुन्‍नुहोस्‌ र ढुक्क बनाउनुहोस्‌। तपाईँको छोरा वा छोरीलाई त्यो नराम्रो घटनाबारे कुरा गर्न गाह्रो लाग्छ भने त्यसबारे चित्र कोर्न भन्‍नुहोस्‌। उसलाई चिन्ता लागिरहेको कुराबारे उसले बुझ्नेगरि बताउनुहोस्‌ तर अनावश्‍यक कुराहरू नबताउनुहोस्‌।

“हाम्री छोरीसितै बसेर उसको कुरा ध्यान दिएर सुन्यौँ भने उसलाई सजिलो लाग्छ। तर हामीले उसलाई ‘अहिलेको संसार यस्तै हो, यस्तो त भइहाल्छ’ भन्यौँ भने त्यसले उसलाई झनै गाह्रो बनाउँछ।”—साराई।

बाइबल सिद्धान्त: “सुन्‍नलाई सधैँ तयार हुनुपर्छ, बोल्न हतार गर्नु हुँदैन।”—याकुब १:१९.
तपाईँका छोराछोरीलाई समाचारमा देखाइने कुराहरूप्रति सन्तुलित दृष्टिकोण राख्न मदत गर्नुहोस्‌। उदाहरणको लागि, कसैलाई अपहरण गरिएको समाचार सुन्दा तिनीहरूलाई त्यस्तो अपराध सामान्यतया भइरहने घटना हो जस्तो लाग्न सक्छ। तपाईँले तिनीहरूलाई सुरक्षित राख्न के-के गर्नुभएको छ, राम्ररी बुझाउनुहोस्‌। यो कुरा पनि याद गर्नुहोस्‌, यस्ता नराम्रा घटनाहरू सधैँ घट्‌ने गर्दैनन्‌। तर कहिलेकाहीँ मात्र हुने भएकोले समाचारमा देखाइन्छ।

“छोराछोरीलाई तिनीहरूका भावनाहरू बुझ्न मदत गर्नुहोस्‌। प्रायजसो अवस्थामा हामी के सोच्छौँ, त्यसले हाम्रो भावनालाई असर गर्छ। त्यसैले छोराछोरीलाई सकारात्मक कुरामा ध्यान दिन मदत गर्नुहोस्‌। यसो गर्नुभयो भने तिनीहरूले ढुक्क महसुस गर्न सक्नेछन्‌।”—लोर्डेस।

बाइबल सिद्धान्त: “बुद्धिमान्‌ मानिसको बोली समझले भरिएको हुन्छ अनि उसको बोलीले अरूलाई रिझाउन सक्छ।”—हितोपदेश १६:२३.

a साना केटाकेटीलाई असाध्यै चिन्ता लाग्यो भने तिनीहरू ओछ्यानमा पिसाब फेर्ने, स्कुल जान डराउने वा आमाबुबाबाट छुट्टिनै नमान्‍ने हुन सक्छन्‌।

तपाईँको छोरा वा छोरीले कुनै नराम्रो घटना आफ्नै आँखाले देखेको थियो भने नि?

सन्‌ २०१९, मे ७ को दिन दुई जना केटाले अमेरिकाको कोलोराडोको एउटा स्कुलमा अन्धाधुन्ध गोली चलाए। यसरी गोली चल्दा एक जना विद्यार्थीको ज्यान गयो र आठ जना घाइते भए। नौ वर्षीय ज्याक त्यही स्कुलमा पढ्‌थे र त्यो घटना घटेको बेला तिनी स्कुलमै थिए। यसले गर्दा ज्याकमा परेको नकारात्मक असर हटाउन तिनको बुबा बेन र आमा केसीले कस्तो प्रयास गरे, हेरौँ।

स्कुलमा भएको गोलीकाण्डले तपाईँको छोरामा कस्तो असर पऱ्‍यो?

