Ontiyali kAakorinto

6 Tu li aalongi pamwe naKalunga, otatu mú ladhipike wo mu taambe ko uuwanawahenda waKalunga, nokukala mu shi elalakano lyawo. 2 Oshoka ota ti: “Onde ku uvu pethimbo lya opala, nomesiku lyehupitho, onde ku kwathele.” Tala! Ngashingeyi olyo ethimbo tali opalele lela. Tala! Ngashingeyi olyo esiku lyehupitho.

3 Tse itatu pundukitha* omuntu moshinima nando oshimwe, opo oshilonga shetu kaashi shekwe; 4 ihe monkalo kehe, otatu ulike kutya tse aayakuli yaKalunga, mokwiidhidhimikila omamakelo gi ili nogi ili, omaudhigu, omathimbo omadhigu, omaupyakadhi, 5 okudhengwa, okutulwa moondholongo, okuponokelwa, okulongithwa iilonga iidhigu, okulondokwa koomposi nosho wo okwiidhidhimikila ondjala omathimbo gamwe. 6 Ohatu ulike wo kutya tse aayakuli yaKalunga mokukala nonkalamwenyo ya yogoka, mokukatuka metsokumwe nontseyo, ndjoka tu na, mokwiidhidhimika, mokuulika ohenda, mokweetha tu wilikwe kombepo ondjapuki, mokwaakala tu na ohole yuufudhime, 7 mokupopya oshili, mokwiinekela moonkondo dhaKalunga; mokuhumbata iikondjitho yuuyuuki noshikaha shokolulyo* nosho wo noshikaha shokolumoho,* 8 mokusimanekwa nomokudhinwa, mokupopilwa muuwinayi nomuuwanawa. Otwa talika ko twa fa aapukithi, nonando tse aanashili, 9 twa fa kaatu shiwike, ihe otu shiwike, nonando otu na omwenyo, otwa talika ko ngaashi aantu ye li pokusa,* twa fa twa pewa egeelo,* nonando inatu dhipagwa natango, 10 twa fa twa nika oluhodhi, ihe otwa nyanyukwa aluhe, twa fa oohepele, nonando otatu yambapaleke oyendji, twa fa kaatu na sha, nonando otu na iinima ayihe.

11 Aakorinto ne, otatu popi nane twa manguluka, notwe mú egululila omitima dhetu. 12 Tse inatu ngambeka ohole yetu yoku mú hola, ihe ne omwa ngambeka ohole yeni yoku tu hola. 13 Onkee ano otandi popi nane onga aamwandje, tu egululileni wo omitima dheni.*

14 Inamu humbata ondjoko* yimwe naamboka kaaye shi ooitaali. Oshoka uuyuuki owu na ekwatathano lyashike nuugoyoki? Nenge uuyelele owu na ekwatathano lyashike nomilema? 15 Shimwe ishewe, mbela Kristus naBelial* otaya vulu ngaa okutsa kumwe? Nenge omwiitaali* oku na ekwatathano lyashike naangoka kee shi omwiitaali? 16 Otempeli yaKalunga otayi vulu ngiini okukala nekwatathano niikalunga? Oshoka tse otempeli yaKalunga omunamwenyo. Ngaashi owala Kalunga a popya ta ti: “Otandi ka kala mokati kawo, nokweenda mokati kawo, notandi ka ninga Kalunga kawo, notaya ka ninga aantu yandje.” 17 “Jehova ota ti: ‘Zii mo mokati kawo, ne mu iyoolole mo muyo, noinamu guma shoka sha nyata’”; “‘opo nduno otandi ke mú taamba ko.’” 18 “Jehova Omunankondoadhihe okwa ti wo: ‘Otandi ka ninga ho yeni, notamu ka ninga aamwandjemati naamwandjekadhona.’”