Ontiyali kAakorinto
5 Oshoka otu shi shi kutya ngele egumbo lyetu lyokombanda yevi, ano etsali ndika, olya hanagulwa po, Kalunga ote ke tu pa egumbo lyaaluhe megulu inaali tungwa niikaha. 2 Oshoka megumbo ndino* otu li mo tatu keme shili, twa halelela okuzala lyetu* lyomegulu. 3 Oshoka ngele twe li zala, itatu ka adhika tu li omalutu gowala. 4 Odhoshili kutya tse mboka tu li metsali ndika otatu keme, notwa gwililwa po, molwaashoka inatu hala oku li hula mo, ihe otwa hala okuzala lilwe, opo shoka shi na okusa shi pingenwe po* komwenyo. 5 Ngoka e tu longekidhila oshinima osho tuu shika oKalunga, ngoka e tu pa ombepo ondjapuki, ndjoka yi li endhindhiliko lyaashoka tashi ke ya.
6 Onkee ano otu na omukumo aluhe, notu shi shi kutya manga tu li megumbo lyetu molutu nduka, katu li pamwe nOmuwa, 7 oshoka okweenda kwetu okwa ikolelela keitaalo, ihe hakwaashoka tu wete. 8 Ihe otu na omukumo, notwa hala okuza mo molutu nduka, tu ka kale megumbo lyetu pamwe nOmuwa. 9 Kutya nduno otu li megumbo naye, nenge katu li mo naye, oshi li elalakano lyetu a kale e tu hokwa. 10 Oshoka atuheni otatu ka holoka komeho goshipundi shokupangula shaKristus, opo kehe gumwe a ka pewe ondjambi ye sha ikolelela kwaashoka a ninga, manga a li molutu nduka, kutya nduno okwa longa uuwanawa, nenge uuwinayi.
11 Onkee ano molwaashoka otu shi kutya okutila Omuwa otaku ti shike, otatu tsikile okutompa aantu ya itaale shoka tatu ya longo, na Kalunga oku tu shi nawa. Onkee ano otwa inekela kutya nane* omu tu shi nawa. 12 Itatu mú tseyithile we kombinga yetu, ihe otatu mú pe etompelo, mu tu tange, opo mu vule okutompa mboka haya itangele eholokopo lyokombanda, ihe haashoka shi li momutima. 13 Oshoka andola katwa li nawa momitse, shoka twa ningi otwa li tatu shi ningile Kalunga; ihe ngele otu li nawa momitse, otwe shi ningi omolwuuwanawa weni. 14 Oshoka ohole yaKristus oyo hayi tu inyengitha, molwaashoka otwa thika pehulithodhiladhilo kutya omulumentu ngoka gumwe okwa sila ayehe, onkee ano ayehe oya sa. 15 Okwa sila aantu ayehe, opo mboka ye na omwenyo kaaya ikalele yo yene, ihe ya kalele ngoka e ya sila, nokwa yumudhwa.
16 Onkee ano okuza ngashingeyi, ihatu tala ko we omuntu pataloko lyopantu.* Nokuli nonando otwa li twa tala ko Kristus pataloko lyopantu,* hasho we twe mu tala ko ngaaka. 17 Onkee ano ngele opu na gumwe ngoka e li muukumwe naKristus, oku li oshishitwa oshipe; iinima iikulu oya hula po. Taleni! ngashingeyi iipe oya holoka. 18 Ihe iinima ayihe oya za kuKalunga, ngoka e tu hanganitha naye mwene okupitila muKristus, nokwe tu pa oshilonga shokuhanganitha, 19 sha hala okutya, Kalunga okwa longitha Kristus, opo a hanganithe uuyuni naye mwene, noiha yalula omayono, ngoka ye mu ningila, nokwe tu inekelela etumwalaka lyokuhanganitha.
20 Onkee ano tu li aakalelipo yaKristus, otatu mú indile tatu ti: “Hanganeni naKalunga.” Kalunga oye ta ningi eindilo lya tya ngaaka okupitila mutse. 21 Ngoka inaa tseya uulunde okwa iningi omulunde* omolwetu, opo tu vule okukala aayuuki koshipala shaKalunga okupitila muye.