Yotango kAakorinto
11 Holelii ndje, ngaashi owala ngame handi holele Kristus.
2 Otandi mú pandula, oshoka miinima ayihe ohamu dhimbulukwa ndje, nohamu dhiginine omalongo, ngoka nde mu longa. 3 Ihe onda hala mu tseye kutya Kristus oye omutse gwomulumentu kehe; nomulumentu oye omutse gwomukiintu; naKalunga oye omutse gwaKristus. 4 Omulumentu kehe ta galikana, nenge ta hunganeke a zala sha komutse, ota sitha ohoni omutse gwe; 5 nomukiintu kehe ta galikana, nenge ta hunganeke inaa zala sha komutse, ota sitha ohoni omutse gwe, oshoka kungawo, okwa faathana nomukiintu, ngoka a kululwa. 6 Oshoka ngele omukiintu ina zala sha komutse, na kululithe omutse gwe aguhe; ihe ngele otashi sitha ohoni omukiintu a kululithe omutse gwe aguhe, na zale sha komutse.
7 Omulumentu ke na okuzala sha komutse, oshoka oye oshifetha neadhimo lyaKalunga, ihe omukiintu oku li eadhimo lyomulumentu. 8 Oshoka omulumentu ina za momukiintu, ihe omukiintu oye a za momulumentu. 9 Shimwe ishewe, omulumentu ina shitilwa omukiintu, ihe omukiintu oye a shitilwa omulumentu; 10 nomolwaashono omukiintu e na okuzala sha komutse omolwaayengeli, shi li endhindhiliko kutya oha vulika komutse gwe.
11 Kakele kaashono, palongekidho lyOmuwa, omukiintu ita vulu okukala po kaapu na omulumentu, nomulumentu ita vulu okukala po kaapu na omukiintu. 12 Oshoka ngaashi owala omukiintu a za momulumentu, nomulumentu okwa za wo momukiintu; ihe iinima ayihe oya za kuKalunga. 13 Tokoleni ne yene: Mbela osha uka ngaa omukiintu a galikane kuKalunga inaa zala sha komutse? 14 Mbela eshito itali mú longo kutya oshi li oshinima tashi sitha ohoni uuna omulumentu e na omafufu omale, 15 ihe omukiintu ngele oku na omafufu omale, oshi li esimano kuye? Oshoka pehala lyokuzala sha komutse, okwa pewa omafufu. 16 Ihe ngele opu na gumwe e li ompinge nasho, nota popile omukalondjigilile gulwe, tse nosho wo omagongalo gaKalunga katu na po we gulwe.
17 Ihe sho tandi mú pe omalombwelo ngaka, itandi mú pandula, molwaashoka ihamu gongala pamwe mu tungathane, ihe omu teyathane po. 18 Oshoka oshinima shotango, onda uva kutya uuna mwa gongala pamwe megongalo, mokati keni omu na omatopoko; noshinima shoka onde shi itaala. 19 Oshoka mokati keni otamu ka kala wo iimpaga shili, opo ne mboka mwa hokiwa kuKalunga mu kale wo mu iwetikile.
20 Uuna mwa gongala pehala limwe, elalakano lyeni ihali kala shili okulya Uulalelo wOmuwa. 21 Oshoka uuna tamu li uulalelo mboka, kehe gumwe oha adhika a lya komeho yethimbo uulalelo we mwene, naasho tamu ka tameka oku wu lya, yamwe oya sa ondjala, nayamwe oya kolwa. 22 Mbela kamu na omagumbo, moka tamu vulu okulila nokunwina? Nenge omwa dhina egongalo lyaKalunga, nohamu ningitha mboka kaaye na sha ya kale ya sa ohoni? Mbela oshike ndi na okutya kune? Mbela nandi mú pandule? Miinima mbyoka, itandi mú pandula nando.
23 Otandi mú longo shoka nda longwa kOmuwa kutya ongulohi, ndjoka Omuwa Jesus a li ta ka gwaalekwa, okwa kutha oshikwiila, 24 nokonima sho a galikana, okwe shi pambula, nokwa ti: “Oshikwiila shika otashi thaneke olutu lwandje, ndwoka talu gandjwa omolweni. Kaleni hamu shi ningi, mu dhimbulukwe ndje.” 25 Konima sho ya li uulalelo, okwa kutha wo oshitenga, ta ningi sha faathana ta ti: “Oshitenga shika otashi thaneke ehangano epe, ndyoka tali kolekwa kombinzi yandje. Kaleni hamu shi ningi, uuna tamu shi nu, opo mú dhimbulukwe ndje.” 26 Oshoka kehe ethimbo tamu li oshikwiila shika, notamu nu oshitenga shika, kungawo, otamu tseyitha eso lyOmuwa, sigo ote ya.
27 Onkee ano kehe ngoka ta li oshikwiila, nenge ta nu moshitenga shOmuwa inaa gwana oku shi ninga, ota kala e na ondjo, molwaashoka ina simaneka olutu nombinzi yOmuwa. 28 Tango, omuntu na ikonakone, opo nawa a vule okulya oshikwiila nokunwa moshitenga. 29 Oshoka ngoka ta li, nota nu, ihe ke shi kutya shoka ta li oshi lile po olutu lwOmuwa, ota ilile nota inwine epangulo ye mwene. 30 Shoka osha ningitha oyendji yomune mu kale mwa nkundipala, notamu ehama, nayamwe ya kale ya sa.* 31 Ihe ngele otwa ikonakona kutya otwa tya ngiini, itatu ka pangulwa. 32 Ihe uuna tatu pangulwa, kungawo, otatu pewa egeeloputudho kuJehova, opo kaatu ka pangulwe pamwe nuuyuni. 33 Onkee ano, aamwatate, uuna tamu gongala pamwe mu lye uulalelo mboka, tegelelathaneni. 34 Ngele opu na gumwe a sa ondjala, na lye kegumbo, opo kaamu pangulathane, sho mwa gongala pamwe. Ihe kombinga yiinima yilwe, otandi ya ndi ungaunge nayo, uuna nde ya hoka.