KAafilippi

4 Onkee ano aamwatate aaholike, ne mboka ndi mu hole nonde mu yuulukwa, one enyanyu lyandje noshishani shandje. Kaleni mwa kola mOmuwa.

2 Euodia naSintike otandi mu kumagidha mu kale mu na edhiladhilo limwe, mu li aalanduli yOmuwa. 3 Otandi ku indile wo wu li omulongi gwashili pamwe nangame,* wu kale to kwathele aakiintu mbaka ya kala taya longo pamwe nangame nuudhiginini,* mokuuvitha onkundana ombwanawa, mwa kwatelwa Klemens nosho wo aalongi pamwe nangame ayehe, mboka omadhina gawo ga nyolwa membo lyomwenyo.

4 Kaleni aluhe mwa nyanyukwa mOmuwa. Otandi shi popi natango, nyanyukweni! 5 Aantu ayehe naya mone kutya omu na ondjele. Omuwa oku li popepi. 6 Inamu kala mu na oshimpwiyu shasha, ihe iimpwiyu yeni ayihe yi tseyithileni Kalunga megalikano, nokwiindila mwa mana mo nokupandula; 7 nombili yaKalunga, ndjoka yi vule uunongo awuhe, otayi ka gamena omitima nomadhiladhilo geni, okupitila muKristus Jesus.

8 Hugunina, aamwatate, kaleni hamu dhiladhila* kombinga yiinima ayihe mbyoka yashili, mbyoka ya simana, mbyoka ya uka, mbyoka ya yogoka, mbyoka yi holike, mbyoka yi na epopilo ewanawa, mbyoka iiwanawa naambyoka ya gwana okupandulwa. 9 Ningeni iinima, mbyoka mwa ilonga kungame nomwe yi taamba ko, naambyoka mwa uva tandi popi nosho wo mbyoka mwa mona tandi ningi, na Kalunga kombili ota ka kala pamwe nane.

10 Onda nyanyukwa noonkondo mOmuwa, sho nda mono kutya omu na natango oshimpwiyu nangame. Nonando omwa li tamu ipula nangame, inamu mona ompito yoku shi ulika. 11 Itandi popi ngawo, molwaashoka andola ndi na ompumbwe, oshoka ngame onda ilonga okukala nda gwanenwa monkalo kehe. 12 Onda ilonga nkene ndi na okukala ndi na oshishona, nankene ndi na okukala ndi na oshindji. Mukehe shimwe nomoonkalo adhihe, onda ilonga oshiholekwa shokukala nda kuta, nokukala nda sa ondjala, okukala ndi na oshindji, nokukala kaandi na sha. 13 Iinima ayihe otandi yi vulu omolwangoka ta pe ndje oonkondo.

14 Kakele kaashono, omwa ninga nawa sho mwa kwathela ndje muudhigu wandje. 15 Ne Aafilippi, omu shi shi wo nokuli kutya sho nda zi mo muMakedonia, konima sho mwa uvu onkundana ombwanawa oshikando shotango, kapu na nando egongalo limwe lya kwathela ndje, kakele owala kune. 16 Oshoka sho nda li muTessalonika, omwa tumine ndje shoka nda li nda pumbwa, halumwe aluke, ihe iikando iyali. 17 Shika itashi ti andola onda hala omagano, ihe onda hala mu mone ondjambi,* ndjoka hayi zi mokugandja. 18 Ihe ondi na ashihe shoka nda pumbwa, nokuli shi vulithe po. Ngashingeyi inandi pumbwa sha, omolwomagano, ngoka Epafroditus a etele ndje ga zi kune, ge li eyambo lyezimba lya nika nawa, lya taambiwa ko kuKalunga nokwe li hokwa. 19 Kalunga, ngoka e na oshindji, naye ote ke mú pa ashihe shoka mwa pumbwa, okupitila muKristus Jesus. 20 Kalunga, Tate yetu, na simanekwe sigo aluhe. Amen.

21 Kundilii po aayapuki ayehe, mboka ye li muukumwe naKristus Jesus. Aamwatate, mboka ndi li nayo, otaye mu kundile po wo. 22 Aayapuki ayehe otaye mú kundile po, unene tuu aanegumbo yOmukesari.

23 Uuwanawahenda wOmuwa Jesus Kristus nawu kale pamwe nane omolwombepo ombwanawa, ndjoka hamu ulike.