Yotango kAakorinto
10 Aamwatate, onda hala mu tseye kutya ootatekulululwa ayehe oya li kohi yoshikogo, naayehe oya taaguluka efuta, 2 naayehe oya ninginithwa ye li aalanduli yaMoses, sho ya li kohi yoshikogo, naasho ya taaguluka efuta, 3 naayehe oya kala nokulya iikulya ya faathana yopambepo,* 4 naayehe oya kala haya nu oshikunwa shopambepo sha faathana. Oshoka oya kala haya nu omeya okuza memanya lyopambepo, molweendo lwawo, nemanya ndyoka olya li tali thaneke* Kristus. 5 Nonando ongawo, Kalunga ka li a hokwa oyendji yomuyo, nokwe ya hanagula po mombuga.
6 Iinima mbyoka oyi li iiholelwa kutse, tayi tu londodha, opo kaatu kale twa hala okulonga uuwinayi ngaashi yo. 7 Inatu hala wo okulongela iikalunga, ngaashi yamwe yomuyo ya li ya ningi; ngaashi owala kwa nyolwa taku ti: “Aantu oya kuutumba, ya lye nokunwa. Okuza mpoka oya thikama e taya tyapula pamwe.” 8 Inatu ya wo momilalo dha nyata,* ngaashi yamwe yomuyo ya li ya yi momilalo dha nyata* e taya si ayehe 23 000 mesiku limwe. 9 Inatu makela* wo Jehova, ngaashi yamwe yomuyo ya li ye mu makele, noya lika komayoka e taya si. 10 Inatu kala wo hatu ngungutula, ngaashi yamwe yomuyo ya li haya ngungutula e taya hanagulwa po komuhanaguli.* 11 Iinima mbika oye yi ningilwa yi kale iiholelwa, noya nyolwa, opo yi tu londodhe, tse mboka tu li momasiku gahugunina guuyuni mbuka.*
12 Onkee ano ngoka ta dhiladhila kutya okwa thikama na kotoke kaa gwe po. 13 Emakelo kehe tali mú adha ohali adha wo aantu ayehe. Ihe Kalunga oku shi okwiinekelwa, noita ka etha mu makelwe nemakelo, ndyoka itaamu vulu okwiidhidhimikila, ihe ote ke mú kwathela mu vule okwiidhidhimika, uuna tamu makelwa.
14 Onkee ano ookuume kandje aaholike, indeni ontuku okulongela iikalunga. 15 Otandi popi nane onga tandi popi naantu ye na oondunge dhokuyoolola; tokoleni ne yene, ngele shoka tandi popi oshi li mondjila, nenge osha puka. 16 Mbela oshitenga shomayambeko, shoka hatu hambelelele Kalunga, kashi shi omayambeko, ngoka hatu mono omolwombinzi yaKristus? Mbela oshikwiila, shoka hatu pambula, kashi shi omayambeko, ngoka hatu mono omolwolutu lwaKristus? 17 Molwaashoka oshikwiila shimwe owala, nonando tse otundji, otu li olutu lumwe, oshoka atuheni otatu kutha ombinga mokulya oshikwiila shoka.
18 Taleni kuIsraeli shopanyama: Mbela mboka ya li haya li omayambo, ngoka ga yambwa koshiyambelo, ihaya kala ya fa taya li pamwe naKalunga? 19 Onda hala nduno okutya shike? Mbela oshinima, shoka sha yambelwa oshikalunga, otashi ti sha, nenge oshikalunga osho tashi ti sha? 20 Aawe; ihe shoka nda hala okutya ooshono kutya, shoka iigwana hayi yamba ohayi shi yambele oondemoni, ihe haKalunga; inandi hala mu kale mu na ekwatathano noondemoni. 21 Itamu vulu okukala hamu nu moshitenga shaJehova nosho wo moshitenga shoondemoni; itamu vulu okukala hamu li “poshililo shaJehova” nosho wo poshililo shoondemoni. 22 Nenge ‘otwa hala okuningitha Jehova a kale a sa ondumbo’? Mbela otu na oonkondo tu mu vule?
23 Iinima ayihe oya pitikwa,* ihe haayihe yi na uuwanawa. Iinima ayihe oya pitikwa, ihe haayihe tayi tungu. 24 Kehe gumwe ina kala owala ta lalakanene uuwanawa we mwene, ihe kehe gumwe na lalakanene uuwanawa wamukwawo.
25 Lyeni onyama kehe tayi landithwa pomatala gonyama, nopwaa na okupula sha kombinga yayo, omolweiyuvo lyeni, 26 oshoka “evi naashihe shoka shi li ko oshaJehova.” 27 Ngele ngoka kee shi omwiitaali okwe mú hiya e tamu zimine mu ye, lyeni shaa shoka tamu pewa, nopwaa na okupula sha kombinga yasho, omolweiyuvo lyeni. 28 Ihe ngele gumwe okwe mú lombwele ta ti: “Oshinima shika osha li eyambo,” inamu shi lya omolwaangoka e mú lombwele, nomolweiyuvo. 29 Itandi popi eiyuvo lyoye, ihe olyamukweni. Oshoka omolwashike emanguluko lyandje li na okupangulwa keiyuvo lyagulwe? 30 Ngele ohandi pandula Kalunga, sho tandi li, omolwashike yamwe ye na okushekelela ndje shoka tandi pandulile?
31 Onkee ano kutya nduno otamu li, nenge otamu nu, nenge otamu ningi sha shilwe, ningeni iinima ayihe mu simanekithe Kalunga. 32 Yandeni okupundukitha Aajuda nAagreka nosho wo egongalo lyaKalunga, 33 ngaashi owala ngame tandi kambadhala okwoopalela aantu ayehe miinima ayihe, ihe hakulalakanena owala uuwanawa wandje mwene, ihe owoyendji, opo ya vule oku ka hupithwa.