KAafilippi

2 Ngele omu na oohapu dhetsomukumo mwa hala oku dhi lombwela yalwe mu li aalanduli yaKristus, nenge oku ya hekeleka pahole, mu na ko nasha nayo, mu ya hole nomu ya uvitile olukeno, 2 shi ningeni, opo mu nyanyudhe ndje noonkondo, sho tamu ulike kutya omu na edhiladhilo limwe, mu holathane, mwa hangana lela, nokutala ko iinima momukalo gwa faathana. 3 Inamu ninga nando osha molwokwiihola mwene, nenge molwuuntsa, ihe ifupipikeni, nokutala ko yalwe ye mú vule. 4 Inamu lalakanena owala uuwanawa weni yene, ihe lalakaneneni wo uuwanawa wooyakweni.

5 Kaleni mu na etaloko lya fa ndyoka wo Kristus Jesus a li e na, 6 ngoka nonando okwa li a fa Kalunga, ina kambadhala nokuli okudhiladhila kutya oku thike puKalunga. 7 Mepingathano naashono, okwa etha po ashihe shoka a li e na, nokwa ningi omuntu,* e li ngaashi omupika. 8 Kakele kaashono, sho a ile e li omuntu* okwa ifupipike, nokwa vulika sigo omeso, eeno, sigo omeso lyokomuti gwomahepeko.* 9 Omolwetompelo ndyoka, Kalunga okwe mu yele nondondo yopombanda nokwe mu pe edhina ndyoka li vule omadhina agehe galwe, 10 opo kehe shimwe megulu, kombanda yevi nokohi yevi, shi tse oongolo medhina lyaJesus, 11 nelaka* kehe li hempulule montaneho kutya Jesus Kristus oye Omuwa, opo Kalunga, he, a simanekwe.

12 Aamwatate aaholike, ngaashi owala mwa kala hamu vulika aluhe uuna kaandi po, nuuna wo ndi li pune, tsikileni okulonga nuudhiginini, tamu shi ningi nokutila nokukakama omolwehupitho lyeni. 13 Kalunga oye mwene te mú koleke, moku mú pa ehalo nosho wo oonkondo, mu longe shoka e hole. 14 Kaleni hamu ningi iinima ayihe kaapu na okungungutula nokunyenyeta, 15 opo kaamu pewe uusama, nenge mu kale mu na ondjo yasha, mu li oyana yaKalunga kaamu na oshipo sha sha mokati kepipi ndika lya pilaala nolya yonuka, moka mu li tamu adhima ngaashi uuyelele wa tsa muuyuni. 16 Dhiginineni ohapu yomwenyo, opo ndi kale ndi na etompelo lyokukala nda nyanyukwa mesiku lyaKristus, molwaashoka ondi shi shi kutya inandi matuka osima yowala noinandi longa nuudhiginini osima yowala. 17 Onkee ano nonando otandi tilwahi ngaashi oshikunwayambo sho tandi yambidhidha oshilonga oshiyapuki, onda nyanyukwa unene pamwe nane amuhe, molwaashoka eitaalo lyeni olye mú inyengitha mu kuthe ombinga musho. 18 Nane wo nyanyukweni pamwe nangame.

19 Otandi dhiladhila okutuma nziya Timoteus kune, ngele Omuwa Jesus e shi hala, opo ndi vule okutsuwa omukumo, uuna a kundaneke ndje kombinga yeni. 20 Oshoka kandi na po we omuntu gulwe, ngoka ta vulu oku mú sila oshimpwiyu ngaashi ye. 21 Ayehe yalwe otaya lalakanene owala uuwanawa wawo yene, ihe haamboka waJesus Kristus. 22 Ihe ngaashi mu shi shi, Timoteus hasho e li ngawo, oshoka otwa kala nokulonga pamwe naye nuudhiginini mokuhumitha komeho onkundana ombwanawa, onga omwana nahe. 23 Onkee ano oye tandi dhiladhila okutuma kune nziya ngaashi tashi vulika, uuna nda mono kutya oshike tandi ka ningilwa. 24 Odhoshili kutya ondi na einekelo mOmuwa kutya nangame otandi ya wo kune masiku.

25 Ihe ngashingeyi ondi wete sha pumbiwa ndi mú tumine omumwatate Epafroditus, omulongi pamwe nangame, omukwiita omukwetu, noku li omutumwa gweni, ngoka hamu tumu e ye a yakule ndje, 26 molwaashoka okwe mú yuulukwa nokwa halelela oku mú mona amuhe, nokwa polimana sho a uvu kutya omwa uva kutya okwa li ta ehama. 27 Okwa li ta ehama ta ehamenene, nokonyala nokuli a se. Ihe Kalunga okwe mu sile ohenda; haye awike a sila ohenda, ihe nangame wo, opo kaandi gwedhelwe ko oluhodhi lulwe lwi ili. 28 Onkee ano otandi mu tumu kune nziya, mu vule ishewe okukala mwa nyanyukwa, nokaandi kale we ndi na oshimpwiyu sha pitilila. 29 Onkee ano mu taambii ko nenyanyu ngaashi hamu shi ningile aalanduli yOmuwa, nokukala mwa simaneka aalumentu ye mu fa, 30 molwaashoka okonyala a se omolwokuyakula Kristus,* nokwa tula omwenyo gwe moshiponga, opo a yakule ndje pehala lyeni, oshoka kamu li pamwe nangame.