केसी: त्यस घटनाको महिनौँपछिसम्म पनि ज्याक एकदमै चिन्तित देखिन्थ्यो।

बेन: एकैछिनमा ज्याकको मुड अर्कै भइहाल्थ्यो। एकछिन अघिसम्म कुनै चिन्ताविना खेलिरहेको छोरा केही कुराले गर्दा त्यो घटना सम्झनेबित्तिकै हामीकहाँ दौडेर आउँथ्यो र हामीसँगै टाँसिएर बस्थ्यो। त्यस घटनापछि ज्याकले आफ्नो परिवारमाथि पनि एकदमै नराम्रो दुर्घटना हुन सक्ने कुरा कल्पना गर्न थाल्यो। आफ्नै स्कुलमा त्यस्तो नराम्रो घटना घटेकोले उसलाई त्यसो हुनु स्वाभाविकै थियो।

के तपाईँहरूले त्यस गोलीकाण्डबारे समाचारमा हेर्नुभयो?

केसी: हेऱ्‍यौँ। वास्तवमा त्यो घटना घटेको एक हप्तासम्म त हामी तीनै जनाले त्यसबारे समाचार हेरेको हेऱ्‍यै गऱ्‍यौँ। तर त्यसरी एउटै समाचार हेरिरहँदा ज्याकलाई त्यो नमीठो घटनाले पिरोलिरहेको र हामी तीनै जनाको चिन्ता कम हुनुको साटो झनै बढेको मेरो श्रीमान्‌ र मैले याद गऱ्‍यौँ।

ज्याकलाई कुन कुराले सबैभन्दा धेरै मदत गऱ्‍यो?

केसी: शारीरिक क्रियाकलापले ज्याकको चिन्ता कम गर्न मदत गऱ्‍यो। त्यसैले हामी हरेक दिन त्यसको लागि समय निकाल्थ्यौँ। तर सबैभन्दा महत्त्वपूर्ण कुरा, ज्याक कुरा गर्न खोज्दा हामी उसको कुरा ध्यान दिएर सुन्थ्यौँ अनि राती सुत्नुअघि सबै कुरा शान्त भएको बेला उसलाई मनको कुरा खुलेर बताउन सजिलो भएको पनि मैले याद गरेँ। कहिलेकाहीँ हामी एक घण्टासम्म कुराकानी गर्थ्यौँ। त्यसपछि ऊ ढुक्क महसुस गर्थ्यो अनि उसको दुःख-चिन्ता बुझिदिने हामी छौँ जस्तो उसलाई लाग्थ्यो।

कुनै नराम्रो घटना सामना गरेका छोराछोरीको आमाबुबालाई तपाईँहरू कस्तो सुझाव दिनुहुन्छ?

बेन: छोराछोरीले परिवारमा सुरक्षित महसुस गर्ने वातावरण आमाबुबाले बनाउनुपर्छ। त्यसो हुँदा पछि तिनीहरूले कुनै नराम्रो घटना सामना गर्नुपरे पनि तिनीहरूलाई मदत गर्न सजिलो हुन्छ।

केसी: सबै बच्चा एकै खाले हुँदैनन्‌। कुनै नराम्रो घटनाले एक जनालाई एकदमै असर गर्छ भने अर्कोलाई त्यति असर नगर्न सक्छ। कसै-कसैलाई तपाईँले आफ्नो छोरा वा छोरीबारे अचाक्ली चिन्ता गरेको जस्तो लाग्न सक्छ तर उसलाई चाहिएको मदत दिन नहिचकिचाउनुहोस्‌। आफ्नो पारिवारिक बन्धन बलियो बनाउनुहोस्‌। यसो गर्दा बाहिरको संसार जतिसुकै असुरक्षित भए तापनि तपाईँको छोराछोरीले सुरक्षित महसुस गर्नेछन्‌।

पुनरावृत्ति: नराम्रो समाचार सुनेर डराएका छोराछोरीलाई तपाईँ कसरी मदत गर्न सक्नुहुन्छ?

छोराछोरीलाई त्यस्तो नराम्रो समाचार घरीघरी हेर्न नदिनुहोस्‌।
ध्यान दिएर तिनीहरूको कुरा सुन्‍नुहोस्‌ र ढुक्क बनाउनुहोस्‌।
तपाईँका छोराछोरीलाई समाचारमा देखाइने कुराहरूप्रति सन्तुलित दृष्टिकोण राख्न मदत गर्नुहोस्‌।