KAafilippi
3 Hugunina, aamwatate, tsikileni okukala mwa nyanyukwa mu li aalanduli yOmuwa. Itandi etha po oku mú nyolela iinima, mbyoka nde mú nyolela nale, molwaashoka otandi shi ningi omolwegameno lyeni.
2 Kotokeleni aantu mboka inaaya yogoka;* kotokeleni aantu mboka haya longo uuwinayi; kotokeleni aantu mboka haya humitha komeho ekenko. 3 Oshoka tse otse twa kenkwa ekenko lyashili, tse mboka tatu longo iilonga iiyapuki kekwatho lyombepo yaKalunga, tatu itanga muKristus Jesus, noinatu tula einekelo lyetu miinima yopantu.* 4 Ngele opu na ngoka ta itanga omolwiinima yopanyama,
ngame otandi vulu okwiitanga ndi mu vule, 5 molwaashoka onda kenkwa mesiku etihetatu, nda za moshigwana shaIsraeli, nda za mezimo lyaBenjamin, Omuhebeli nda valwa kAahebeli; onda li Omufarisayi ha dhiginine ompango; 6 onda li omulaadhi mokuhepeka egongalo; nonda li nda ulike thiluthilu kutya ohandi dhiginine shoka sha popiwa mompango. 7 Ihe iinima, mbyoka nda li nda tala ko ya simana, ngashingeyi onde yi tala ko yi li iinima yowala* omolwaKristus. 8 Kakele kaashono, onda tokola okweetha po iinima ayihe omolwontseyo ya dhenga mbanda, ndjoka nda mona, yi na ko nasha naKristus Jesus, Omuwa gwandje. Omolwe, onda etha po iinima ayihe, nonde yi tala ko yi li iiyagaya yowala, opo ndi likole Kristus, 9 nondi talike ko ndi li omulanduli gwe. Itandi ti kutya ngame omuyuuki, molwaashoka handi vulika kOmpango, ihe omolwaashoka ndi na eitaalo muKristus. Uuyuuki mboka ohawu zi kuKalunga nowa ikolelela keitaalo. 10 Elalakano lyandje okutseya Jesus nosho wo oonkondo, ndhoka dhe mu yumudha kuusi, okuhepekwa nokusa ngaashi ye, 11 opo ndi tale ngele otandi mono ompito ndi yumudhwe kuusi meyumuko lyotango.
12 Inandi hala okutya andola onda mona nale ondjambi, nenge onda thika megwaneneno, ihe otandi ningi ashihe shoka tandi vulu, opo ndi ka mone ondjambi, molwaashoka oyo nda ithanenwa kuKristus Jesus. 13 Aamwatate, ngame inandi itala ko nda fa nda mona nale ondjambi; ihe uushili owo kutya: Onda dhimbwa iinima, mbyoka nda thiga konima, notandi lalakanene mbyoka yi li komeho. 14 Otandi kambadhala nda mana mo, opo ndi ka pewe ondjambi, ndjoka Kalunga ta ka gandja kwaamboka a ithana megulu okupitila muKristus Jesus. 15 Onkee ano atuheni, mboka twa koka pambepo, natu dhiladhileni kombinga yiinima, mbyoka nde mú lombwela, ihe ngele hasho hamu dhiladhila ngawo, Kalunga ote ke mú kwathela mu dhiladhile kombinga yiinima mbyoka. 16 Kakele kaashono, ngaashi twa kala tatu ningi ehumokomeho, natango natu tsikileni okweenda mondjila yimwe.
17 Aamwatate, holelii ndje, nokukala tamu tala kwaamboka taya landula oshiholelwa shoka twe mú tulila po. 18 Oshoka opu na oyendji mboka ngashingeyi ye li aatondi yomuti gwomahepeko* gwaKristus. Olundji onda li handi popi kombinga yawo, ihe ngashingeyi ohandi ya popi tandi lili. 19 Ehulilo lyawo ehanagulo, omapunda gawo ogo kalunga kawo, esimano lyawo ohoni yawo, nohaya dhiladhila owala kombinga yiinima yokombanda yevi. 20 Uukwashigwana wetu owomegulu, notwa tegelela nondjuulukwe omuhupithi gwetu, Omuwa Jesus Kristus, 21 a pangele iinima ayihe, noku shitulule omalutu getu ga kale ga fa olutu lwe, ndoka lu na eadhimo.