दुर्व्यवहारको सिकार भएका महिलाहरूको लागि मदत
“संसारका लाखौँ महिला, युवती र बालिका दुर्व्यवहारको सिकार भइरहेका छन्। के तपाईँले पनि दुर्व्यवहार भोग्नुपरेको छ? ईश्वरले महिलाहरूको सुरक्षामा किन चासो राख्नुहुन्छ र त्यस्तो दुर्व्यवहारको अन्त्य गर्न के गर्नुहुनेछ, थाह पाउनुहोस्।”
यो कुरा jw.org मा प्रकाशित “महिलाहरूको सुरक्षा—यसबारे ईश्वरको दृष्टिकोण” लेखमा उल्लेख गरिएको थियो। उक्त लेखको अन्तमा भएको लिङ्क थिचेर तपाईँ त्यसको पि डि एफ (PDF) फाइल डाउनलोड गर्न सक्नुहुन्छ। अनि त्यसलाई छाप्न सक्नुहुन्छ र फोल्ड गरेर चार-पृष्ठे पर्चाजस्तो बनाउन सक्नुहुन्छ। अमेरिकाकी स्टेसी बहिनी यसो भन्छिन्, “मैले यस लेखका केही प्रतिहरू छापेँ। अनि म र अर्की एक बहिनी हाम्रो मण्डलीको इलाकामा पर्ने एउटा महिला आश्रय गृहमा ती पर्चाहरू दिन गयौँ।”
त्यो आश्रय गृहमा काम गर्ने एउटी महिलाले त्यहाँ बस्नेहरूलाई बाँड्नको लागि यो पर्चा अझ धेरै ल्याइदिन सक्नुहुन्छ कि भनेर सोधिन्। त्यसैले ती बहिनीहरूले यो पर्चाको ४० वटा प्रति र ३० वटा jw.org कार्ड त्यहाँ पठाए। पछि त्यस आश्रय गृहकी म्यानेजरले बाइबल अध्ययन कसरी गराइन्छ भनेर देखाइदिन आग्रह गरिन्।
स्टेसी र अर्को दुई जना बहिनीहरूले अर्को आश्रय गृहमा पनि यो पर्चाका पाँच वटा प्रतिहरू दिए अनि त्यहाँ काम गर्नेहरूले पनि अझ धेरै ल्याइदिन आग्रह गरे। एउटी महिलाले यसो भनिन्: “यो पर्चाले यहाँ बस्ने महिलाहरूलाई धेरै मदत गर्नेछ। यो हामीलाई चाहिएकै कुरा थियो।” ती बहिनीहरू फेरि त्यहाँ गए अनि केही महिलाहरूले बाइबल अध्ययन कसरी गराइन्छ भनेर बुझ्न चाहे। तिनीहरूमध्ये दुई जनाले त आउँदो सप्ताहन्त सभाभवनमा उपस्थित हुने इच्छा पनि व्यक्त गरे।
स्टेसी भन्छिन्: “यो लेख पढेकाहरूको राम्रो प्रतिक्रिया देखेर हामीलाई निकै खुसी लागेको छ। यो लेखलाई छापेर पर्चाजस्तै फोल्ड गर्न मिल्ने भएकोले प्रचारमा दिन पनि एकदमै सजिलो छ। यो पर्चा दुर्व्यवहार भोगेका महिलाहरूलाई राज्य सन्देश सुनाउने निकै राम्रो सामग्री हो। दुर्व्यवहारको सिकार भएका अझ धेरै महिलाहरूलाई सुसमाचार सुनाउँदा यहोवाले हाम्रो प्रयासमा आशिष् दिनुभएको हेर्न हामी उत्सुक छौँ।”